ବଲିଉଡ୍ରେ ବାୟୋପିକ୍ର ଟ୍ରେଣ୍ଡ ଚାଲିଥିବା ବେଳେ ଏହି ଧାରାରେ ସାମିଲ ହୋଇଛନ୍ତି ବଲିଉଡ୍ ଅଭିନେତ୍ରୀ କାଟ୍ରିନା କୈଫ୍। ଅଭିନେତ୍ରୀ କାଟ୍ରିନା କୈଫ୍ ଭାରତୀୟ ଧାବିକା ତଥା ପଦ୍ମଶ୍ରୀ ପୁରସ୍କାର ବିଜେତା ପିଟି ଉଷାଙ୍କ ଚରିତ୍ରରେ ନଜର ଆସିବେ। ଫିଲ୍ମରେ ଉଷାଙ୍କ ବାଲ୍ୟାବସ୍ଥା, ଖେଳାଳି ଏବଂ ପ୍ରଶିକ୍ଷକ ସମୟର କାହାଣୀ ଦେଖିବାକୁ ମିଳିବ। ତାମିଲ ଏବଂ ମାଲାୟଲମ୍ ଚଳଚ୍ଚିତ୍ର ନିର୍ଦ୍ଦେଶକ ରେବତୀ ଏସ୍ ବର୍ମା ଏହି ଚଳଚିତ୍ରର ନିର୍ଦ୍ଦେଶନା ଦେବାକୁ ଯାଉଛନ୍ତି। ନିକଟରେ ରେବତୀ ମୁମ୍ବାଇ ଆସି କାଟ୍ରିନାଙ୍କୁ ଫିଲ୍ମର କାହାଣୀ ଶୁଣାଇଥିଲେ। କାଟ୍ରିନାଙ୍କୁ କାହାଣୀ ପସନ୍ଦ ଆସିଥିବା ବେଳେ ସୂର୍ଯ୍ୟବଂଶୀ ପରେ ଏହି ଚଳଚିତ୍ରର କାମ ଆରମ୍ଭ କରିବେ ବୋଲି ଜଣାପଡିଛି। ଜୁନ୍ ୫ ତାରିଖରେ କାଟ୍ରିନା-ସଲ୍ମାନ ଅଭିନୀତ ଭାରତ ପରଦାକୁ ଆସିବାକୁ ଯାଉଛି।
