କନ୍ଦର୍ପ ବେହେରା
ରେଢାଖୋଲ: ନାକଟିଦେଉଳ ବ୍ଲକ୍ ର ବହୁ ଜମାକାରୀ ରାଜ୍ୟସରକାରଙ୍କ ଦ୍ୱାରା ପଞିକୃତ ହୋଇ ବିଭିନ୍ନ ସମୟରେ ଟଙ୍କା ଜମା କରି ଥିଲେ। ସରକାର ଜମାକାରୀ ସଂସ୍ଥାକୁ ନିଷିଦ୍ଧ କରିଦେବା ଫଳରେ ଜମାକାରୀ ମାନେ ଲକ୍ଷ ଲକ୍ଷ ଟଙ୍କାପାଇ ନ ଥିବାରୁ ସରକାର ଜମାକାରୀ ଚିହ୍ନଟ ଓ ତୁରନ୍ତ ଟଙ୍କା ଫେରସ୍ତ ଦାବୀରେ ତହସିଲ୍ ଅଫିସ୍ ଘେରାଉ ସହ ନାକଟିଦେଉଳ ତହସିଲ୍ ଦାରଙ୍କ ଜରିଆରେ ମୁଖ୍ୟମନ୍ତ୍ରୀଙ୍କୁ ଏକ ଦାବୀ ପତ୍ର ପ୍ରଦାନ କରିଥିବା ଜଣା ପଡିଛି।
ସମ୍ବଲପୁର ଜିଲ୍ଲା ନାକଟିଦେଉଳ ବ୍ଲକ୍ ର ବହୁ ଜମାକାରୀ ଅଧିକ ଟଙ୍କା ଲାଳସାରେ ରାଜ୍ୟସରକାରଙ୍କ ପଞିକୃତ ସଂସ୍ଥା ମାଧ୍ୟମରେ ଟଙ୍କା ଜମା କରିଥିଲେ । ରାଜ୍ୟସରକାର ଏହି ସବୁ ସଂସ୍ଥାକୁ ବେଆଇନ୍ ଘୋଷଣା କରି ଫାଇନାନ୍ସ କଂପାନୀକୁ ସିଲ୍ କରିବା ସହ କଂପୂଟର ହାର୍ଡ ଡିସ୍କ ନେଇ ପ୍ରମାଣ ନଷ୍ଟ କରିଦେଇଥିଲେ। ଯା ଫଳରେ ଜମାକାରୀ ମାନେ ଟଙ୍କା ନ ପାଇ ଘୋର ଅସୁବିଧାର ସମ୍ମୁଖିନ ହୋଇଥିଲେ। ଜମାକାରୀ ମାନେ ବାରମ୍ବାର ସରକାରଙ୍କୁ ଜଣାଇଥିଲେ ମଧ୍ୟ କୌଣସି ସୁଫଳ ପାଇ ପାରି ନ ଥିଲେ। ଏହାକୁ ନେଇ ନାକଟିଦେଉଳ ବ୍ଲକ୍ ର ଜମାକାରୀମାନେ ନାକଟିଦେଉଳ ତହସିଲ୍ଦାରଙ୍କ ମାଧ୍ୟମରେ ମୁଖ୍ୟମନ୍ତ୍ରୀଙ୍କୁ ଏକ ଦାବୀ ପତ୍ର ପ୍ରଦାନ କରିଛନ୍ତି।
ଦାବୀ ପତ୍ରରେ ଜମାକାରୀମାନେ ୪ ଦଫା ସମ୍ବଳିତ ଦାବୀକୁ ଉପସ୍ଥାପନ କରିଛନ୍ତି। କମିଶନଙ୍କ ଦ୍ୱରା ସୁପାରିଶ୍ ହୋଇଥିବା ଜମାକାରୀଙ୍କୁ କର୍ପସ୍ ଫଣ୍ଡରୁ ଟଙ୍କା ଫେରସ୍ତ କରିବା , ଜମାକାରୀଙ୍କ ନାମକୁ ଚିହ୍ନଟ କରିବା, ଜମାକାରୀକୁ ଠକିଥିବା କଂପାନୀର ସ୍ଥାବର ଓ ଅସ୍ଥାବର ସଂପତି ଜବତ କରିବା, ଅସାଧୁ ସାହାରା କଂପାନୀର ମାଲିକଙ୍କ ନାମରେ ମକଦ୍ଦମା ଦେବା ଆଦି ଦାବୀ ପତ୍ରରେ ଉଲ୍ଲେଖ ରହିଛି। ଜମାକାରୀ ସୁଦର୍ଶନ ସାହୁ, ଦୀନବନ୍ଧୁ ସ୍ୱାଇଁ, ପଳଉ ବେହେରା, ଶରତ କୁମାର ବେହେରା, ଇନ୍ଦ୍ରମଣୀ ସାହୁ, ଅଚ୍ୟୁତାନନ୍ଦ ସାହୁ ଆଦି ବହୁ ଜମାକାରୀଙ୍କ ଦସ୍ତଖତ ସମ୍ବଳିତ ଦାବୀପତ୍ର ନାକଟିଦେଉଳ ତହସିଲ୍ଦାର ସୁକାନ୍ତ ନାଏକଙ୍କ ଜରିଆରେ ମୁଖ୍ୟମନ୍ତ୍ରୀଙ୍କୁ ପ୍ରଦାନ କରାଯାଇଛି।
