ସୁନ୍ଦରଗଡ, ନିକଟରେ କର୍ଣ୍ଣାଟକର ପୂର୍ବତ୍ତନ ମୁଖ୍ୟମନ୍ତ୍ରୀ କୁମାରସ୍ବାମୀଙ୍କ ପୁଅ ବାହାଘର ନେଇ ସାରା ଦେଶରେ ସମାଲୋଚନା କରାଯାଉଛି। ବର୍ତ୍ତମାନ ପରିସ୍ଥିତିରେ ସବୁ ଉତ୍ସବ ବାତିଲ କରାଯାଇଥିଲେ ମଧ୍ୟ କୁମାରସ୍ବାମୀ କିପରି ବାହାଘର କଲେ ତାହାକୁ ନେଇ ଉଠିଛି ପ୍ରଶ୍ନ। କରୋନା ସଂକ୍ରାମଣରୁ ରୋକିବା ପାଇଁ ସାମାଜିକ ଦୂରତାକୁ ଗୁରୁତ୍ବ ଦିଆଯାଉଛି। ଏହାକୁ ଯେ କେହି ଭାଙ୍ଗିଲେ ତାଙ୍କ ବିରୋଧରେ କାର୍ଯ୍ୟାନୁଷ୍ଠାନ ନେବାରେ ମଧ୍ୟ ନିୟମ ରହିଛି। ହେଲେ ସେହି ନିୟମକୁ ଫୁ କରି ଏହି ବଡଘରିଆ ଲୋକେ ନିଜ ପୁଅ ବାହାଘର କରିଦେଲେ।
ହେଲେ ଏପରି ପରିସ୍ଥିତିରେ ଓଡିଶାର ଜଣେ ସାଧାରଣ ମହିଳା ହୋମଗାର୍ଡ ନିଜର କର୍ତ୍ତବ୍ୟ କଣ ତାହା ପ୍ରମାଣିତ କରି ଦେଖାଇ ଦେଇଛନ୍ତି। ସେ କରୋନା ଯୋଦ୍ଧା ବନିବା ପାଇଁ ନିଜ ବାହାଘରକୁ ଘୁଞ୍ଚାଇ ଦେଇଛନ୍ତି। କର୍ତ୍ତବ୍ୟ ଆଗ, ପଛେ ବାହାଘର ବୋଲି ଚିନ୍ତା କରି ସେ ଏପରି ବଡ ନିଷ୍ପତି ନେଇଛନ୍ତି। ସେହି ମହିଳା ଜଣକ ହେଲେ ସୁନ୍ଦରଗଡ ଜିଲ୍ଲା ପୋଲିସର ହୋମଗାର୍ଡ ତିଳୋତମା ମେହେର।
ତିଳୋତମାଙ୍କ ବାହାଘର ବହୁ ପୂର୍ବରୁ ଏପ୍ରିଲ 12 ତାରିଖରେ ହେବ ବୋଲି ସ୍ଥିର କରାଯାଇଥିଲା। ସେଥିପାଇଁ ସବୁ ପ୍ରକାରର ପ୍ରସ୍ତୁତି ମଧ୍ୟ ଶେଷ ହୋଇଥିଲା। ହେଲେ ରାଜ୍ୟରେ କରୋନା ସଂକ୍ରାମଣ ଏବଂ ଲକଡାଉନ ଘୋଷଣା ହେବା ପରେ ସେ ନିଜ ତରଫରୁ ବାହାଘରକୁ ଘୁଞ୍ଚାଇବାକୁ ନିଷ୍ପତି ନେଲେ। ତିଳୋତମା ଏ କଥା ନିଜ ପରିବାର ବର୍ଗକୁ ରୋକଠୋକ ଭାବେ ଜଣାଇ ଦେଲେ। ଫଳରେ ତାଙ୍କ ପରିବାର ଉପାୟଶୂନ୍ୟ ହୋଇ ଏଥିରେ ରାଜି ହେଲେ। ଏପରିକି ତିଳୋତମାଙ୍କ ନୂଆ ଶାଶୁଘର ପରିବାର ମଧ୍ୟ ତିଳୋତମାଙ୍କ ଏହି ନିଷ୍ପତିରେ ସମ୍ମତି ମଧ୍ୟ ଦେଲେ।
ପୋଲିସ ଡିଜିଙ୍କ ପ୍ରଶଂସା
ପୋଲିସ ଡିଜି ଅଭୟ ସୁନ୍ଦରଗଡ ଜିଲ୍ଲା ତଦାରଖରେ ଯିବା ବେଳେ ଏହି ହୋମଗାର୍ଡଙ୍କ ନିଷ୍ପତି ସଂପର୍କରେ ଅବଗତ ହେଲେ। ଏ କଥା ଜାଣିବା ପରେ ଡିଜି ତାଙ୍କୁ ଡିୟୁଟି କରୁଥିବା ସମୟରେ ହିଁ ପ୍ରଶଂସା କଲେ। ବର୍ତ୍ତମାନ ତିଳୋତମାଙ୍କ ଏପରି ପଦକ୍ଷେପକୁ ନେଇ ଜିଲ୍ଲା ପୋଲିସ ମହଲରେ ବେଶ ଚର୍ଚ୍ଚାର ବିଷୟ ପାଲଟିଛି। ଜଣେ ହୋମଗାର୍ଡ ନିଜର କର୍ତ୍ତବ୍ୟ କଣ ବୋଲି ଜାଣିପାରୁ ଥିବା ବେଳେ ଅନ୍ୟପଟେ ବଡବଡିଆମାନେ ନିୟମକୁ ଫୁ କରିବା ସମସ୍ତଙ୍କୁ ଆଶ୍ଚର୍ଯ୍ୟ କରିଛି।
