ଲକ୍ଷ୍ନୌ: ସମାଜବାଦୀ ପାର୍ଟି ସଭାପତି ତଥା ଉତ୍ତରପ୍ରଦେଶର ପୂର୍ବତନ ମୁଖ୍ୟମନ୍ତ୍ରୀ ଅଖିଲେଶ ଯାଦବ ରାଜ୍ୟର ଅଧିକାରୀମାନଙ୍କୁ ଚେତାବନୀ ଦେଇଛନ୍ତି। ବିଧାନସଭା ନିର୍ବାଚନ ପରେ ତାଙ୍କ ଦଳ ସରକାର ଗଠନ କରିବା ପରେ କୋଭିଡ-୧୯ ରିପୋର୍ଟର ତଦନ୍ତ କରିବ ବୋଲି ଅଖିଲେଶ କହିଛନ୍ତି। ତଦନ୍ତ ପରେ କରୋନା ସମ୍ବଧୀୟ ତଥ୍ୟ ଲୁଚାଉଥିବା ଅଧିକାରୀଙ୍କ ବିରୋଧରେ କାର୍ଯ୍ୟାନୁଷ୍ଠାନ ହେବ ବୋଲି ସେ ଚେତାବନୀ ଦେଇଛନ୍ତି।
ଏକ ସାମ୍ବାଦିକ ସମ୍ମିଳନୀରେ ଅଖିଲେଶ କହିଛନ୍ତି ଯେ, ତଥ୍ୟ ଲୁଚାଇବା ଦ୍ଵାରା ସଂକ୍ରମଣ ବୃଦ୍ଧି ପାଇଛି। ଯାହା ଫଳରେ ଅନେକ ଲୋକଙ୍କ ଜୀବନ ଚାଲିଯାଇଛି। କିନ୍ତୁ ରାଜ୍ୟରେ ସଠିକ ଭାବେ କେତେ ଲୋକ କରୋନାରେ ମୃତ୍ୟୁ ହୋଇଛି, ତାହା ସରକାର ଲୁଚାଇବାକୁ ଚେଷ୍ଟା କରୁଛି। ତେଣୁ ମୃତକଙ୍କ ସମ୍ପର୍କୀୟମାନଙ୍କୁ କ୍ଷତିପୂରଣ ଦେବା ପାଇଁ ଯୋଗୀ ସରକାର ଚାହୁଁ ନହିଁ ବୋଲି ଅଖିଲେଶ ଅଭିଯୋଗ କରିଛନ୍ତି।
