ସମୀକ୍ଷା ବ୍ୟୁରୋ
ମହାରାଷ୍ଟ୍ର ମହାନାଟକରେ ଏବେ ଘଟଣା ବେଶ୍ ରୋଚକ ପରିସ୍ଥିତିରେ ପହଞ୍ଚିଛି । ପରିଶେଷରେ ଶିବସେନା ଏନ୍ସିପି ଓ କଂଗ୍ରେସ ସହ ମେଣ୍ଟ କରି ରାଜ୍ୟରେ ସରକାର ଗଠନ କରିବାର ସମ୍ଭାବନା ସ୍ପଷ୍ଟ ଦିଶୁଛି । ଗତ ଦୁଇ ସପ୍ତାହ ଭିତରେ ମହାରାଷ୍ଟ୍ରର ରାଜନୀତିରେ ସାପ ସିଡି ଖେଳ ଚାଲିଛି । ମହାରାଷ୍ଟ୍ର ରାଜନୀତିରେ ଗେମ୍ଚେଞ୍ଚର ପାଲଟିଛି ଏନ୍ସିପି । ମହାରାଷ୍ଟ୍ରରେ ବିଜେପି – ଶିବସେନା ମେଣ୍ଟ ସରକାର ବିଫଳ ହେବା ପରେ ଏବେ ତିନିଦଳଙ୍କ ମେଣ୍ଟରେ ସରକାର ଗଠନ ପ୍ରକ୍ରିୟା ଚାଲିଛି । ଆଜି ସନ୍ଧ୍ୟା ସୁଦ୍ଧା ଶିବସେନା ରାଜ୍ୟପାଳଙ୍କ ପାଖରେ ଉପସ୍ଥିତ ରହି ସରକାର ଗଠନ କରିବାକୁ ଦାବି ଉପସ୍ଥାପନ କରିବା ସହିତ ସଂଖ୍ୟା ଗରିଷ୍ଠତାର ପ୍ରମାଣ ଦେବ ବୋଲି ସୂଚନା ମିଳୁଛି। ବିଜେପି ସହିତ ୩୦ ବର୍ଷର ସମ୍ପର୍କକୁ ତୁଟାଇ ଶିବସେନା ନିଜର ଏକ ବିକଳ୍ପ ରାସ୍ତା ପାଇଁ ଏବେ ପ୍ରସ୍ତୁତ ହେଉଛି ।
ମହାରାଷ୍ଟ୍ରର ଜନାଦେଶ ବିଜେପି ଓ ଶିବସେନା ହାତକୁ ଆସିଥିବାବେଳେ ସରକାର କିନ୍ତୁ ଶିବସେନା, ଏନ୍ସିପି ଓ କଂଗ୍ରେସ ସହ ହୋଇପାରେ । ଏହା ନିର୍ବାଚନୀ ଗଣିତର ସବୁଠୁ ବଡ ପରିବର୍ତ୍ତନ ବୋଲି କୁହା ଯାଇପାରେ ତେବେ ମିଳିତ ସରକାର ଗଠନ ନେଇ ଉଭୟ ଦଳ ମଧ୍ୟରେ ହୋଇଥିବା ବୁଝାମଣା ଅନୁଯାୟୀ ତିନି ଦଳକୁ ସମାନ ପରିମାଣର ଗୁରୁତ୍ବ ରହିବ। ଆଜି ସନ୍ଧ୍ୟା ୪ଟା ସମୟରେ ସୋନିଆଙ୍କ ଘରେ ୧୦ ଜନପଥରେ ଏକ ବୈଠକରେ ଶିବସେନା ସହ କଂଗ୍ରେସ ମେଣ୍ଟ କରିବା ନେଇ ସୂଚନା ଦେବ । କଂଗ୍ରେସର ସହମତି ଭିତ୍ତିରେ ସରକାର ଗଠନ ପ୍ରକ୍ରିୟା ଆରମ୍ଭ ହେବ । ସରକାରରେ ଠାକ୍ରେ ମୁଖ୍ୟମନ୍ତ୍ରୀ, ଏନ୍ସିପି ଓ କଂଗ୍ରେସର ଉପମୁଖ୍ୟମନ୍ତ୍ରୀ ଓ କଂଗ୍ରେସ ବାଚସ୍ପତି ପଦବୀ ପାଇବା ନେଇ ବୁଝାମଣା ହୋଇଛି । ତିନି ଦଳ ସମ ପରିମାଣରେ ସରକାରରେ ନିଜର ସହଭାଗିତା ରଖିବେ ।
ସରକାର ଗଢିବାକୁ ନେଇ ଶିବସେନାର ଏହି ପଦକ୍ଷେପ ମହାରାଷ୍ଟ୍ର ରାଜନୀତିରେ ଉପରେ କ’ଣ ପ୍ରଭାବ ପକାଇବ, ତାହା ଆଗାମୀ ସମୟରେ ସ୍ପଷ୍ଟ ହେବ । ଭିନ୍ନ ଭିନ୍ନ ବିଚାରପନ୍ଥୀଙ୍କ ମଧ୍ୟରେ ସରକାରରେ ସମନ୍ବୟ ରହିବା ଏକ ବଡ଼ ସମସ୍ୟା ହୋଇପାରେ । ହିନ୍ଦୁତ୍ବବାଦରେ ବିଶ୍ବାସ ରଖୁଥିବା ଶିବସେନା କ୍ଷମତା ନିଶାରେ ଯଦିଓ ତା’ର ବିପରୀତ ବିରୋଧୀ ଚିନ୍ତାଧାରାଙ୍କ ସହିତ ସରକାର ଗଠନ କରିବା ପାଇଁ ରାଜି ହୋଇଛି, ହେଲେ ପରବର୍ତ୍ତୀ ସମୟରେ ଏମାନେ କି ପ୍ରକାର ସ୍ଥିତିରେ ସରକାର ଚଳାଇବାକୁ ସମର୍ଥ ହେବେ, ତାହା ସମୟ କହିବ।
ମହାରାଷ୍ଟ୍ରରେ ସ୍ଥାୟୀ ସରକାର ରହିବା ନା ଏକ ଅସ୍ଥାୟୀ ସରକାର ହାତରେ ମହାରାଷ୍ଟ୍ରର ଭାଗ୍ୟ ପଡିବ, ତାହା ସମୟ କହିବ। ତେବେ ଗତ ପାଞ୍ଚ ବର୍ଷ ଭିତରେ ସବୁଠୁ ବଡ ରାଜନୈତିକ ଝଟକା ଖାଇଥିବା ବିଜେପି ଚୁପ ହୋଇ ବସିବ ନାହିଁ। ମେଣ୍ଟ ସରକାରକୁ ଅସ୍ଥିର କରିବା ଲାଗି ଓ ଭାଙ୍ଗିବା ଲାଗି ବିଜେପି ବାରମ୍ବାର ଉଦ୍ୟମ କରିବ। ସେ ପ୍ରକାର ସଙ୍କଟକୁ ସାମ୍ନା କରିବାରେ ଶିବସେନା-କଂଗ୍ରେସ ଓ ଏନ୍ସିପି ମେଣ୍ଟ, ସତରେ ସଫଳ ହେବେ କି?