ସମୀକ୍ଷା ବ୍ୟୁରୋ
ଭାରତ ଏବଂ ଦକ୍ଷିଣ ଆଫ୍ରିକା ମଧ୍ୟରେ ଅନୁଷ୍ଠିତ ଟେଷ୍ଟ ସିରିଜ୍ରେ ଭାରତ ବିଜୟୀ ହୋଇଛି । ଚତୁର୍ଥ ଇନିଂସରେ ମହମ୍ମଦ ସାମି 35 ରନ୍ ବିନିମୟରେ 5 ଓ୍ବିକେଟ୍ ଅକ୍ତିଆର କରି ବିଜୟରେ ପ୍ରମୁଖ ଭୂମିକା ଗ୍ରହଣ କରିଥିଲେ । ଦକ୍ଷିଣ ଆଫ୍ରିକା ମାତ୍ର 191 ରନ୍ରେ ଅଲ୍ଆଉଟ୍ ହୋଇଥିବା ବେଳେ ଭାରତ 203 ରନ୍ରେ ବିଜୟୀ ହୋଇଥିଲା ।
ଏହି ଟେଷ୍ଟ ମ୍ୟାଚ୍ରେ ଭାରତୀୟ ଅଧିନାୟକ ବିରାଟ କୋହଲି ଟସ୍ ଜିତି ପ୍ରଥମେ ବ୍ୟାଟିଂ କରିବାର ନିଷ୍ପତ୍ତି ନେଇଥିଲେ । ଭାରତ ପକ୍ଷରୁ ମୟଙ୍କ ଅଗ୍ରଓ୍ବାଲ (215) ଏବଂ ରୋହିତ ଶର୍ମାଙ୍କ (176) ରନ୍ ବଳରେ ଭାରତ 502 ରନ୍ ସଂଗ୍ରହ କରିଥିଲା । ଜବାବରେ ଡିନ୍ ଏଲଗାରଙ୍କ 160 ଏବଂ ଡିକକ୍ଙ୍କ 111 ରନ୍ ସତ୍ତ୍ବେ ଦ. ଆଫ୍ରିକା 71 ରନ୍ ପଛରେ ରହିଥିଲା । ଭାରତ ପକ୍ଷରୁ ରବିଚନ୍ଦ୍ରନ ଅଶ୍ବିନ୍ 7ଓ୍ବିକେଟ ସଫଳତା ହାସଲ କରିଥିଲେ । ଦ୍ବିତୀୟ ଇନିଂସରେ ଭାରତ ପକ୍ଷରୁ ଆକ୍ରମଣାତ୍ମକ ବ୍ୟାଟିଂର ନିଦର୍ଶନ ଦେଖିବାକୁ ମିଳିଥିଲା । ଭାରତ ପକ୍ଷରୁ ରୋହିତ ଶର୍ମା ବିସ୍ଫୋରକ 127 ରନ୍ ସଂଗ୍ରହ କରିଥିବା ବେଳେ ପୂଜାରା 84 ରନ୍ ସଂଗ୍ରହ କରିଥିଲେ । ଭାରତ 323/4ରେ ପାଳି ଘୋଷଣା କରିବା ପରେ ଦକ୍ଷିଣ ଆଫ୍ରିକାକୁ 394 ରନ୍ର ବିଜୟ ଲକ୍ଷ୍ୟ ମିଳିଥିଲା । ଜବାବରେ ଦ. ଆଫ୍ରିକା ମାତ୍ର 191 ରନ୍ରେ ଅଲ୍ଆଉଟ୍ ହୋଇଯାଇଥିଲା । ଦକ୍ଷିଣ ଆଫ୍ରିକା ପକ୍ଷରୁ ଡେନ୍ ପିଟ୍ ସର୍ବାଧିକ 56 ରନ୍ ସଂଗ୍ରହ କରିଥିବା ବେଳେ ସନୁରାନ୍ ମୁଥୁସ୍ବାମୀ 49 ରନ୍ରେ ଅପରାଜିତ ରହିଥିଲେ । ତୃତୀୟ ସର୍ବାଧିକ ଭାବରେ ଆଡେନ୍ ମକ୍ରମ୍ 39 ରନ୍ ସଂଗ୍ରହ କରିଥିଲେ । ଗତକାଲିର ଅପରାଜିତ ବ୍ୟାଟ୍ସମ୍ୟାନ୍ ଥେନସ୍ ଡି ବ୍ରୁଇନ୍ଙ୍କୁ ଅଶ୍ବିନ୍ ଆଉଟ୍ କରିବା ପରେ ସାମି ଦ. ଆଫ୍ରିକା ମଧ୍ୟକ୍ରମକୁ ଧ୍ବସ୍ତ କରି ଦେଇଥିଲେ । ଭାରତ ପକ୍ଷରୁ ସାମି 5 ଓ୍ବିକେଟ୍ ସଫଳତା ହାସଲ କରିଥିବା ବେଳେ ଜାଡେଜା 4ଟି ଏବଂ ଅଶ୍ବିନ୍ ଗୋଟିଏ ଓ୍ବିକେଟ୍ ଅକ୍ତିଆର କରିଥିଲେ । ରୋହିତ ଶର୍ମାଙ୍କୁ ମ୍ୟାନ୍ ଅଫ୍ ଦ ମ୍ୟାଚ୍ ଘୋଷଣା କରାଯାଇଥିଲା ।
ଏହି ଟେଷ୍ଟ ମ୍ୟାଚ୍ରେ ଅନେକ ରେକର୍ଡ ଦେଖିବାକୁ ମିଳିଥିଲା । ଟେଷ୍ଟ ଚାମ୍ପିୟନ୍ସିପ୍ ପଏଣ୍ଟ ଟେବୁଲ୍ରେ 160 ପଏଣ୍ଟ ସହିତ ଭାରତ ଏକ ନମ୍ବର ସ୍ଥାନରେ ରହିଥିଲା । ଅଧିନାୟକ ଭାବରେ ସର୍ବାଧିକ ବିଜୟ ହାସଲରେ ଷ୍ଟିଫେନ୍ ଫ୍ଳେମିଂଙ୍କୁ ଅତିକ୍ରମ କଲେ ବିରାଟ କୋହଲି । କୋହଲି 49 ଟେଷ୍ଟରୁ 29 ତମ ବିଜୟ ହାସଲ କରିଛନ୍ତି । 350 ଓ୍ବିକେଟ୍ ହାସଲ କ୍ଲବ୍ରେ ମୁଥେୟା ମୁରଲୀଧରନଙ୍କମ ରେକର୍ଡର ସମକକ୍ଷ ହୋଇଛନ୍ତି ରବି ଅଶ୍ବିନ୍ । ଗୋଟିଏ ମ୍ୟାଚ୍ରେ ସର୍ବାଧିକ ଛକ୍କାରେ 23 ବର୍ଷର ରେକର୍ଡ ଭାଙ୍ଗିଛନ୍ତି ରୋହିତ ଶର୍ମା । ଏହି ମ୍ୟାଚ୍ରେ ରୋହିତ ଏକାକୀ 13 ଛକ୍କା ମାରିଥିଲେ । ସ୍ପିନର ରବୀନ୍ଦ୍ର ଜାଡେଜା ନିଜର 44 ତମ ମ୍ୟାଚ୍ରେ 200 ଓ୍ବିକେଟ୍ କ୍ଲବ୍ରେ ପାଦ ଥାପିଛନ୍ତି ।
