ସୀତାରାମ ଅଗ୍ରଓ୍ବାଲ
ବାଣପୁର: କରୋନା ମହାମାରୀ ବର୍ତ୍ତମାନ ଖୋର୍ଦ୍ଧା ଜିଲ୍ଲା ଚିଲିକା ନିର୍ବାଚନମଣ୍ଡଳୀରେ ତାଣ୍ଡବ ମଚାଉଛି। ସାଧାରଣ ଜନତାଙ୍କ ଠୁ ନେଇ କରୋନା ଯୋଦ୍ଧା ସମସ୍ତେ ଦିନକୁ ଦିନ କରୋନାରେ ଆକ୍ରାନ୍ତ ହେଉଛନ୍ତି। ବିଶେଷ କରି ବାଣପୁର ବ୍ଲକ ଏବଂ ଏନ.ଏ.ସି ଅଞ୍ଚଳରେ ଏହା ଏବେ ପିକ୍ରେ ଅଛି। ଆଜି ବାଣପୁର ଗୋଷ୍ଠୀ ସ୍ୱାସ୍ଥ୍ୟ କେନ୍ଦ୍ରର ପାଖାପାଖି ୧୨ରୁ ଉର୍ଦ୍ଧ୍ବ ସ୍ୱାସ୍ଥ୍ୟ କର୍ମଚାରୀ ତଥା କରୋନା ଯୋଦ୍ଧାମାନେ କରୋନା ପଜିଟିଭ ଚି଼ହ୍ନଟ ହୋଇଛନ୍ତି। ଯାହାଫଳରେ ମେଡିକାଲ ପ୍ରଶାସନ ତରଫରୁ ବାଣପୁର ଗୋଷ୍ଠୀ ସ୍ୱାସ୍ଥ୍ୟ କେନ୍ଦ୍ରକୁ ସାତ ଦିନ ଯାଏଁ ସଟ ଡ଼ାଉନ କରାଯାଇଅଛି।
ଉକ୍ତ ସାତ ଦିନ ଯାଏଁ ବାଣପୁର ଗୋଷ୍ଠୀ ସ୍ୱାସ୍ଥ୍ୟ କେନ୍ଦ୍ରର ଓ.ପି.ଡ଼ି ଏବଂ ଆଇ.ପି.ଡ଼ି ସମ୍ପୂର୍ଣ୍ଣ ବନ୍ଦ ରହିବ। କେବଳ ଜରୁରୀକାଳୀନ ସେବା ଚାଲୁ ରହିବ। ଉକ୍ତ ସାତ ଦିନ ଭିତରେ ମେଡିକାଲ କ୍ୟାମ୍ପସ ବିଶୋଧନ କରାଯିବା ସହ ଆକ୍ରାନ୍ତଙ୍କ କଣ୍ଟାକ୍ଟ ଟ୍ରେସିଂ କରାଯିବ ଏବଂ ସ୍ୱାବ ସଂଗ୍ରହ କରାଯିବ। ଏହି ସମୟରେ ଜନସାଧାରଣମାନେ ଟେଲି ମେଡ଼ିସିନର ଲାଭ ଉଠାଇବା ପାଇଁ ମେଡିକାଲ ଅଧିକାରୀ ଡ଼ା. ଧୂର୍ଜଟି ପ୍ରସାଦ ମହାପାତ୍ର ଜନସାଧାରଣଙ୍କୁ ଅନୁରୋଧ କରିଛନ୍ତି।
