ସୀତାରାମ ଅଗ୍ରୱାଲ
ବାଣପୁର: ଖୋର୍ଦ୍ଧା ଜିଲ୍ଲା ବାଣପୁର ଥାନା ଅନ୍ତର୍ଗତ ଅନ୍ତରକିଆରୀ ଛକରେ ଦୁଇ ଜଣ ବ୍ୟକ୍ତିଙ୍କୁ ମାରଣାସ୍ତ୍ରରେ ଆକ୍ରମଣ ହୋଇଥିବା ଅଭିଯୋଗ ହୋଇଛି। ଏହି ଆକ୍ରମଣରେ ଦୁଇ ଜଣଙ୍କ ଅବସ୍ଥା ଏବେ ସଙ୍କଟାପନ୍ନ ଅଛି।
ସୂଚନା ମୁତାବକ ଗତକାଲି ରାତି ପାଖାପାଖି ୧୦.୩୦ ସମୟରେ ବାଣପୁର ଅନ୍ତରକିଆରୀ ଛକରେ ରହୁଥିବା ଶରତ ବଳିୟାରସିଂ ନିଜ ଘରେ ଖାଇବସିଥିବାବେଳେ ତାଙ୍କୁ ଏକ ଅଜଣା ନମ୍ବରରୁ ଘରୁ ବାହାରକୁ ଆସିବାପାଇଁ ଫୋନ ଆସିଥିଲା। ଶରତ ବାହାରକୁ ଆସିଲାପରେ ପୂର୍ବରୁ ଛପିକି ରହିଥିବା ୮ ରୁ ୧୦ ଜଣ ଦୁର୍ବୃତ୍ତ ତାଙ୍କୁ ଖଣ୍ଡା ଏବଂ ଅନ୍ୟାନ୍ୟ ମାରଣାସ୍ତ୍ର ଦ୍ୱାରା ସଂଘବଦ୍ଧ ଭାବେ ଅତର୍କିତ ଆକ୍ରମଣ କରିଥିଲେ। ତାଙ୍କ ମୁଣ୍ଡ, ପିଠି ଏବଂ ଗୋଡ଼କୁ ଖଣ୍ଡାରେ ଚୋଟ ପକାଇଥିଲେ। ଏହା ଦେଖି ଶରତଙ୍କ ପରିବାରବର୍ଗ ଦୁର୍ବୃତ୍ତଙ୍କ କବଳରୁ ଛଡାଇବାକୁ ଚେଷ୍ଟା କରୁଥୁବାବେଳେ ସେମାନଙ୍କୁ ମଧ୍ୟ ଆକ୍ରମଣ କରିଥିଲେ।
ଶରତଙ୍କ ପରିବାରବର୍ଗଙ୍କ ନିବେଦନକ୍ରମେ ପରବର୍ତ୍ତୀ ସମୟରେ ଅନ୍ତରକିଆରୀ ଗ୍ରାମର ମିଟୁ ଦାସ ସହଯୋଗ ଉଦ୍ଦେଶ୍ୟରେ ସଙ୍ଗେ ସଙ୍ଗେ ଘଟଣା ସ୍ଥଳରେ ପହଁଚି ଶରତଙ୍କୁ ଚିକିତ୍ସା ପାଇଁ ବାଣପୁର ମେଡ଼ିକାଲକୁ ନେବାପାଇଁ ଉଦ୍ୟତ ହେଉଥିବାସ୍ଥଳେ ଦୁର୍ବୁତ୍ତ ମାନେ ତାଙ୍କୁ ମଧ୍ୟ ବିଭତ୍ସ ଭାବେ ମାରଣାସ୍ତ୍ରରେ ଆକ୍ରମଣ କରିଥିଲେ। ଯାହାଦ୍ୱାରା ମିଟୁଙ୍କ ମୁଣ୍ଡ, କାନ ଏବଂ ମୁହଁରେ ଗଭୀର ଆଘାତ ଲାଗିଛି। ସଙ୍ଗେ ସଙ୍ଗେ ଉଭୟଙ୍କୁ ଗ୍ରାମବାସୀ ମାନେ ଗୁରୁତର ଅବସ୍ଥାରେ ବାଣପୁର ଗୋଷ୍ଠୀ ସ୍ୱାସ୍ଥ୍ୟ କେନ୍ଦ୍ରରେ ଭର୍ତ୍ତି କରିଥିବାବେଳେ ଉଭୟଙ୍କ ଅବସ୍ଥା ବର୍ତ୍ତମାନ ସଙ୍କଟାପନ୍ନ ରହିଛି। ଅପରପକ୍ଷେ ଖବର ପାଇ ବାଣପୁର ଥାନା ଆଇଆଇସି ସଞ୍ଜୟ କୁମାର ପଟ୍ଟନାୟକ ସଦଳବଳେ ଘଟଣାସ୍ଥଳରେ ପହଁଚି ତଦନ୍ତ ଜାରି ରଖିଛନ୍ତି।
ତେବେ ପୋଲିସ ବର୍ତ୍ତମାନ ସୁଦ୍ଧା ଏ ସଂକ୍ରାନ୍ତରେ ତିନି ଜଣଙ୍କୁ ଥାନାରେ ଅଟକ ରଖି ପଚରାଉଚୁରା କରୁଥିବା ବେଳେ ଜମିଜମା ବିବାଦକୁ ନେଇ ଏପରି ଘଟଣା ଘଟିଛି ବୋଲି ପ୍ରାଥମିକ ତଦନ୍ତରୁ ଜଣାପଡିଛି।
