ପ୍ରୟାଗରାଜ : ସାରା ଦେଶରେ ନାଗରିକତା ଆଇନକୁ ନେଇ ବିରେଧ ପ୍ରଦର୍ଶନ ଲାଗି ରହିଛି । ଦିଲ୍ଲୀର ଶାହିନ୍ ବାଗ୍ଠାରେ ଗତ ଏକମାସ ଧରି ମୁସଲିମ୍ ମହିଳାମାନେ ଧାରଣାରେ ବସିଛନ୍ତି। କେବଳ ଦିଲ୍ଲୀ ନୁହେଁ ଦେଶର ଅନ୍ୟାନ୍ୟ ଅଞ୍ଚଳରେ ମଧ୍ୟ ଏହି ପ୍ରସଙ୍ଗକୁ ନେଇ ପ୍ରବଳ ବିରୋଧ ଜାରି ରହିଛି । ବିରୋଧୀ ଦଳ ଏହାକୁ ଫେରାଇବାକୁ ଦାବି କରିଥିବାବେଳେ ନିକଟରେ ଅମିତ୍ ଶାହା ଏକ ରାଲିରେ ସିଏଏକୁ କୌଣସି କାରଣରୁ ବି ଫେରାଇ ନିଆଯିବ ନାହିଁ ବୋଲି ସ୍ପଷ୍ଟ କରିଛନ୍ତି । ସିଏଏକୁ ନେଇ ସାରା ଦେଶବାସୀ ଚିନ୍ତିତ ରହିଥିବାବେଳେ ଏହାକୁ ନେଇ ବିରୋଧୀ ଅଭିନବ ପ୍ରଦର୍ଶନ ବେଶ୍ ଚର୍ଚ୍ଚାରେ ରହିଛି । ଉତ୍ତରପ୍ରଦେଶର ପ୍ରୟାଗରାଜଠାରେ ଜଣେ କଂଗ୍ରେସ ନେତା ସିଏଏକୁ ନେଇ ନିଆରା ଢଙ୍ଗରେ ବିରୋଧ କରିଛନ୍ତି । ସେ ତାଙ୍କ ପୂର୍ବଜଙ୍କ କବର ନିକଟରେ କାନ୍ଦି କାନ୍ଦି ଭାରତୀୟ ନାଗରିକ ହେବାର ପ୍ରମାଣ ମାଗିଛନ୍ତି ।
ମିଳିଥିବା ସୂଚନା ଅନୁସାରେ ପ୍ରୟାଗରାଜରେ କଂଗ୍ରେସ ନେତା ହସୀବ ଅହମ୍ମଦ ଅଭିନବ ଉପାୟରେ ସିଏଏକୁ ବିରୋଧ ପ୍ରଦର୍ଶନ କରିଛନ୍ତି। ଅହମ୍ମଦ ତାଙ୍କ ପୂର୍ବଜଙ୍କ କବରସ୍ଥଳରେ କାନ୍ଦି କାନ୍ଦି ଏପରି ନିଆରା ଢଙ୍ଗରେ ସିଏଏର ବିରୋଧ ପ୍ରଦର୍ଶନ କରିବା ସହିତ କହିଛନ୍ତି ଯେ, ଆମ ପାଖରେ କୌଣସି ପ୍ରମାଣପତ୍ର ନାହିଁ କିନ୍ତୁ ଆମେ ଭାରତରେ ପିଢି ପରେ ପିଢି ବସବାସ କରୁଛୁ। ଆମେ ଆମ ପୂର୍ବଜଙ୍କୁ ଭାରତର ନାଗରିକ ବୋଲି ପ୍ରମାଣ ଦେବା ପାଇଁ ନିବେଦନ କରୁଛୁ । ଆମେ ସରକାରଙ୍କୁ ଦାବି କରୁଛୁ ଯେ, ଯଦି ଆମକୁ ଶରଣାର୍ଥୀ କ୍ୟାମ୍ପ୍କୁ ପଠାଯିବ, ତେବେ ଆମର ପୂର୍ବଜଙ୍କ ଅବଶେଷଙ୍କୁ ମଧ୍ୟ ସେଠାକୁ ପଠାଯିବ ।
ସାରା ଦେଶରେ ଏନ୍ଆରସି ଓ ସିଏଏକୁ ନେଇ ବିରୋଧ ପ୍ରଦର୍ଶନ ଜାରି ରହିଛି। ଗୁରୁବାର ଦିନ ବାରଣାସୀଠାରେ କିଛି ମୁସଲମାନ ମହିଳା ବିରୋଧ ପ୍ରଦର୍ଶନ କରିଥିଲେ। ନିକଟରେ ଲକ୍ଷ୍ନୌଠାରେ ମଧ୍ୟ କିଛି ମୁସଲିମ୍ ମହିଳା ସିଏଏ ବିରୋଧରେ ଧାରଣାରେ ବସିଥିବାବେଳେ ପୁଲିସ୍ ଜବରଦସ୍ତି ତାଙ୍କୁ ଉଠାଇ ନେଇଥିଲା। (ଏଜେନ୍ସି)