କନ୍ଦର୍ପ ବେହେରା
ରେଢ଼ାଖୋଲ: ପ୍ରାଥମିକ ଶିକ୍ଷାର ଉନ୍ନତି କିପରି ହୋଇପାରିବ, ସେଥିପାଇଁ ସରକାର କୋଟି ଟଙ୍କା ଖର୍ଚ୍ଚ କରୁଛନ୍ତି। ହେଲେ ରାଜ୍ୟର କେଉଁ ବିଦ୍ୟାଳୟରେ ଶିକ୍ଷକ ନାହାନ୍ତି ତ ଆଉ କେଉଁଠି ଛାତ୍ରଛାତ୍ରୀ ଅଭାବରୁ ବିଦ୍ୟାଳୟକୁ ସରକାର ଉଠାଇ ଦେଉଛନ୍ତି। ଏଭଳି ଏକ ବିଦ୍ୟାଳୟକୁ ସରକାର ଉଠାଇ ଦେବା ପ୍ରତିବାଦରେ ଆଜି ଚରଡପଶି ଗ୍ରାମର ଅଭିଭାବକ ତଥା ଛାତ୍ର ଛାତ୍ରୀମାନେ ନାକଟିଦେଉଳ ବ୍ଲକ୍ କାଯ୍ୟାଳୟ ସମ୍ମୁଖରେ ଧାରଣାରେ ବସିଥିଲେ।
ନାକଟିଦେଉଳ ବ୍ଲକ ଅନ୍ତର୍ଗତ ଶିମିଳିପାଳ ପଂଚାୟତର ଚରଡ଼ପଶି ପ୍ରାଥମିକ ବିଦ୍ୟାଳୟକୁ ସରକାର ଗତ ଦୁଇ ବର୍ଷ ହେଲା କମ ଛାତ୍ର ଛାତ୍ରୀ ଥିବା ଦର୍ଶାଇ ବନ୍ଦ କରିଦେଇଥିବା ଗ୍ରାମବାସୀ ପ୍ରକାଶ କରିଛନ୍ତି ଏବଂ ବିଦ୍ୟାଳୟକୁ କାଉଁଶିପାଳ ପ୍ରାଥମିକ ବିଦ୍ୟାଳୟରେ ମିଶ୍ରଣ କରିଥିବାରୁ ଗ୍ରାମବାସୀମାନଙ୍କ ମଧ୍ୟରେ ଅସନ୍ତୋଷ ଦେଖାଦେଇଥିଲା। ପୁର୍ବରୁ ଗ୍ରାମବାସୀ ବିଭାଗୀୟ ଅଧିକାରୀ ସମେତ ପ୍ରଶାସନର ଦୃଷ୍ଟି ଆକର୍ଷଣ କରି ଆସୁ ଥିଲେ ମଧ୍ୟ କୌଣସି ପଦକ୍ଷେପ ଗ୍ରହଣ କରାଯାଇ ନ ଥିଲା। ଏପରିକି ଦୁଇ ବର୍ଷ ହେଲା ଏହି ବିଦ୍ୟାଳୟ ବନ୍ଦ ରହିଥିବା ଜଣା ପଡ଼ିଛି।
ବର୍ତ୍ତମାନ ରାଜ୍ୟରେ ପ୍ରାଥମିକ ବିଦ୍ୟାଳୟ ଖୋଲିଥିବା ବେଳେ ଚରଡପଶି ବିଦ୍ୟାଳୟ ଖୋଲି ନ ଥିଲା। ସେମାନଙ୍କ ଗ୍ରାମରେ ଥିବା ସ୍କୁଲକୁ ସରକାର ଶିଘ୍ର ଫେରାଇଦେବା ଦାବିରେ ଆଜି ଦିନ ୧୧ ଟାରୁ ପ୍ରାୟ ୫୦ ଉର୍ଦ୍ଧ୍ଵ ଛାତ୍ରଛାତ୍ରୀ ଓ ଅବିଭାବକମାନେ ବିଡ଼ିଓ ଅଫିସ ବାରଣ୍ଡାରେ ଧାରଣରେ ବସିଥିଲେ। ସରକାର ଯଦି ସେମାନଙ୍କର ଦାବି ନ ଶୁଣନ୍ତି ତାହାଲେ ଆଗାମୀ ଦିନରେ ପିଲାଛୁଆ ଧରି ସେମାନେ ରାଜରାସ୍ତାକୁ ଓହ୍ଲାଇବା ବୋଲି ଚେତାବନୀ ଦେଇଥିବା ଜଣାପଡ଼ିଛି।
ଧାରଣା ସ୍ଥଳରେ ନାକଟିଦେଉଳ ବିଡ଼ିଓ ବିବେକାନନ୍ଦ ସାହୁ ଓ ବ୍ଲକ୍ ଶିକ୍ଷା ଅଧିକାରୀ ବିଜୟ ପାତ୍ର ପହଂଚି ଗ୍ରାମବାସୀ ଓ ଛାତ୍ରଛାତ୍ରୀଙ୍କୁ ୨୫ ମାର୍ଚ୍ଚ ସୁଦ୍ଧା ଘଟଣାର ତଦନ୍ତ କରି ଏହାର ସମାଧାନ କରିବାକୁ ପ୍ରତିଶ୍ରୁତି ଦେବା ପରେ ଧାରଣା ପ୍ରତ୍ୟାହ୍ରୁତ ହୋଇଥିଲା।
