ହାଇଦ୍ରାବାଦ : ସାମାନ୍ୟ କ୍ରିକେଟ ଖେଳକୁ ନେଇ ଗୁଳିମାଡ କାରଣରୁ ଜଣେ ଏଆଇଏମଆଇଏମ ସଦସ୍ୟଙ୍କୁ ପୋଲିସ ଗିରଫ କରିଛି । କ୍ରିକେଟ ଖେଳକୁ ନେଇ ଦୁଇ ପକ୍ଷଙ୍କ ମଧ୍ୟରେ ଝଗଡା ହୋଇଥିବା ବେଳେ ଏଆଇଏମଆଇଏମ ଆଦିଲାବାଦ ଜିଲ୍ଲା ସଭାପତି ଏମଡି ଫାରୁକ ଅହମଦଙ୍କୁ ପୋଲିସ ଗିରଫ କରିଛି । ଫାରୁକ ନିଜ ଲାଇସେନ୍ସପ୍ରାପ୍ତ ବନ୍ଧୁକରୁ ଗୁଳି ଚଳାଇ ଦୁଇ ଜଣଙ୍କୁ ଆହତ କରିବା ସହିତ ଛୁରୀରେ ମଧ୍ୟ ଆକ୍ରମଣ କରିଥିଲେ ।
ଆଦିଲାବାଦର ତାତିଗୁଡାରେ ଏହି ଘଟଣା ଘଟିଥିଲା । ଶୁକ୍ରବାର ଅପରାହ୍ନ 5ଟାରେ କ୍ରିକେଟ ଖେଳ ସମୟରେ ଏହି ଅଘଟଣ ଘଟିଥିଲା । ଦୁଇ ସ୍ଥାନୀୟ ଗୋଷ୍ଠୀ ମଧ୍ୟରେ ଘଟିଥିବା ସଂଘର୍ଷ ପରେ ଫାରୁକ ନିଜ ବନ୍ଧୁକରୁ ଗୁଳି ଚଳାଇଥିଲେ । ପୋଲିସ ପକ୍ଷରୁ ମିଳିଥିବା ସୂଚନା ଅନୁଯାୟୀ ସୈଦ ଜମୀରଙ୍କ ଶରୀରରେ ଦୁଇଟି ଗୁଳି ବାଜିଥିବା ବେଳେ ସୈଦ ମୌତେସିନଙ୍କ ଶରୀରରେ ଗୋଟିଏ ଗୁଳି ବାଜିଥିଲା । ଅନ୍ୟ ଜଣେ ଆହତ ସୈଦ ମନ୍ନନଙ୍କ ମୁଣ୍ଡରେ ଆଘାତ ଲାଗିଥିଲା ।
ଆହତ ମାନଙ୍କୁ ପ୍ରଥମେ ଆଦିଲାବାଦ ସ୍ଥିତ ରିମସରେ ଭର୍ତ୍ତି କରାଯାଇଥିବା ବେଳେ ପରବର୍ତ୍ତୀ ସମୟରେ ହାଇଦ୍ରାବାଦ ସ୍ଥାନାନ୍ତର କରାଯାଇଥିବା ନେଇ ଏସପି ବିଷ୍ଣୁ ୱାରିୟର ସୂଚନା ଦେଇଛନ୍ତି । ଏହି ଘଟଣା ପରେ ସମସ୍ତ ରାଜନୈତିକ ଦଳ ଶାନ୍ତି ବଜାୟ ରଖିବା ପାଇଁ ୱାରିୟର ପରାମର୍ଶ ଦେଇଛନ୍ତି । ଅଭିଯୁକ୍ତଙ୍କ ବିରୋଧରେ ଧାରା 307, 324 ଏବଂ 506 ଆଧାରରେ ମାମଲା ରୁଜୁ କରାଯାଇ ଗିରଫ କରାଯାଇଛି ।