କ୍ରିତି ସାନୋନ୍ ଓ କାର୍ତ୍ତିକ ଆାର୍ଯ୍ୟନ୍ଙ୍କ ଅଭିନୀତ ରୋମାଣ୍ଟିକ କମେଡ଼ି ‘ଲୁକାଛପି’ ଆଜି ପରଦା ଉପରକୁ ଆସୁଛି । ଲକ୍ଷ୍ମଣ ଉତେକର୍ଙ୍କ ନିର୍ଦ୍ଦେଶିତ ଏହି ଫିଲ୍ମକୁ ଦିନେଶ୍ ଭିଜନ୍ ପ୍ରଯୋଜିତ କରିଛନ୍ତି । ଫିଲ୍ମର କାହାଣୀ ଲେଖିଛନ୍ତି ରୋଶନ୍ ଶଙ୍କର । ଲିଭ୍-ଇନ୍-ରିଲେସନ୍ସିପ୍କୁ ନେଇ ପ୍ରସ୍ତୁତ ଏହି ଫିଲ୍ମଟିରେ କାର୍ତ୍ତିକ ଗୁଡୁ ଚରିତ୍ରରେ ନଜର ଆସୁଥିବାବେଳେ କ୍ରିତି ରଶ୍ମି ଚରିତ୍ରରେ ନଜର ଆସୁଛନ୍ତି । ଏହି ଫିଲ୍ମରେ କାର୍ତ୍ତିକ ଓ କ୍ରିତିଙ୍କ ବ୍ୟତୀତ ଅପାରଶକ୍ତି ଖୁରାନା, ପଙ୍କଜ ତ୍ରିପାଠୀ, ଅତୁଲ ଶ୍ରୀବାସ୍ତବ, ଅଲ୍କା ଅମିନ୍, ହିମାଂଶୁ କୋହଲି, ବିଶ୍ଵନାଥ ଚାଟ୍ଟାର୍ଜୀ, ନେହା ସରାଫ୍, ମାଷ୍ଟର ସାମର୍ଥ, ସପ୍ନା ସାଣ୍ଡ ପ୍ରମୁଖ ଅଭିନୟ କରୁଛନ୍ତି । ପୂର୍ବରୁ ଫିଲ୍ମର ଗୀତଗୁଡ଼ିକ ବହୁତ ଲୋକପ୍ରିୟତା ପାଇଥିବାବେଳେ ଏହାର ଟ୍ରେଲର୍କୁ ମଧ୍ୟ ବହୁତ ପସନ୍ଦ କରାଯାଇଥିଲା। ଏହି ଫିଲ୍ମକୁ ଟକ୍କର ଦେବ ସୁଶାନ୍ତ ସିଂହ ରାଜପୁତ ଓ ଭୂମି ପେଡେନକର୍ଙ୍କ ଅଭିନୀତ ’ସୋନ ଚିରିୟା’ । ଏହି ଫିଲ୍ମଟି ସତ୍ୟ ଘଟଣା ଉପରେ ଆଧାରିତ ହୋଇଥିବାବେଳେ ଏଥିରେ ଡାକୁ ଚରିତ୍ରରେ ନଜର ଆସିଛନ୍ତି ସୁଶାନ୍ତ । ଅଭିଶେଷ ଚୌବେଙ୍କ ନିର୍ଦ୍ଦେଶିତ ଏହି ଫିଲ୍ମରେ ମନୋଜ ବାଜପେୟୀ, ଆଶୁତୋଷ ରାଣା, ରଣବୀର୍ ଶୋରେ ପ୍ରମୁଖ ଅଭିନୟ କରିଛନ୍ତି । ଚମ୍ବଲ୍ ଡାକୁଙ୍କ କାହାଣୀକୁ ନେଇ ପ୍ରସ୍ତୁତ ଏହି ଫିଲ୍ମରେ ଦମଦାର୍ ଡାଇଲଗ୍ ଦର୍ଶକଙ୍କୁ ବହୁତ ପସନ୍ଦ ଆସିଛି । ତେବେ ପରଦାରେ ସୁଶାନ୍ତଙ୍କ ସହ ଟକ୍କର ଦେଉଛନ୍ତି ତାଙ୍କର ଏକ୍ସ ଗାର୍ଲଫ୍ରେଣ୍ଡ୍ କ୍ରିତି ସାନୋନ୍ । ଦୁହେଁ ’ରାବ୍ତା’ ଫିଲ୍ମରେ କାମ କରିବା ପରଠାରୁ ସମ୍ପର୍କକୁ ନେଇ ବେଶ୍ ଚର୍ଚ୍ଚାରେ ରହିଥିଲେ ।
