ଭୁବନେଶ୍ବର: ଆଜି ରାଜ୍ୟ ସରକାର ଓଡ଼ିଆ ଭାଷା, ସାହିତ୍ୟ ଓ ସଂସ୍କୃତି ବିଭାଗର ସଚିବ ସୁରେଶ ଚନ୍ଦ୍ର ଦଳାଇଙ୍କୁ ବଦଳି କରିଦେଇଛନ୍ତି। ତାଙ୍କୁ ଉତ୍ତର ଓଡିଶା ଆରଡିସି କରି ବଦଳି କରାଯାଇଛି। ତାଙ୍କର ବଦଳି ପରେ ଏହି ବିଭାଗର ନିର୍ଦ୍ଦେଶକ ଥିବା ରଂଜନ କୁମାର ଦାସ ସଚିବ ଦାୟିତ୍ବରେ ରହିବେ ବୋଲି ବିଜ୍ଞପ୍ତି ପ୍ରକାଶ ପାଇଛି।
ସଂସ୍କୃତି ସଚିବ ଭାବେ ସୁରେଶ ଚନ୍ଦ୍ର ଦଳାଇ ଚଳିତ ବର୍ଷ ଜୁଲାଇରେ ଯୋଗ ଦେଇଥିଲେ। ମାତ୍ର 4 ମାସ କାମ କରିବା ପରେ ତାଙ୍କୁ ବଦଳି କରାଯାଇଛି। ଏହା ପୂର୍ବରୁ ରାଜସ୍ବ ଏବଂ ଲୋକସଂପର୍କ ବିଭାଗର ପ୍ରମୁଖ ଶାସନ ସଚିବ ବିଷ୍ଣୁପଦ ସେଠୀ ଦାୟିତ୍ବରେ ଥିଲେ। କିଛି ମାସ ପରେ ରାଜ୍ୟ ସରକାର ତାଙ୍କ ହାତରୁ ସଂସ୍କୃତି ବିଭାଗ କାଢି ନେଲେ।
