ସମ୍ବଲପୁର : କ୍ଷେତ୍ରୀୟ ସ୍ତରରେ କାର୍ଯ୍ୟ କରୁଥିବା ସାମ୍ବାଦିକମାନଙ୍କ ପାଇଁ ଭାରତ ସରକାର ବିଭିନ୍ନ କଲ୍ୟାଣମୂଳକ ଯୋଜନା କାର୍ୟ୍ୟକାରୀ କରୁଛନ୍ତି।ଏସବୁ ଯୋଜନାର ସୁବିଧା ନେବାକୁ ସାମ୍ବାଦିକମାନଙ୍କୁ ପରାମର୍ଶ ଦେଇଛନ୍ତି ସୂଚନା ଓ ପ୍ରସାରଣ ମନ୍ତ୍ରଣାଳୟ ଓଡ଼ିଶା ପ୍ରାନ୍ତ ଅତିରିକ୍ତ ମହାନିର୍ଦ୍ଦେଶକ ଶ୍ରୀ ରାଜିନ୍ଦର ଚୌଧୁରୀ। ସମ୍ବଲପୁର ଠାରେ ସ୍ଥାନୀୟ ସାମ୍ବାଦିକମାନଙ୍କ ସହିତ ଆଲୋଚନା କାଳରେ ସେ ଏହି ସୂଚନା ଦେଇଛନ୍ତି।
ଏସବୁ ଯୋଜନାର ସୁବିଧା ନେବା ଲାଗି ଭୁବନେଶ୍ବରସ୍ଥିତ ପତ୍ର ସୂଚନା କାର୍ଯ୍ୟାଳୟ ସହିତ ଯୋଗାଯୋଗ କରିବା ଲାଗି ସେ ପରାମର୍ଶ ଦେଇଥିଲେ। ସରକାରୀ ଯୋଜନା ଓ କାର୍ୟ୍ୟକ୍ରମର ପ୍ରଚାରପ୍ରସାର କ୍ଷେତ୍ରରେ ଆଞ୍ଚଳିକ ସ୍ତରରେ କାର୍ୟ୍ୟ କରୁଥିବା ସାମ୍ବାଦିକମାନଙ୍କରଗୁରୁତ୍ବପୂର୍ଣ୍ଣ ଭୂମିକା ରହିଛି। ସେମାନେ ସରକାରୀ ଯୋଜନାକୁ ତୃଣମୂଳସ୍ତରରେ ପହଞ୍ଚାଇବା ଦିଗରେ ସହାୟକ ହୋଇଥାନ୍ତି ବୋଲି ଶ୍ରୀ ଚୌଧୁରୀ ଏହି ଅବସରରେ ମତବ୍ୟକ୍ତ କରିଥିଲେ।
ତୃଣମୂଳସ୍ତରରେ କାର୍ୟ୍ୟକାରୀ ହେଉଥିବା ବିଭିନ୍ନ ଯୋଜନା ସମ୍ପର୍କରେ ଜନସାଧାରଣଙ୍କ ମତାମତ ସଂଗ୍ରହ କରିବା ଲାଗି ମଧ୍ୟ ଶ୍ରୀ ଚୌଧୁରୀ ପରାମର୍ଶ ଦେଇଥିଲେ। ଏହି ଆଲୋଚନା କାଳରେ ସାମ୍ବାଦିକମାନେ ସେମାନଙ୍କର ବିଭିନ୍ନ ସମସ୍ୟାଗୁଡ଼ିକୁ ଉପସ୍ଥାପନ କରିଥିଲେ। ଭାରତ ସରକାରଙ୍କ ସ୍ତରରେ ସାମ୍ବାଦିକମାନଙ୍କ ସମସ୍ୟା ସମାଧାନ ଲାଗି ଯାହାକିଛି ପଦକ୍ଷେପ ଗ୍ରହଣ କରାଯାଇପାରିବ ସେ ନେଇ ପ୍ରୟାସ କରାଯିବ ବୋଲି ଶ୍ରୀ ଚୌଧୁରୀ ମତବ୍ୟକ୍ତ କରିଥିଲେ।
