ସମୀକ୍ଷା ବ୍ୟୁରୋ
ମହାରାଷ୍ଟ୍ର ବିଧାନସଭା ନିର୍ବାଚନରେ ବିଜେପି-ଶିବସେନା ମେଣ୍ଟର ବିଜୟକୁ “ମହା ଜନାଦେଶ” ବୋଲି ଗତକାଲି ମୁଖ୍ୟମନ୍ତ୍ରୀ ଦେବେନ୍ଦ୍ର ଫଡନବିସ ଯାହା କହିଥିଲେ, ତାକୁ ଆଜି ମେଣ୍ଟର ସହଯୋଗୀ ଶିବସେନା ପ୍ରବଳ ସମାଲୋଚନା କରିଛି। ଗତକାଲି ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ ଓ ଗୃହ ମନ୍ତ୍ରୀ ଅମିତ ଶାହା ଏହି ବିଜୟକୁ ନିଜର ବଡ ଉପଲବ୍ଧି ଭାବରେ ବର୍ଣ୍ଣନା କରିଥିଲେ। ଆଜି ଶିବସେନାର ମୁଖପତ୍ର “ସାମ୍ନା” ରେ ପ୍ରକାଶିତ ସଂପାଦକୀୟରେ ଏହା ମହା ଜନାଦେଶ ନୁହେଁ, ବରଂ ବିଜେପିର କ୍ଷମତା ଅହଂକାର ଉପରେ ଲୋକମତର ପ୍ରଚଣ୍ଡ ପ୍ରହାର ବୋଲି କୁହାଯାଇଛି। ବିରୋଧୀ ଦଳକୁ ଭାଙ୍ଗି ଓ କ୍ଷମତାର ଅହଂକାର ପ୍ରଦର୍ଶନ କରି ନିର୍ବାଚନ ଜିଣିହେବ ନାହିଁ ଓ ଏହି କଥା ମହାରାଷ୍ଟ୍ର ନିର୍ବାଚନରେ ପ୍ରମାଣିତ ହୋଇଛି ବୋଲି ଶିବସେନା କହିଛି।
ଶରଦ ପାୱାରଙ୍କ ରାଷ୍ଟ୍ରବାଦୀ କଂଗ୍ରେସ ପାର୍ଟିକୁ ବିଜେପି ଯେମିତି ଧ୍ଵଂସ କରିବାକୁ ଚେଷ୍ଟା କରିଥିଲା, ଲୋକେ ତାକୁ ସହଜରେ ଗ୍ରହଣ କଲେ ନାହିଁ। ସେଥିଲାଗି ପାୱାରଙ୍କ ଦଳ ୫୦ରୁ ଅଧିକ ଆସନ ପାଇବାକୁ ସକ୍ଷମ ହେଲା। ଏପରିକି ନେତୃତ୍ବର ଅନୁପସ୍ଥିତି ସତ୍ତ୍ୱେ କଂଗ୍ରେସକୁ ୪୪ ଆସନ ମିଳିଲା ଓ ଅନ୍ୟାନ୍ୟ ଛୋଟ ଛୋଟ ଦଳ ୨୫ ଆସନ ପାଇଲେ ବୋଲି ଶିବସେନା କହିଛି। ବିଜେପିର ଆସନ ଗତ ଥର ତୁଳନାରେ କମିଯାଇଥିବାରୁ ଏହାକୁ “ମହା ଜନାଦେଶ” ବୋଲି କହିବାର କୌଣସି କାରଣ ନାହିଁ ବୋଲି ଶିବସେନା ଆକ୍ଷେପ କରିଛି।
ସେହିପରି ଦଳବଦଳକାରୀ ଓ ସୁବିଧାବାଦୀମାନେ ଏହି ନିର୍ବାଚନରେ ଭଲ ପାନେ ପାଇଛନ୍ତି ବୋଲି “ସାମ୍ନା” ସମ୍ପାଦକୀୟରେ କୁହାଯାଇଛି। ସତାରା ଲୋକସଭା ଆସନରେ ବିଜେପି ଟିକଟରେ ଲଢୁଥିବା ଶିବାଜୀଙ୍କ ବଂଶଧର ଉଦୟନରାଜ ଭୋସଲେଙ୍କ ପରାଜୟ ଏହାର ଏକ ବଡ ଉଦାହରଣ ବୋଲି କୁହାଯାଇଛି। ମଇ ନିର୍ବାଚନରେ ଏହି ଆସନରୁ ଉଦୟନରାଜ ରାଷ୍ଟ୍ରବାଦୀ କଂଗ୍ରେସ ଟିକଟରେ ନିର୍ବାଚିତ ହୋଇଥିଲେ। ବିଜେପି ପ୍ରଲୋଭନରେ ସେ ଏନସିପି ଛାଡି ଲୋକସଭାରୁ ଇସ୍ତଫା ଦେଇଥିଲେ। ଉପ ନିର୍ବାଚନରେ ସେ ବିଜେପି ପ୍ରାର୍ଥୀ ଭାବେ ପରାସ୍ତ ହୋଇଛନ୍ତି। ବିରୋଧୀ ଦଳ ଗୁଡିକ ଭିତରେ ଭେଦ ସୃଷ୍ଟି କରି ବିଜେପିର କ୍ଷମତା ଦଖଲ ପ୍ରକ୍ରିୟାକୁ ଶିବସେନା ତୀବ୍ର ସମାଲୋଚନା କରିଛି।
ନିର୍ବାଚନ ଫଳ ପ୍ରକାଶ ପାଇଲା ପରେ ଶିବସେନା ହଠାତ ବିଜେପି ଉପରେ ପ୍ରବଳ ଚାପ ପ୍ରୟୋଗ ଆରମ୍ଭ କରିଛି। ଇତି ମଧ୍ୟରେ ଆଦିତ୍ୟ ଥାକରେଙ୍କୁ ମହାରାଷ୍ଟ୍ର ମୁଖ୍ୟମନ୍ତ୍ରୀ ଭାବରେ ଉପସ୍ଥାପିତ କରି ବିରାଟକାୟ ପୋଷ୍ଟର ସବୁ ମୁମ୍ବାଇ ସହରରେ ଦେଖିବାକୁ ମିଳୁଛି। ଶିବସେନାର ଏ ପ୍ରକାର ଆଭିମୁଖ୍ୟ ଏବେ ବିଜେପି ପାଇଁ ମୁଣ୍ଡବିନ୍ଧାର କାରଣ ପାଲଟିଛି।