ହେମାଙ୍ଗ ପ୍ରସାଦ ରାଉଳ
ବ୍ରହ୍ମପୁର: କେନ୍ଦ୍ର ହେଉ କିମ୍ବା ରାଜ୍ୟ ସରକାର ଡ଼ାକ୍ତର, ସ୍ୱାସ୍ଥ୍ୟକର୍ମୀ, ଅଙ୍ଗନୱାଡ଼ି କର୍ମୀ, ଶିକ୍ଷକ, ପୋଲିସ୍ କର୍ମଚାରୀମାନଙ୍କୁ କରୋନା ଯୋଦ୍ଧା ଭାବେ ନାମିତ କରିଥିବାବେଳେ ବିଭିନ୍ନ ସ୍ଥାନରେ ତଳସ୍ତରର କରୋନା ଯୋଦ୍ଧାମାନେ ଲୋକଙ୍କ ଆକ୍ରୋଶର ଶିକାର ହେବା ଦେଖିବାକୁ ମିଳିଛି। ଏଭଳି ଏକ ଘଟଣା ଘଟିଛି ଗୋଳନ୍ଥରା ଥାନା ଅଂଚଳରେ। କରୋନା ପଜିଟିଭ୍ ଲୋକଙ୍କ ବାସଗୃହ ଆଗରେ ପୋଷ୍ଟର ମାରିବାରୁ ଆକ୍ରାନ୍ତଙ୍କ ପୁଅଙ୍କଠାରୁ ମାଡ଼ ଖାଇଛନ୍ତି ଅଙ୍ଗନୱାଡ଼ି କର୍ମୀ।
ଘଟଣାରୁ ପ୍ରକାଶ ଯେ କୁକୁଡ଼ାଖଣ୍ଡି ସମନ୍ୱିତ ଶିଶୁବିକାଶ ଯୋଜନା ଅଧିନସ୍ଥ ଜୁଗୁଡ଼ି ଅଂଚଳ ଏକନମ୍ବର କେନ୍ଦ୍ରର ଅଙ୍ଗନୱାଡ଼ି କର୍ମୀ ବସନ୍ତୀ ରାଉଳ ଜନୈକ କରୋନା ପଜିଟିଭ୍ ମହିଳାଙ୍କ ଘର ଆଗରେ ପୋଷ୍ଟର ଟିଏ ମାରିବାକୁ ଯାଇଥିଲେ। ଏହି ସମୟରେ ଆକ୍ରାନ୍ତଙ୍କ ପୁଅ କୃଷ୍ଣ ଗୌଡ଼ ତାଙ୍କ ଘର ସାମ୍ନାରେ କାହିଁକି ପୋଷ୍ଟର ମାରୁଛ କହି ଅସଭ୍ୟ ଭାଷାରେ ଗାଳିଗୁଲଜ କରିଥିଲେ। ବିଚ ରାସ୍ତାରେ ଅଙ୍ଗନୱାଡ଼ି କର୍ମୀଙ୍କ ଚୁଟି ଘୋଷାଡ଼ି ନିସ୍ତୁକ ମାଡ଼ ମାରିଥିଲେ। ଏନେଇ ଅଙ୍ଗନୱାଡ଼ି କର୍ମୀ ବାସନ୍ତୀ ରାଉଳ ଗୋଳନ୍ଥରା ଥାନାରେ ଅଭିଯୋଗ କରିଥିଲେ। ଗୋଳନ୍ଥରା ପୋଲିସ୍ ଥାନା କେସ ୨୩୬/୨୦ରେ ମାମଲା ରୁଜୁ କରି ଘଟଣାର ଅନୁସନ୍ଧାନ କରିବା ସହ ଅଭିଯୁକ୍ତ କୃଷ୍ଣ ଗୌଡ଼କୁ ଥାନାରେ ଅଟକ ରଖିଥିବା ଥାନାଧିକାରୀ ବାବୁଲି ନାୟକ ସୂଚନା ଦେଇଛନ୍ତି। ତେବେ ଅଙ୍ଗନୱାଡ଼ି କର୍ମୀ ଜଣକ ତାଙ୍କର କର୍ତ୍ତବ୍ୟ କରୁଥିଲେ। ସରକାର, ଉପରିସ୍ଥ ଅଧିକାରୀଙ୍କ ନିର୍ଦ୍ଦେଶକୁ ସେ ପାଳନ କରୁଥିଲେ। ତେଣୁ ସଭ୍ୟ ସମାଜରେ ଏଭଳି ଘଟଣାକୁ ସାଧାରଣରେ ନିନ୍ଦା କରାଯାଇଛି।
