ହେମାଙ୍ଗ ପ୍ରସାଦ ରାଉଳ
ବ୍ରହ୍ମପୁର: ସାରା ଭାରତବର୍ଷରେ କେନ୍ଦ୍ର ସରକାରଙ୍କ ଆୟୁଷ ମନ୍ତ୍ରଣାଳୟ ଏକ ନୂଆ ଆଶା ଓ ସମ୍ଭାବନା ଭାବରେ ଆୟୁର୍ବେଦ ସ୍ନାତକୋତ୍ତର ଡ଼ିଗ୍ରୀ ପ୍ରାପ୍ତ ଆୟୁର୍ବେଦ ଆୟୁଷ ଡ଼ାକ୍ତରଙ୍କୁ ଶଲ୍ୟ ଚିକିତ୍ସାରେ ଗୁରୁତ୍ୱ ଦେବାକୁ ନିଷ୍ପତ୍ତି ନେଇଛନ୍ତି। ଏହାକୁ ସ୍ୱାଗତ କରିବା ବଦଳରେ ଆଜି ଏଲୋପାଥ୍ୟାକି ଡ଼ାକ୍ତରମାନେ ବିରୋଧକୁ ନେଇ ତୀବ୍ର ପ୍ରତିକ୍ରିୟା ମଧ୍ୟ ପ୍ରକାଶ ପାଇଛି।
ଏଲୋପ୍ୟାଥିକ ଡ଼ାକ୍ତରମାନେ ଆୟୁର୍ବେଦ ଡ଼ାକ୍ତରଙ୍କ ଶଲ୍ୟ ଚିକିତ୍ସାକୁ ବିରୋଧ କରିବା ଏକ ପ୍ରକାର ଅସୁସ୍ଥ ପରମ୍ପରାଂକୁ ମୂଳଦୂଆ ପକାଇଛି ବୋଲି ଆୟୁଷ ଡ଼ାକ୍ତରମାନେ କ୍ଷୋଭ ପ୍ରକାଶ କରିଛନ୍ତି। ଆୟୁର୍ବେଦ ଚିକିତ୍ସା ଦୁଇହଜାର ବର୍ଷ ତଳର ତଥାପି ଏଇ ଚିକିତ୍ସା ବିଜ୍ଞାନକୁ ଆଦରି ନେଇ ଜୀବିକା ଉପାର୍ଜନର କ୍ୟାରିୟର କରି ଏହାର ଗୁରୁତ୍ୱପୂର୍ଣ୍ଣ ବିଷୟକୁ ସ୍ୱାସ୍ଥ୍ୟସେବାରେ ଯୋଡ଼ିବା ସମୟରେ ଏଲୋପ୍ୟାଥିକ ଡ଼ାକ୍ତର ମାନଙ୍କ ବିରୋଧରେ ଆମେ କେବେ କୌଣସି କଟାକ୍ଷ କରି କହିନାହୁଁ।
ଆଜି ଆଧୁନିକ ଚିକିତ୍ସା ବିଜ୍ଞାନ ଦ୍ରୁତପ୍ରଗତି କରିଛି ସତ କିନ୍ତୁ ଶଲ୍ୟ ଶାସ୍ତ୍ରର ମୁଖ୍ୟ ପ୍ରଣେତା ହେଉଛନ୍ତି ମହର୍ଷି ସୁଶ୍ରୁତ। ତାଙ୍କର ଜ୍ଞାନର ମୌଳିକ ସତ୍ତାକୁ ହିଁ ଆଧୁନିକ ଚିକିତ୍ସା ବିଜ୍ଞାନ ଆଧାର ଭାବରେ ନେଇ ପରବର୍ତ୍ତୀ ବିଜ୍ଞାନ ଆଜି ଆଗେଇ ଆସିଛି। ଆୟୁର୍ବେଦ ଡ଼ାକ୍ତରଙ୍କୁ ଉପଯୁକ୍ତ ପ୍ରଶିକ୍ଷଣ ଓ ତାଲିମ ଦିଆଯାଇ ଶଲ୍ୟ ସ୍ନାତକୋତ୍ତର ଡ଼ିଗ୍ରୀ ଲାଭପରେ ଚିକିତ୍ସା କରିବାକୁ ଆୟୁଷ ମନ୍ତ୍ରଣାଳୟର ନିଷ୍ପତ୍ତି ଭାରତ ଚିକିତ୍ସା ବିଜ୍ଞାନ ପାଇଁ ଆଶୀର୍ବାଦ।
ଏହାକୁ ଠିକ୍ ଭାବରେ ଅନୁଶୀଳନ ନକରି ଏଲୋପ୍ୟାଥିକ ଡ଼ାକ୍ତରମାନେ ଆମର ଆୟୁର୍ବେଦ ଡ଼ାକ୍ତରଙ୍କ ଶଲ୍ୟ ଚିକିତ୍ସା ସେବାକୁ ବିରୋଧ ଦୁର୍ଭାଗ୍ୟଜନକ ଏବଂ ହାସ୍ୟାସ୍ପଦ। ସୁନାମ ଥିବା ଆୟୁର୍ବେଦ କଂପାନୀର ଔଷଧକୁ ଏଲୋପାଥିକ ଡ଼ାକ୍ତରମାନେ ଦିଅନ୍ତି ଏବଂ ବହୁ ବଡ଼ବଡ଼ ବିଳାସପୂର୍ଣ୍ଣ ହୋଟେଲ୍ରେ ଏଲୋପାଥିକ ଡ଼ାକ୍ତର ମାନେ ଆୟେୁର୍ବେଦ ପ୍ରଶସ୍ତି ପାଠ କରି ଆୟୁର୍ବେଦ କଂପାନୀ ମାନଙ୍କୁ ଉତ୍ସାହିତ କରି ଆସୁଥିବାବେଳେ ଆୟୁର୍ବେଦ ଡ଼ାକ୍ତରଙ୍କ ଶଲ୍ୟ ଚିକିତ୍ସାକୁ ବିରୋଧ ଏକ ପ୍ରକାର ଅବିବେକର କାମ।
ଯେଉଁଠାରେ ଭାରତର ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ମଧ୍ୟ ଆୟୁର୍ବେଦର ଚିକିତ୍ସାଙ୍କୁ ଉତ୍ତମ ଭାବି ଆୟୁର୍ବେଦ ଚିକିତ୍ସାର ଉନ୍ନତି ପାଇଁ ଦୁଇଦୁଇଟି ଆୟୁର୍ବେଦ କଲେଜ ଖୋଲିବା ନିଷ୍ପତ୍ତି ନେଇଛନ୍ତି ସେଠାରେ ଏଲୋପାଥିକ ଡ଼ାକ୍ତର ଏବଂ ତଥାକଥିତ ସମାଜସେବୀଙ୍କ ଏଭଳି ମନ୍ତବ୍ୟ ଦୁର୍ଭାଗ୍ୟଜନକ। ଡ଼ାକ୍ତର ଅଭାବ ହେତୁ ଗ୍ରାମାଞ୍ଚଳରେ ଆୟୁଷ ଡ଼ାକ୍ତରମାନେ କମ୍ ଦରମା ନେଇ ସ୍ୱାସ୍ଥ୍ୟ ସେବା ଦିଅନ୍ତି। କୋଭିଡ଼୍ ସମୟରେ ସରକାର ମଧ୍ୟ ଆୟୁଷ ଡ଼ାକ୍ତରଙ୍କ ଭରଷାରେ ଆଜି କୋଭିଡ଼୍ରୁ ବିଜୟୀ ଲାଭ କରିଛନ୍ତି। ଯେତେବେଳେ ଏଲୋପାଥିକ ଡ଼ାକ୍ତରମାନେ ମେଡ଼ିକାଲ୍ରେ ଚିକିତ୍ସା କରୁଥିଲେ ସେତେବେଳେ ଆୟୁଷ ଡ଼ାକ୍ତରମାନେ ଘର ଘର ଦ୍ୱାର ଦ୍ୱାର, ସାହି ସାହି, ଗ୍ରାମ ଗ୍ରାମ ବୁଲି ଲକ୍ଷଣଥିବା ରୋଗୀଙ୍କୁ ଚିହ୍ନଟ କରି ଚିକିତ୍ସା ସେବା ଯୋଗାଇ ଦେଇଥିଲେ।
କୋଭିଡ଼୍ ସେବାରେ ଆୟୁର୍ବେଦ ଡ଼ାକ୍ତରଙ୍କ ସେବା ଏଲୋପାଥିକ ଡ଼ାକ୍ତର ସେବାଠାରୁ କୌଣସି ଗୁଣରେ କମ୍ ନୁହନ୍ତି। ଏହିମାନଙ୍କ ଦ୍ୱାରା ହିଁ ଭାରତରେ କୋଭିଡ଼୍ ସ୍ଥିତି ଆୟତ୍ତକୁ ଆସିଛି। ତେବେ ଲକ୍ଷ ଲକ୍ଷ ଟଙ୍କା ଦରମା ପାଉଥିବା ସହ ବିଭିନ୍ନ ଉପାୟରେ ରୋଗୀଙ୍କୁ ସ୍ୱାସ୍ଥ୍ୟସେବା ନାମରେ ଲୁଟୁଥିବା କିଛି ଅସାଧୁ ଡ଼ାକ୍ତରଙ୍କ ବିରୋଧରେ ଏ ସମାଜ କିମ୍ବା କୌଣସି ଆୟୁଷ ଡ଼ାକ୍ତର ପ୍ରଶ୍ନ ଉଠାଇନାହାନ୍ତି। ଆଜି ଆୟୁର୍ବେଦ ଡ଼ାକ୍ତରମାନେ ଯଦି ମୁହଁ ଖୋଲିବେ ଏବଂ ଏଲୋପାଥିକ ଡ଼ାକ୍ତରୀ ଚିକିତ୍ସା ଭିତରେ ରୋଗୀ ଶୋଷଣ ସଂପର୍କରେ ରହସ୍ୟ ଖୋଲିବେ ଏହା ସେମାନଙ୍କ ହଜମ ମଧ୍ୟ ହେବନି।
ଆୟୁର୍ବେଦ ଚିକିତ୍ସାକୁ ଉନ୍ନତ ଦିଗରେ ନେବାରେ ଆୟୁଷ ମନ୍ତ୍ରଣାଳୟ ନିଷ୍ପତ୍ତିକୁ ଆଜି ହଜମ କରିପାରୁନଥିବା ଏଲୋପାଥିକ ଡ଼ାକ୍ତରମାନେ ପ୍ରଥମେ ନିଜର ଚିକିତ୍ସା ବିଜ୍ଞାନ ଭିତରେ ନିଜ ଜ୍ଞାନକୁ ସୀମିତ ରଖନ୍ତୁ। ଅନ୍ୟର ଜ୍ଞାନ, ଅନ୍ୟର ଚିକିତ୍ସାକୁ କଟାକ୍ଷ କରି ଅପମାନିତ କରିବାର ଏମାନଙ୍କୁ ଅଧିକାର ଦେଲା କିଏ ବୋଲି ଗଂଜାମ ଜିଲ୍ଲା ତଥା ବ୍ରହ୍ମପୁର ଅଂଚଳର ବହୁ ବରିଷ୍ଠ ଆୟୁଷ ଡ଼ାକ୍ତର ପ୍ରଶ୍ନ ଉଠାଇଛନ୍ତି। ଆୟୁର୍ବେଦ ଡ଼ାକ୍ତରଙ୍କୁ ଶଲ୍ୟ ଚିକିତ୍ସା ପାଇଁ ବିରୋଧ ସୁଶ୍ରୁତଙ୍କ ପ୍ରତି ଅପମାନ ବୋଲି ସେ କହିଛନ୍ତି।
