ସୀତାରାମ ଅଗ୍ରୱାଲ
ନାଚୁଣୀ: ଖୋର୍ଦ୍ଧା ଜିଲ୍ଲା ନାଚୁଣୀ ଫାଣ୍ଡି ଅନ୍ତର୍ଗତ ୧୬ ନମ୍ବର ଜାତୀୟ ରାଜପଥରେ ଆଜି ସକାଳୁ ଏକ ଘଣ୍ଟା ବ୍ୟବଧାନରେ ଦୁଇ ଗୋଟି ସଡ଼କ ଦୁର୍ଘଟଣା ଘଟିଛି। ସୂଚନା ମୁତାବକ ସକାଳ ୫ ଘଟିକାରେ ବ୍ରହ୍ମପୁରରୁ ଏକ ଟମାଟୋ ବୋଝେଇ ଟ୍ରକ ଭୁବନେଶ୍ୱର ଅଭିମୁଖେ ଯାଉଥିବା ବେଳେ ବରଡ଼ି ଛକଠାରେ ଭାରସାମ୍ୟ ହରାଇ ଓଲଟି ପଡିଥିଲା। ଫଳରେ ଶହ ଶହ ଟମାଟୋ ଜାତୀୟ ରାଜପଥରେ ପଡି ନଷ୍ଟ ହୋଇଯାଇଥିବା ବେଳେ ଗାଡି ଚାଳକ ଏବଂ ହେଲ୍ପର ଅଳ୍ପକେ ବର୍ତ୍ତିଯାଇଥିଲେ। ଖବର ପାଇ ନାଚୁଣୀ ଫାଣ୍ଡି ଅଧିକାରୀ ଉମାକାନ୍ତ ସାହୁ ଘଟଣାସ୍ଥଳରେ ପହଁଚି ଏକ କ୍ରେନ ମାଧ୍ୟମରେ ଗାଡିଟିକୁ ଉଦ୍ଧାର କରିଛନ୍ତି।
ଅନୁରୂପ ଭାବେ ଏହାର ଏକ ଘଣ୍ଟା ପରେ ସକାଳ ୬ ଘଟିକାରେ ଖୋର୍ଦ୍ଧାରୁ ଆସ୍କା ଯାଉଥିବା ଏକ ରଙ୍ଗ ବୋଝେଇ ପିକଅପ ଗାଡିଟି ସେହି ସ୍ଥାନରେ ଭରସାମ୍ୟ ହରାଇ ଓଲଟିପଡ଼ିଥିଲା। ଫଳରେ ଲକ୍ଷାଧିକ ଟଙ୍କାର ରଙ୍ଗ ଜାତୀୟ ରାଜପଥରେ ପଡି ନଷ୍ଟ ହୋଇଯାଇଛି। ତେବେ ଗାଡି ଚାଳକ ଏବଂ ହେଲ୍ପର ମୃତ୍ୟୁମୁଖରୁ ବର୍ତ୍ତିଯାଇଛନ୍ତି। ଘଟଣାସ୍ଥଳରେ ନାଚୁଣୀ ଫାଣ୍ଡି ପୋଲିସ ପହଞ୍ଚି ଗାଡ଼ିକୁ ଉଦ୍ଧାର କରିଥିବାର ଦେଖାଯାଇଛି।
