ଭୁବନେଶ୍ୱର: ବିଏମସି କମିଶନର ପ୍ରେମ ଚନ୍ଦ୍ର ଚୋୖଧୁରୀ ଆଜି ବିଏମସି ଦକ୍ଷିଣ ପୂର୍ବ ମଣ୍ଡଳର ୩୬ ନମ୍ବର ୱାର୍ଡ ଅନ୍ତର୍ଗତ ମଧୁସୂଦନ ନଗର, ଏଜି କଲୋନୀ, ୟୁନିଟ ୪ ହାଟ ଓ ଏମଏଲଏ କଲୋନି ଅଂଚଳ ପରିଦର୍ଶନ କରିଥିଲେ। ଏହି ଗସ୍ତ ସମୟରେ ଶ୍ରୀ ଚୋୖଧୁରୀ ୱାର୍ଡର ସମସ୍ତ ଉନ୍ନୟନମୂଳକ କାର୍ଯ୍ୟର ସମୀକ୍ଷା କରିବା ସହ ଏହି ଅଂଚଳର ନାଗରିକଙ୍କ ସମସ୍ୟା ପରିପ୍ରେକ୍ଷୀରେ ଵିସ୍ତୃତ ଆଲୋଚନା କରିଥିଲେ। ୱାର୍ଡର ସମସ୍ତ ସମସ୍ୟାକୁ ସେ ବୁଝିଥିଲେ ଏବଂ ଏହାର ଆଶୁ ସମାଧାନ ନିମନ୍ତେ ବିଏମସି ତରଫରୁ ସମସ୍ତ ପଦକ୍ଷେପ ଗ୍ରହଣ କରାଯିବ ବୋଲି ପ୍ରତିଶ୍ରୁତି ଦେଇଥିଲେ।
ଆଜିର ଏହି ପରିଦର୍ଶନ ବେଳେ ଶ୍ରୀ ଚୋୖଧୁରୀ ସର୍ବପ୍ରଥମେ ମଧୁସୂଦନ ନଗର ସ୍ଥିତ ବିବେକାନନ୍ଦ ବିଦ୍ୟାଳୟଠାରେ ପହଞ୍ଚିଥିଲେ। ଏଠାରେ ୩୬ ନମ୍ବର ୱାର୍ଡର ପୂର୍ବତନ କର୍ପୋରେଟର ନରେନ ସାହୁଙ୍କ ନେତୃତ୍ବରେ ୱାର୍ଡର ବରିଷ୍ଠ ନାଗରିକ, ମହିଳା ସ୍ବେଛାସେବୀ ଓ ନାଗରିକବୃନ୍ଦ ଶ୍ରୀ ଚୋୖଧୁରୀଙ୍କୁ ସ୍ୱାଗତ ଜଣାଇଥିଲେ। ଦୀର୍ଘ ଦିନ ଧରି ଅଂଚଳର ପ୍ରମୁଖ ସମସ୍ୟା ଯଥା ଭୂଗର୍ଭସ୍ଥ ପୟପ୍ରଣାଳୀ ଓ ବର୍ଷାଜଳ ନିଷ୍କାସନ ବିଷୟରେ ଅଞ୍ଚଳବାସୀ କମିଶନରଙ୍କୁ ଅବଗତ କରାଇଥିଲେ। ଏହି ସମସ୍ୟାର ଆଶୁ ସମାଧାନ ଦିଗରେ ନିକଟସ୍ଥ ବିଡ଼ିଏ ସିଟି ସେଣ୍ଟର ମଧ୍ୟରେ ଖୁବ ଶୀଘ୍ର ଜଳ ଓ ମଳ ନିଷ୍କାସନ ନିମନ୍ତେ କାର୍ଯ୍ୟାରମ୍ଭ ପାଇଁ ଉପସ୍ଥିତ ଯନ୍ତ୍ରୀଙ୍କୁ ଖସଡ଼ା ପ୍ରସ୍ତୁତି ପାଇଁ ନିର୍ଦେଶ ଦେଇଥିଲେ।
ଏହା ପରେ ଶ୍ରୀ ଚୋୖଧୁରୀ ସହରୀ ମଜୁରୀ ରୋଜଗାର ଯୋଜନା ଅନ୍ତର୍ଗତ ସମସ୍ତ କାର୍ଯ୍ୟର ସମୀକ୍ଷା ସହ ୟୁନିଟ ୪ ପାର୍କ ଠାରେ ପ୍ରାଚୀର ଚିତ୍ରାଙ୍କନ ଓ ଏଜି କଲୋନି ଠାରେ ନୂତନ ଭାବେ ନିର୍ମିତ କ୍ଷୁଦ୍ର କ୍ରିୟାନ୍ବୟନ କେନ୍ଦ୍ର ପରିଦର୍ଶନ କରିଥିଲେ। ରାଜଧାନୀର ଅନ୍ୟତମ ପ୍ରମୁଖ ହାଟ ୟୁନିଟ ୪ ହାଟର ଉନ୍ନତିକରଣ ନିମନ୍ତେ ବିସ୍ତୃତ ଯୋଜନା ବନାଇବା ସହ ଏବଂ ଏହାକୁ ଏକ ବିଶ୍ୱସ୍ତରୀୟ ପରିବା ଓ ଆମିଷ ହାଟରେ ରୂପାୟନ ନିମନ୍ତେ ବିଡିଏ ଓ ବିଏମସିର ଏକ ସ୍ୱତନ୍ତ୍ର ଟିମ ହାଟ ଅଂଚଳର ସର୍ବେକ୍ଷଣ କରିବେ ବୋଲି କହିଥିଲେ। ଏହା ସହ ହାଟର ପ୍ରବେଶପଥକୁ ସଙ୍କୁଚିତ କରିଥିବା କେତୋଟି ବେଆଇନ ଦୋକାନ ଗୁଡିକୁ ତୁରନ୍ତ ଉଚ୍ଛେଦ ପାଇଁ ନିର୍ଦେଶ ଦେଇଥିଲେ।
ଏହା ପରେ ଶ୍ରୀ ଚୌଧୁରୀ ଏମଏଲଏ କଲୋନୀ ସ୍ଥିତ ପ୍ୟାସନ କ୍ଲବ ଠାରେ ଗଣତନ୍ତ୍ର ଦିବସ ଉପଲକ୍ଷେ ଅନୁଷ୍ଠିତ ଏକ ବୃକ୍ଷରୋପଣ କାର୍ଯ୍ୟକ୍ରମରେ ଅଂଶଗ୍ରହଣ କରିଥିଲେ। ପ୍ୟାସନ କ୍ଲବ କ୍ରିକେଟ ପଡ଼ିଆର ଉନ୍ନତିକରଣ ଓ ଖେଳିବା ନିମନ୍ତେ ଉପଯୁକ୍ତ କିଟ ପ୍ରଦାନ ନିମନ୍ତେ ବିଏମସି ତରଫରୁ ଖୁବ ଶୀଘ୍ର କାର୍ଯ୍ୟ ଆରମ୍ଭ କରାଯିବ ବୋଲି ଶ୍ରୀ ଚୋୖଧୁରୀ କହିଥିଲେ। ବିଏମସି ଦକ୍ଷିଣ ପୂର୍ବ ମଣ୍ଡଳର ଉପ ଆୟୁକ୍ତ ଅଂଶୁମାନ ରଥ ସମସ୍ତ କାର୍ଯ୍ୟକ୍ରମର ପରିଚାଳନା କରିଥିଲେ।
ଆଜିର କାର୍ଯ୍ୟକ୍ରମରେ ଅନ୍ୟମାନଙ୍କ ମଧ୍ୟରେ ସହକାରୀ କମିଶନର ଲିଲନ ପ୍ରସାଦ ସାହୁ, ନିର୍ବାହୀ ଯନ୍ତ୍ରୀ ଅସୀମ ମିଶ୍ର, ନିର୍ବାହୀ ଯନ୍ତ୍ରୀ ଗୌତମ ଦାସ, ସହକାରୀ ଯନ୍ତ୍ରୀ ପ୍ରକାଶ ପ୍ରଧାନ, ପରିମଳ ବିଶେଷଜ୍ଞ ପବିତ୍ର ମୋହନ ପଣ୍ଡା, ୱାର୍ଡ ପର୍ଯ୍ୟବେକ୍ଷକ କ୍ଷେତ୍ରମୋହନ ଦାସ, ୱାର୍ଡ ଅଧିକାରୀ ମାନସ ମିଶ୍ର, ୱାର୍ଡ ଅଧିକାରୀ ପ୍ରଦୀପ ଡାକୁଆ ଓ ଶକ୍ତି ପ୍ରସାଦ ପଣ୍ଡା ପ୍ରମୁଖ ଉପସ୍ଥିତ ରହିଥିଲେ।
