ଦେଶର ସବୁଠୁ ଅଧିକ ୧୫ ପ୍ରଦୂଷିତ ସହର ତାଲିକାରେ ଭାରତର ୧୪ଟି ସହର ରହିଛି। ପଲ୍ଟିକାଲ୍ ଲିଡର୍ସ ପୋଜିସନ୍ ଏଣ୍ଡ୍ ଆକ୍ସନ୍ ଏବଂ ଏୟାର କ୍ବାଲିଟି ଇନ୍ ଇଣ୍ଡିଆ ୨୦୧୪-୧୯ରୁ ଏହି ତଥ୍ୟ ମିଳିଛି। ‘କ୍ଲାଇମେଟ୍ ଟ୍ରେଣ୍ଡସ୍’ ଦ୍ବାରା ଜାରି କରାଯାଇଥିବା ଏହି ରିପୋର୍ଟରେ ଏହି ସୂଚନା ମିଳିଛି। ବିଶ୍ବ ସ୍ବାସ୍ଥ୍ୟ ସଂଗଠନ ଦ୍ବାରା ୧୫ ପ୍ରଦୂଷିତ ସହରର ତାଲିକାରେ ଭାରତର ୧୪ଟି ସହର ଥିବାବେଳେ ଉତ୍ତରପ୍ରଦେଶର ୪ଟି ସହର ସାମିଲ୍ ହୋଇଛନ୍ତି। ଏହି ରିପୋର୍ଟରେ କୁହାଯାଇଛି ଯେ, ବାରଣାସୀରେ ଶ୍ବାସ ସମସ୍ୟା ତଥା ଆଲର୍ଜି ରୋଗୀଙ୍କ ସଂଖ୍ୟା ବହୁ ପରିମାଣରେ ବଢିଛି। ଏହାର ପ୍ରମୁଖ କାରଣ ଭାବରେ ସହରରେ ଅଧିକ ନିର୍ମାଣ କାର୍ଯ୍ୟକୁ ଦର୍ଶାଯାଇଛି। ପ୍ରଧାନମନ୍ତ୍ରୀ ଗତ ସାଧାରଣ ନିର୍ବାଚନ ୨୦୧୪ ଏହି ସହରରୁ ଜିତିଥିଲେ। କିନ୍ତୁ ଏହି ସହରଟି ପ୍ରଦୂଷିତ ସହରର ତୃତୀୟ ସ୍ଥାନରେ ରହିଛି। ୨୦୧୭ରେ ବାରଣାସୀର ବାୟୁ ଗୁଣବତ୍ତା ସୂଚକାଙ୍କ ବିପଦପୂର୍ଣ୍ଣ ଭାବେ ୪୯୦ରେ ପହଞ୍ଚିଥିଲା। ଡିସେମ୍ବର ୨୦୧୮ରେ ଏହା ୩୮୪ ରହିଥିଲ। ତେବେ କାନପୁର ହେଉଛି ସବୁଠୁ ଅଧିକ ପ୍ରଦୂଷିତ ସହର। ଉତ୍ତରପ୍ରଦେଶର କାନପୁର ସହରକୁ ଅଧିକ ପ୍ରଦୂଷିତ ସହର ଭାବେ ପ୍ରଥମ ସ୍ଥାନରେ ରହିଛି। ଏହାପରେ ହରିୟାଣାର ଫରିଦାବାଦ, ବାରଣାସୀ ତୃତୀୟରେ, ବିହାରର ଗୟା ଓ ପାଟନା କ୍ରମାଗତ ଭାବେ ଚତୁର୍ଥ ଓ ପଞ୍ଚମ ସ୍ଥାନରେ ରହିଛି। ସେହିପରି ଭାରତର ରାଜଧାନୀ ଦିଲ୍ଲୀ ଷଷ୍ଠ ସ୍ଥାନରେ ରହିଛି। ଉତ୍ତରପ୍ରଦେଶର ଲକ୍ଷ୍ନୌ ସପ୍ତମ ସ୍ଥାନରେ ରହିଥିବାବେଳେ ଆଗ୍ରା, ମୁଜାଫରଫୁର, ଶ୍ରୀନଗର, ଗୁରୁଗ୍ରାମ, ଜୟପୁର, ପଟିଆଲା ଓ ଯୋଧପୁର ପ୍ରମୁଖ ଏହି ସୂଚୀରେ ରହିଛନ୍ତି। ଭାରତରେ ପ୍ରଦୂଷଣ ଏକ ବଡ଼ ସମସ୍ୟା ଭାବରେ ଉଭା ହୋଇଥିବାବେଳେ ଆମ ନିର୍ବାଚନ ପ୍ରତିନିଧିମାନେ କେବଳ ସଂଳାପରେ ରହିଯାଇଛନ୍ତି। ଦିନକୁ ଦିନ ବଢୁଥିବା ଏହି ବାୟୁ ପ୍ରଦୂଷଣକୁ ରୋକିବା ଦିଗରେ କାର୍ଯ୍ୟାନୁଷ୍ଠାନ ନେବା ନିତାନ୍ତ ଆବଶ୍ୟକ।
( ମୋବାଇଲରେ ଫଟାଫଟ ଖବର ଜାଣିବା ପାଇଁ ପ୍ଲେ ଷ୍ଟୋରରୁ ଡାଉନଲୋଡ କରନ୍ତୁ sankhipta , ଡାଉନଲୋଡ ପରେ ଟିପରେ ସ୍କ୍ରିନକୁ ତଳୁ ଉପରକୁ ଘଷି ପଢିଚାଲନ୍ତୁ ଖବର ପରେ ଖବର )