ଭୁବନେଶ୍ବର: ଗତକାଲି ବିଳମ୍ବିତ ରାତିରେ ଭୁବନେଶ୍ବରର ପୁନମା ଓଭର ବ୍ରିଜ ନିକଟରେ ଏକ ଦୁର୍ଘଟଣା ଘଟିଛି। ଏଥିରେ କାରଟି ଓଭର ବ୍ରିଜ ତଳକୁ ଖସି ଚୁରମାର ହୋଇପଡିଛି। ହେଲେ ଆଶ୍ଚର୍ଯ୍ୟର କଥା ଯେ ଚାଳକଙ୍କର କୌଣସି କ୍ଷତି ହୋଇ ନାହିଁ।
ଘଟଣାରୁ ଜଣାପଡିଛି ଯେ, ଗତକାଲି ବିଳମ୍ବିତ ରାତିରେ ଗୋଟିଏ i10 କାରଟି ଦ୍ରୁତଗତିରେ ନବୀନ ନିବାସଆଡୁ ଭୀମଟାଙ୍ଗୀ ଯାଉଥିଲା। ସେ ପୁନମା ଓଭର ବ୍ରିଜ ଉପରେ ଚଢିବା ବେଳେ ଭାରସାମ୍ୟ ହରାଇ ବସିଥିଲା। ଫଳରେ ଗାଡିଟି ଓଭର ବ୍ରିଜର ବ୍ୟାରିକେଡକୁ ଧକ୍କା ଦେଇଥିଲା। ଏହି ଧକ୍କା ଏତେ ଜୋରରେ ଲାଗିଥିଲା ଯେ ସେହି ବ୍ୟାରିକେଡ ଭାଙ୍ଗି କାରଟି 30 ଫୁଟ ତଳକୁ ଖସିପଡିଥିଲା।
ବିଳମ୍ବିତ ରାତି ହୋଇଥିବାରୁ ଲୋକ ଗହଳି ନ ଥିଲା। ହେଲେ ଜଣେ ଦେଖଣାହାରୀଙ୍କ ଅନୁସାରେ କାରଟି ପୁରା ଓଲଟିପଡିଲା। ସେ ଭିତରେ ଚାଳକ ଗୋଡରେ କବାଟ ଭାଙ୍ଗି ବାହାରିଥିଲା। ତାପରେ ସେ ସେଠାରେ କିଛି ସମୟ ବସିବା ପରେ ଏକ ଓଲାଗାଡିରେ କେଉଁଆଡେ ଚାଲିଯାଇଥିଲା। ଘଟଣାସ୍ଥଳରେ ପୋଲିସ ପହଁଚି ତଦନ୍ତ କରୁଛି।