ଏୟାର ଇଣ୍ଡିଆ ପକ୍ଷରୁ ପ୍ରଧାନମନ୍ତ୍ରୀ ନରେନ୍ଦ୍ର ମୋଦିଙ୍କ ବିମାନ ସେବାର ବିଲ୍ ପ୍ରଧାନମନ୍ତ୍ରୀଙ୍କ କାର୍ଯ୍ୟାଳୟକୁ ପଠାଇଛି। ଏହି ବିଲ୍ ଅନୁଯାୟୀ ବିଗତ ୫ ବର୍ଷ ମଧ୍ୟରେ ନିଜର ୪୪ଟି ବିଦେଶ ଗସ୍ତରେ ସମୁଦାୟ ୪୪୩.୪ କୋଟି ଟଙ୍କା ହୋଇଛି। ପୂର୍ବରୁ ପ୍ରଧାନମନ୍ତ୍ରୀ ରହିଥିବା ମନମୋହନ ସିଂ ନିଜର ଦ୍ବିତୀୟ ଥର ପ୍ରଧାନମନ୍ତ୍ରୀତ୍ବ କାଳରେ ୩୮ଥର ବିଦେଶ ଗସ୍ତରେ ଯାଇଥିବା ବେଳେ ସମୁଦାୟ ୪୯୩.୨୨ କୋଟି ଟଙ୍କା ଖର୍ଚ୍ଚ ହୋଇଥିଲା। ୨୦୧୪ ମେରୁ ଦାୟିତ୍ବ ଗ୍ରହଣ କରିଥିବା ମୋଦି ଅଧିକ ଦେଶ ଭ୍ରମଣ କରିଥିବା ବେଳେ ବିମାନ ଇନ୍ଧନର ମୂଲ୍ୟ ହ୍ରାସ ଏବଂ ଶସ୍ତା ବିମାନ ଯାତ୍ରା ଯୋଗୁଁ ସରକାରଙ୍କୁ ୫୦ କୋଟି କମ୍ ଖର୍ଚ୍ଚ କରିବାକୁ ପଡିଥିବା ପ୍ରଧାନମନ୍ତ୍ରୀଙ୍କ କାର୍ଯ୍ୟାଳୟ ପକ୍ଷରୁ ସୂଚନା ମିଳିଛି। ପ୍ରଧାନମନ୍ତ୍ରୀଙ୍କ ବାରମ୍ବାର ବିଦେଶ ଗସ୍ତକୁ ନେଇ ବିରୋଧୀ ଦଳ ଏବଂ ସାଧାରଣରେ ସମାଲୋଚନା କରାଯାଉଥିବା ବେଳେ ପ୍ରଧାନମନ୍ତ୍ରୀଙ୍କ ଗସ୍ତ ଯୋଗୁଁ ଭାରତକୁ କୂଟନୈତିକ ଏବଂ ରାଜନୈତିକ ଫାଇଦା ମିଳୁଛି ବୋଲି ପ୍ରଧାନମନ୍ତ୍ରୀଙ୍କ କାର୍ଯ୍ୟାଳୟ ପକ୍ଷରୁ ସୂଚନା ମିଳିଛି। ମୋଦିଙ୍କ ବିମାନ ଯାତ୍ରାରେ କମ୍ ଖର୍ଚ୍ଚ ନେଇ ଏୟାର ଇଣ୍ଡିଆ ପକ୍ଷରୁ କୁହାଯାଇଛି କି ମୋଦି ଏକ ସଙ୍ଗରେ ଏକାଧିକ ଦେଶ ଭ୍ରମଣ କରିଥାନ୍ତି ଯାହାକି କମ୍ ଖର୍ଚ୍ଚରେ ହୋଇଥାଏ। ଶ୍ରୀ ସିଂ ଥରକେ ଏକ କିମ୍ବା ଦୁଇ ଦେଶ ଭ୍ରମଣ କରୁଥିବା ବେଳେ ମୋଦି ଗୋଟିଏ ଥରରେ ୬ଟି ପର୍ଯ୍ୟନ୍ତ ଦେଶ ଭ୍ରମଣ କରିଥାନ୍ତି। ୪୪ଟି ମଧ୍ୟରୁ ୧୬ ଟି ଗସ୍ତରେ େମାଦି ଏକାଧିକ ରାଷ୍ଟ୍ର ଭ୍ରମଣ କରିଛନ୍ତି।
( ମୋବାଇଲରେ ଫଟାଫଟ ଖବର ଜାଣିବା ପାଇଁ ପ୍ଲେ ଷ୍ଟୋରରୁ ଡାଉନଲୋଡ କରନ୍ତୁ sankhipta, ଏହାପରେ ମୋବାଇଲ ସ୍କ୍ରିନର ତଳୁ ଉପରକୁ ଆଙ୍ଗୁଠିରେ ଘଷି ଖବର ପରେ ଖବର ପଢି ଚାଲନ୍ତୁ। )