ସମୀକ୍ଷା ବ୍ୟୁରୋ
ମହାରାଷ୍ଟ୍ର ବିଧାନସଭା ନିର୍ବାଚନ ଫଳ ବାହାରିବାର ୧୦ ଦିନ ପରେ ମଧ୍ୟ ରାଜ୍ୟରେ ସରକାର ଗଠନ ହୋଇ ପାରୁନାହିଁ। ବିଜେପି-ଶିବସେନା ମେଣ୍ଟ ପାଖରେ ସରକାର ଗଢିବା ଲାଗି ଆବଶ୍ୟକ ସମର୍ଥନ ରହିଥିଲେ ମଧ୍ୟ ମୁଖ୍ୟମନ୍ତ୍ରୀ ପଦକୁ ୫୦:୫୦ ଅନୁପାତରେ ବାଣ୍ଟିବାକୁ ନେଇ ଦୁଇ ଦଳ ଭିତରେ ପ୍ରବଳ ଗଣ୍ଡଗୋଳ ଆରମ୍ଭ ହୋଇଛି। ଆଜି ହଠାତ ଶିବସେନା ଦାବି କରିଛି ଯେ ସରକାର ଗଠନ ଲାଗି ତାଙ୍କ ପାଖରେ ୧୭୦ ବିଧାୟକଙ୍କ ସମର୍ଥନ ରହିଛି। ୨୮୮ ଆସନ ବିଶିଷ୍ଟ ମହାରାଷ୍ଟ୍ର ବିଧାନସଭାରେ ବିଜେପିର ୧୦୫, ଶିବସେନାର ୫୬, ଏନସିପିର ୫୪, କଂଗ୍ରେସର ୪୪ ଓ ଅନ୍ୟାନ୍ୟ ୨୯ ବିଧାୟକ ରହିଛନ୍ତି। ଶିବସେନା ଓ ବିଜେପି ଭିତରେ ବଢୁଥିବା କନ୍ଦଳ ଯୋଗୁଁ ଏବେ ପ୍ରତି ମୁହୂର୍ତ୍ତରେ ରାଜ୍ୟର ରାଜନୈତିକ ସମୀକରଣ ବଦଳି ଚାଲିଛି। ଆଜି ହଠାତ ବିଜେପିକୁ ଅଡୁଆରେ ପକାଇ ଶିବସେନା ଘୋଷଣା କରିଛି ଯେ, ତାଙ୍କ ପାଖରେ ସରକାର ଗଢିବା ଲାଗି ୧୭୦ ବିଧାୟକଙ୍କ ସମର୍ଥନ ରହିଛି।
ଏହାକୁ ନେଇ ଏବେ ରାଜନୈତିକ ହଟଚମଟ ଆରମ୍ଭ ହୋଇଛି। ହିନ୍ଦୁତ୍ଵ ବିଚାର ଦୃଷ୍ଟିରୁ ଶିବସେନା ବିଜେପିର ପ୍ର୍ରାକୃତିକ ସହଯୋଗୀ ବୋଲି କୁହାଯାଇପାରେ। ହେଲେ ଗତ କିଛି ବର୍ଷ ହେଲା ବିଜେପିର ସର୍ବଗିଳା ରାଜନୀତି କାରଣରୁ ଏହାକୁ କୌଣସି ଦଳ ସହଯୋଗୀ ଭାବରେ ଗ୍ରହଣ କରିବାକୁ ପ୍ରସ୍ତୁତ ନୁହନ୍ତି। ବିଜେପି ସଭାପତି ଅମିତ ଶାହ କେନ୍ଦ୍ର ସରକାରର ସମସ୍ତ କ୍ଷମତା ପ୍ରୟୋଗ କରି ଆଞ୍ଚଳିକ ଦଳଗୁଡିକୁ ସମାପ୍ତ କରିଦେବାକୁ ଚାହୁଁଛନ୍ତି ବୋଲି ଆଞ୍ଚଳିକ ଦଳମାନଙ୍କର ହୃଦବୋଧ ହୋଇଛି। ଏହାର ପରିଣତି ସ୍ଵରୂପ ଏନଡିଏରେ ଥିବା ପୁରୁଣା ସହଯୋଗୀ ଶିବସେନା ଓ ଅକାଳୀ ଦଳ ଏବେ ଭିନ୍ନ ବାଟ ଖୋଜିବା ଆରମ୍ଭ କରିଛନ୍ତି।
ଶିବସେନା ଏବେ ଯଦି ବିଜେପିଠୁ ଅଲଗା ହୋଇ ସରକାର ଗଢିବାକୁ ଚାହେଁ ତାହେଲେ ଆପେ ଆପେ ସରକାର ଗଠନର ଚାବିକାଠି ଶରଦ ପାୱାର ଓ ସୋନିଆ ଗାନ୍ଧୀଙ୍କ ହାତକୁ ଚାଲି ଆସିବ। ବିରୋଧୀ ଦଳରେ ବସିବାକୁ ନୈତିକ ଭାବରେ ପ୍ରସ୍ତୁତ ଥିବା ଏନସିପି ଓ କଂଗ୍ରେସ ଶିବସେନାକୁ ସମର୍ଥନ ଦେବେ କି ନାହିଁ, ତାହା ଏକ ଜଟିଳ ପ୍ରଶ୍ନ। ସାମ୍ପ୍ରଦାୟିକ ରାଜନୀତିରେ ଶିବସେନା ଓ ବିଜେପି ଉଭୟେ ଅଭିଜ୍ଞ ଓ ଏମାନଙ୍କ ପ୍ରତି କଂଗ୍ରେସର ସ୍ଵାଭାବିକ ସନ୍ଦେହ ରହିଛି। ଶିବସେନାକୁ ସରକାର ଲାଗି ସମର୍ଥନ ଦେବା କଂଗ୍ରେସ ପାଇଁ ଏକ ବଡ ବୈଚାରିକ ସଙ୍କଟ ସୃଷ୍ଟି କରିବ।
ହେଲେ ରାଜନୈତିକ ବାସ୍ତବତାକୁ ଆଖି ଆଗରେ ରଖି ବିଜେପିକୁ କ୍ଷମତାରୁ ଦୂରେଇ ରଖିବାର ସୁଯୋଗ ମିଳିଲେ ତାକୁ କଂଗ୍ରେସ ବା ଏନସିପି ହାତଛଡା କରିବେ ନାହିଁ। ନିଜ ପକ୍ଷରେ ସଂଖ୍ୟାମତ ନଥାଇ ମଧ୍ୟ ମହାରାଷ୍ଟ୍ରରେ ନିଜର ବିଜୟ ଉତ୍ସବ ପାଳନ କରିସାରିଥିବା ବିଜେପି ଏବେ ଶିଶୁପାଳ ହେବା ଅବସ୍ଥାକୁ ଆସିଯାଇଛି। “ମୁଁ ହିଁ ମୁଖ୍ୟମନ୍ତ୍ରୀ ହେବି” ବୋଲି ଦେବେନ୍ଦ୍ର ଫଡନବିସଙ୍କ ଜିଦ ଯୋଗୁଁ ଏବେ ବିଜେପି ଅଧିକରୁ ଅଧିକ ସଙ୍କଟର ସାମ୍ନା କରୁଛି।
ପୁରୁଣା ଅନୁଭବ ଓ ରାଜନୈତିକ ଗଣିତକୁ ଦେଖିଲେ, ଏବେବି ବିଜେପି ଓ ଶିବସେନା ମଧ୍ୟରେ ମେଣ୍ଟର ସଂଭାବନା ଅଧିକ ସହଜ ମନେ ହେଉଛି। ହେଲେ ରାଜନୀତିରେ କେତେବେଳେ କି ସମୀକରଣ ସୃଷ୍ଟି ହେବ, ତାହା କହିବା ଆଦୌ ସହଜ ନୁହେଁ। ବର୍ତ୍ତମାନ ର ସ୍ଥିତିରେ ବିଜେପିର ଅବସ୍ଥା ମହାରାଷ୍ଟ୍ରରେ ଅତ୍ୟନ୍ତ ଦୟନୀୟ, ଏକଥା ମାନିବାକୁ ପଡିବ। ହୁଏତ ମହାରାଷ୍ଟ୍ରରେ କ୍ଷମତା ଦାଖଲ ଲାଗି ଏବେ ପୁଣିଥରେ ବିଜେପି ନିଜର ସବୁଠୁ ବଡ ସହଯୋଗୀ ସିବିଆଇ, ଇଡି, ଆୟକର ବିଭାଗ ଇତ୍ୟାଦିଙ୍କୁ କାମରେ ଲଗାଇବା ପାଇଁ ଉଦ୍ୟମ କରିବ। ତେବେ ଶିବସେନାକୁ ଏ ପ୍ରକାର ଚାପରେ ଡରାଇବା ଆଦୌ ସହଜ କଥା ନୁହେଁ।
