ସମୀକ୍ଷା ବ୍ୟୁରୋ
ଆଜି ଆମ ଦେଶର ସବୁ ଗଣମାଧ୍ୟମରେ ଖବର ଚାଲିଛି ଯେ, ପାକିସ୍ତାନର ପୂର୍ବତନ ସାମରିକ ଶାସକ ପରବେଜ ମୁଶାରଫଙ୍କୁ ଫାଶୀଦଣ୍ଡରେ ଦଣ୍ଡିତ କରାଯାଇଛି। ପାକିସ୍ତାନ ସ୍ଥିତ ପେଶାୱାର ହାଇ କୋର୍ଟର ଏକ ତିନି ଜଣିଆଁ ବେଞ୍ଚ ମୁଶାରଫଙ୍କୁ ସର୍ବୋଚ୍ଚ ଦଣ୍ଡରେ ଦଣ୍ଡିତ କରିଛନ୍ତି। ତେବେ କାହିଁକି ମୁଶାରଫଙ୍କୁ ଏହି ଦଣ୍ଡାଦେଶ ମିଳିଛି? ପୂର୍ବରୁ ପୂର୍ବତନ ପାକିସ୍ତାନ ପ୍ରଧାନମନ୍ତ୍ରୀ ନୱାଜ ସରିଫଙ୍କୁ ଦୁର୍ନୀତି ଅଭିଯୋଗରେ ସେହି ଦେଶର ସର୍ବୋଚ୍ଚ ଅଦାଲତ ଜେଲ ଦଣ୍ଡ ଦେଇଥିଲେ। ତେବେ ସରିଫଙ୍କ ମାମଲା ବ୍ୟକ୍ତିଗତ ହୋଇଥିବା ବେଳେ, ମୁଶାରଫଙ୍କ ମାମଲା ସାମ୍ବିଧାନିକ। ପାକିସ୍ତାନର ସମ୍ବିଧାନକୁ ବରଖାସ୍ତ କରି ସାମରିକ ଏକଛତ୍ରବାଦ ପ୍ରତିଷ୍ଠା କରିଥିବାରୁ ମୁଶାରଫଙ୍କୁ ଏହି ଦଣ୍ଡ ଦିଆଯାଇଛି। ପେଶାୱାର ହାଇକୋର୍ଟର ସ୍ଵତନ୍ତ୍ର ବେଞ୍ଚ ଏହି ସଜା ଶୁଣାଇବାବେଳେ ପାକିସ୍ତାନର ସମ୍ବିଧାନ ଓ ଆଇନକୁ ସର୍ବୋଚ୍ଚ ବୋଲି କହିବା ସହିତ ସାମ୍ବିଧାନିକ ବିଧି ବ୍ୟବସ୍ଥା ସହିତ ଖେଳ ଖେଳାଯାଇ ପାରିବ ନାହିଁ ବୋଲି ସ୍ପଷ୍ଟ ସଙ୍କେତ ଦେଇଛନ୍ତି।
୧୯୯୯ ଭାରତ ପାକିସ୍ତାନ ମଧ୍ୟରେ ହୋଇଥିବା କାରଗିଲ ଯୁଦ୍ଧ ପରେ ସେତେବେଳେ ସେନାବାହିନୀର ମୁଖ୍ୟ ଥିବା ଜେନେରାଲ ପରଭେଜ ମୁଶାରଫ ନିର୍ବାଚିତ ନୱାଜ ସରିଫ ସରକାରକୁ ଗାଦୀରୁ ହଟାଇ ପାକିସ୍ତାନର ସାମରିକ ଶାସକ ଭାବରେ ଦାୟିତ୍ଵ ଗ୍ରହଣ କରିଥିଲେ। ଏକ ନିର୍ବାଚିତ ସରକାରକୁ ବଳ ପୂର୍ବକ ହଟାଇ ୨୦୦୧ ରେ ଜୁନ ମାସରେ ସେ ନିଜେ ନିଜକୁ ରାଷ୍ଟ୍ରପତି ଭାବେ ମନୋନୀତ କରିଥିଲେ। ୩, ନଭେମ୍ବର, ୨୦୦୭ ରେ ଦେଶରେ ପ୍ରତିଷ୍ଠିତ ସମ୍ବିଧାନକୁ ବରଖାସ୍ତ କରି ମୁଶାରଫ ପାକିସ୍ତାନରେ ଜରୁରୀକାଳିନ ପରିସ୍ଥିତି ଲାଗୁ କରିଥିଲେ। ସୁପ୍ରିମ କୋର୍ଟର ତତ୍କାଳୀନ ମୁଖ୍ୟ ବିଚାରପତି ଜଷ୍ଟିସ ଇଫ୍ତେଖାର ଚୌଧୁରୀ ଙ୍କ ସମେତ ଅନେକ ବିଚାରପତିଙ୍କୁ ନିଲମ୍ବିତ କରିଥିଲେ। ୧୮, ଅଗଷ୍ଟ, ୨୦୦୮ ରେ ମୁଶାରଫ ପାକିସ୍ତାନ ରାଷ୍ଟ୍ରପତି ପଦରୁ ଇସ୍ତଫା ଦେଇଥିଲେ।
ତାଙ୍କ ଇସ୍ତଫା ପରେ ୩୧,ଜୁଲାଇ, ୨୦୦୯ ତାରିଖରେ ପାକିସ୍ତାନ ସୁପ୍ରିମ କୋର୍ଟ ମୁଶାରଫଙ୍କ ରାଷ୍ଟ୍ରପତି ପଦବୀ ଓ ସେ ନେଇଥିବା ସବୁ ସରକାରୀ ନିଷ୍ପତ୍ତି ଅବୈଧ ବୋଲି ଘୋଷଣା କରିଥିଲେ। ୨୦୦୯ ରୁ ସ୍ଵତନ୍ତ୍ର ବିଚାର ବିଭାଗୀୟ ପ୍ରକ୍ରିୟାରେ ମୁଶାରଫଙ୍କ ବିଚାର ଚାଲିଥିଲା। ଆଇନର ଶାସନକୁ ଅଣଦେଖା କରି ଏକଛତ୍ରବାଦ ପ୍ରତିଷ୍ଠାକୁ ପାକିସ୍ତାନର ସୁପ୍ରିମ କୋର୍ଟ କଡା ବିରୋଧ କରିବା ସହିତ ମୁଶାରଫଙ୍କୁ ଆଜି ହାଇକୋର୍ଟରେ ଦଣ୍ଡିତ ହେବାକୁ ପଡିଛି।
ସମ୍ବିଧାନ ବିରୋଧୀ ପଦକ୍ଷେପ ନେଇଥିବା ଯେ କୌଣସି ଦେଶର ଯେ କୌଣସି ସରକାରକୁ ଅଦାଲତ ଛାଡି ଦେବେନାହିଁ ବୋଲି ଆଜି ପାକିସ୍ତାନର ଅଦାଲତ ଦେଖେଇ ଦେଇଛନ୍ତି। ଦେଶର ଦୁଇଜଣ ଅତ୍ୟନ୍ତ ପ୍ରଭାବଶାଳୀ ରାଜନେତାଙ୍କୁ ଇତିମଧରେ ବଳିଷ୍ଠ ଦଣ୍ଡ ଦିଆ ହୋଇଛି। ପାକିସ୍ତାନ ଅଦାଲତର ଏହି କଠୋର ଆଭିମୁଖ୍ୟ କାରଣରୁ ଏବେ ସମ୍ବିଧାନ ସହ ଖେଳ ଖେଳିବାକୁ ପାକିସ୍ତାନର ରାଜନୈତିକ ଦଳ ଓ ସାମରିକ ବ୍ୟବସ୍ଥା ଭିତରେ ଭୂକମ୍ପ ସୃଷ୍ଟି ହୋଇଛି।