ନୂଆଦିଲ୍ଲୀ: କରୋନା ସଂକ୍ରମଣ ଭିତରେ ବ୍ଲାକ ଫଙ୍ଗସ୍ ରୋଗ ଏବେ ଚିନ୍ତା ବଢାଇଦେଇଛି। ଦେଶର କେତୋଟି ରାଜ୍ୟରେ ଏହି ରୋଗରେ ସଂକ୍ରମିତଙ୍କ ସଂଖ୍ୟା ବଢିବାରେ ଲାଗିଛି।
କେବଳ ରାଜସ୍ଥାନରେ ୭୦୦ ଜଣ ବ୍ଲାକ ଫଙ୍ଗସ୍ ରୋଗୀ ଚିହ୍ନଟ ହୋଇଛନ୍ତି। ରାଜସ୍ଥାନର ଗୋଟିଏ ହସ୍ପିଟାଲରେ ଏବେ ୧୦୦ ଜଣ ବ୍ଲାକ ଫଙ୍ଗସ୍ ରୋଗୀଙ୍କୁ ଚିକିତ୍ସା କରାଯାଉଛି। ତେଣୁ ବ୍ଲାକ ଫଙ୍ଗସ୍ କୁ ରାଜସ୍ଥାନ ସରକାର ମହାମାରୀ ଭାବେ ଘୋଷଣା କରିଛି। ମୁଖ୍ୟମନ୍ତ୍ରୀ ଅଶୋକ ଗହଲୋତ ଏନେଇ ଜରୁରୀ ପଦକ୍ଷେପ ନେବା ପାଇଁ ଅଧିକାରୀମାନଙ୍କୁ ନିର୍ଦ୍ଦେଶ ଦେଇଛନ୍ତି।
ତେବେ ରାଜସ୍ଥାନ ବ୍ୟତୀତ ଦେଶର ଅନ୍ୟ ରାଜ୍ୟରେ ମଧ୍ୟ ଏହି ରୋଗରେ ଆକ୍ରାନ୍ତଙ୍କ ସଂଖ୍ୟା ବୃଦ୍ଧି ପାଉଛି। ବର୍ତ୍ତମାନ ମହାରାଷ୍ଟ୍ରରେ ୯୦ ଜଣ ବ୍ଲାକ ଫଙ୍ଗସ୍ ରୋଗୀ ଚିକିତ୍ସିତ ହେଉଥିବା ବେଳେ ଉତ୍ତରପ୍ରଦେଶ, ମଧ୍ୟପ୍ରଦେଶ, ଉତ୍ତରାଖଣ୍ଡ, ଦିଲ୍ଲୀ ଭଳି ରାଜ୍ୟରେ ନିୟମିତ ବ୍ୟବଧାନରେ ବ୍ଲାକ ଫଙ୍ଗସ୍ ରୋଗୀ ଚିହ୍ନଟ ହେଉଛନ୍ତି।
ଏହି ରୋଗକୁ ନେଇ ବିଶେଷଜ୍ଞଙ୍କ ଚେତାବନୀ:
ବିଶେଷଜ୍ଞଙ୍କ ମତରେ ବ୍ଲାକ ଫଙ୍ଗସ୍ ଦ୍ରୁତ ଗତିରେ ବ୍ୟାପିଥାଏ। ତିନି ଦିନ ଭିତରେ ଏହାର ସଂକ୍ରମଣ ନାକରୁ ଆଖି ହୋଇ ରୋଗୀର ବ୍ରେନ ପର୍ଯ୍ୟନ୍ତ ପହଞ୍ଚି ଯାଇଥାଏ।ତେଣୁ ଏହାକୁ ଶୀଘ୍ର ଚିହ୍ନଟ କରି ତୁରନ୍ତ ଚିକିତ୍ସା ଆରାମ୍ଭ କରିବା ଆବଶ୍ୟକ।
ଦିଲ୍ଲୀ ଏମ୍ସ ଦ୍ଵାରା ଏହି ରୋଗ ପାଇଁ ଗାଇଡଲାଇନ ଜାରି କରିଦେଇଛି। ଏହାର ଲକ୍ଷଣ, କେଉଁ ରୋଗୀଙ୍କୁ ଏହି ରୋଗ ପ୍ରତି ଅଧିକ ବିପଦ ଏବଂ ଏହାପାଇଁ କଣ ସବୁ କରିବାକୁ ପଡିବ, ତାହା ଗାଇଡଲାଇନରେ ଉଲ୍ଲେଖ ରହିଛି।
ଏହା ଭିତରେ ଏହି ରୋଗର ଚିକିତ୍ସାକୁ ନେଇ ଏକ ଭଲ ଖବର ମଧ୍ୟ ଆସିଛି। ହରିୟଣାର ଏକ ହସ୍ପିଟାଲରେ ଏହି ରୋଗରେ ଜଣେ ଆକ୍ରାନ୍ତଙ୍କର ଅସ୍ତ୍ରୋପଚାର ସଫଳ ହୋଇଛି। ଯାହା ସେ ସୁସ୍ଥ ହୋଇଯିବେ ବୋଲି ସମ୍ଭାବନା ସୃଷ୍ଟି ହୋଇଛି।
