ସୀତାରାମ ଅଗ୍ରୱାଲ
ଚିଲିକା: ଗ୍ରାମ ପଞ୍ଚାୟତ କାର୍ଯ୍ୟାଳୟକୁ ବାରମ୍ବାର ଦୌଡୁଥିଲେ ମଧ୍ୟ ହିତାଧିକାରୀଙ୍କୁ ରାସନ ସାମଗ୍ରୀ ମିଳୁନାହିଁ। ପଞ୍ଚାୟତ କାର୍ଯ୍ୟାଳୟ ସବୁବେଳେ ବନ୍ଦ ରହୁଥିବା ଅଭିଯୋଗ ହେଉଛି। ଫଳରେ ରାସନ ସାମଗ୍ରୀ ନମିଳିବାରୁ ଜଣେ ଭିନ୍ନକ୍ଷମ ବ୍ୟକ୍ତି ମଧ୍ୟ ଭୋକ ବିକଳରେ ଛଟପଟ ହେଉଛନ୍ତି। ଖୋର୍ଦ୍ଧା ଜିଲା ଚିଲିକା ବ୍ଲକ ଅନ୍ତର୍ଗତ ସାନ ନଇରୀ ଗ୍ରାମରେ ଏପରି ଏକ ହୃଦୟବିଦାରକ ଦୃଶ୍ୟ ନଜରକୁ ଆସିଛି।
ଲକଡଉନ ସମୟରେ ଲୋକଙ୍କୁ ଘରେ ରହିବା ପାଇଁ ନିର୍ଦ୍ଦେଶ ରହିଥିବା ବେଳେ ଅତ୍ୟାବଶ୍ୟକ ଜିନିଷଗୁଡିକୁ ଲୋକଙ୍କ ଘର ନିକଟରେ ଯୋଗାଇଦେବା ପାଇଁ ରାଜ୍ୟ ସରକାର ନିର୍ଦ୍ଦେଶ ଦେଇଛନ୍ତି। ଏହାସହ ଅସହାୟ ଏବଂ ଗରିବଙ୍କୁ ବିଶେଷ ଧ୍ୟାନ ଦେବା ପାଇଁ ମୁଖ୍ୟମନ୍ତ୍ରୀ ନିର୍ଦ୍ଦେଶ ଦେଇଛନ୍ତି।
କିନ୍ତୁ ସାନନଇରୀ ପଞ୍ଚାୟତରେ ଏହାର ବ୍ୟତିକ୍ରମ ଦେଖାଦେଇଛି। ଏହି ପଞ୍ଚାୟତରେ ଘର ନିକଟରେ ଜରୁରୀ ସାମଗ୍ରୀ ଯୋଗାଇବା ବଦଳରେ ଲୋକଙ୍କୁ ପଞ୍ଚାୟତ କାର୍ଯ୍ୟାଳୟକୁ ଆସିବାକୁ ପଡୁଛି। ହେଲେ ବଡ ଦୁଃଖର କଥା ଯେ, ଲକଡାଉନ ସମୟରେ ରାସନ ସାମଗ୍ରୀ ପାଇଁ ଆସୁଥିବା ହିତାଧିକାରୀ ନିରାଶ ହୋଇ ଫେରୁଛନ୍ତି। ସଦାବେଳେ ପଞ୍ଚାୟତ କାର୍ଯ୍ୟାଳୟରେ ତାଲା ଝୁଲୁଥିବା ହିତାଧିକାରୀମାନେ ଅଭିଯୋଗ କରୁଛନ୍ତି।
ସାନ ନଇରୀ ଗ୍ରାମର ଭିନ୍ନକ୍ଷମ ବ୍ୟକ୍ତି ଯୋଗେନ୍ଦ୍ର ବେହେରା ଏନେଇ କ୍ଷୋଭର ସହ ଗଣମାଧ୍ୟମରେ ଅଭିଯୋଗ କରିଛନ୍ତି। ଯୋଗେନ୍ଦ୍ର ଜଣେ ଦୃଷ୍ଟିହୀନ ବ୍ୟକ୍ତି। ଅତ୍ୟନ୍ତ ଗରିବ ଶ୍ରେଣୀର ହୋଇଥିବାରୁ ଟ୍ରେନରେ ଭିକ୍ଷାବୃତ୍ତି କରି ନିଜ ପରିବାରର ପେଟ ପୋଷନ୍ତି। ତେବେ ସରକାରଙ୍କ ଦ୍ୱାରା ତାଙ୍କୁ ରାସନ କାର୍ଡ ମିଳିଛି। ଯାହାଦ୍ୱାରା ତାଙ୍କ ଦୁଃଖ କିଞ୍ଚିତ ପରିମାଣରେ ହ୍ରାସ ହୋଇପାରୁଛି। ହେଲେ ଚଳିତ ମାସର ରାସନ ସାମଗ୍ରୀ ଏଯାବତ ପାଇନଥିବାର ଅଭିଯୋଗ କରିଛନ୍ତି ଯୋଗେନ୍ଦ୍ର।
ଗତ ୨୪ ତାରିଖ ସୋମବାର ଦିନ ଯୋଗେନ୍ଦ୍ର ପଞ୍ଚାୟତକୁ ରାସନ ସାମଗ୍ରୀ ନେବାପାଇଁ ଆସିଥିଲେ ସୁଦ୍ଧା କୌଣସି କାରଣରୁ ପଞ୍ଚାୟତରେ ବିଶୃଙ୍ଖଳା ଦେଖାଦେବାରୁ ଅଧିକାରୀମାନେ ଯୋଗେନ୍ଦ୍ରଙ୍କୁ ଖାଲି ହାତରେ ଫେରାଇଦେଇଥିଲେ। ପୁଣି ଗତକାଲି ୨୮ତାରିଖ ଶୁକ୍ରବାର ଦିନ ଯୋଗେନ୍ଦ୍ର ପଞ୍ଚାୟତକୁ ଗଲାବେଳକୁ ସେଠାରେ ତାଲା ଝୁଲୁଥିବାରୁ ଜାଣି ପୁଣି ଖାଲି ହାତରେ ଘରକୁ ଆସିଥିଲେ। ବର୍ତ୍ତମାନ ଭୋକ ମେଣ୍ଟାଇବା ପାଇଁ ତାଙ୍କର ଏକମାତ୍ର ସାହା ସରକାରୀ ରାସନ ରହିଥିବା ବେଳେ ତାହା ବି ତାଙ୍କୁ ମିଳି ପାରୁନାହିଁ। ଫଳରେ ବର୍ତ୍ତମାନ ସେ ଭୋକ ଉପାସରେ ଦିନ କାଟିବାକୁ ବାଧ୍ୟ ହେଉଛନ୍ତି।
ରାଜ୍ୟ ସରକାର ଭିନ୍ନକ୍ଷମ ବ୍ୟକ୍ତିଙ୍କ ପାଇଁ ଅନେକ ଯୋଜନାମାନ ଲାଗୁ କରିଥିବା ବେଳେ କିଛି ସରକାରୀ ବାବୁଙ୍କ ଦାଇତ୍ୱହୀନତା ଲାଗି ରାଜ୍ୟ ସରକାର ବଦନାମ ହେଉଛନ୍ତି। ଯୋଗେନ୍ଦ୍ରଙ୍କ କାର୍ଡରେ ଚାରି ଜଣ ପରିବାର ସଦସ୍ୟଙ୍କ ନାମ ଥିବା ବେଳେ ଚଳିତ ମାସ କେହି ହେଲେ ରାସନ ସାମଗ୍ରୀ ପାଇନାହାନ୍ତି।
ତେବେ ଏନେଇ ଆମ ପ୍ରତିନିଧି ଚିଲିକା ଯୋଗାଣ ନିରୀକ୍ଷକ ଅରୁଣ ଲେଙ୍କାଙ୍କୁ ପଚାରିବାରୁ, ସାନନଇରୀ ପଞ୍ଚାୟତରେ ଯୋଗାଣ ସହାୟକ ନାହାନ୍ତି ଏବଂ ପଞ୍ଚାୟତ ନିର୍ବାହୀ ଅଧିକାରୀ ରାସନ ସାମଗ୍ରୀ ବଣ୍ଟନ ଦାୟିତ୍ୱରେ ଅଛନ୍ତି। ତେବେ ଏବିଷୟ ନେଇ ସେ ପୂର୍ବରୁ ଅବଗତ ନଥିଲେ। ହେଲେ ବର୍ତ୍ତମାନ ଆମ ମାଧ୍ୟମରେ ଉକ୍ତ ବିଷୟରେ ଅବଗତ ହେବାପରେ ଆସନ୍ତାକାଲି ସୁଦ୍ଧା ଯୋଗେନ୍ଦ୍ରଙ୍କ ଘରେ ରାସନ ସାମଗ୍ରୀ ପହଞ୍ଚିବ ବୋଲି ଶ୍ରୀ ଲେଙ୍କା ସୂଚନା ଦେଇଛନ୍ତି।
