ଓଡିଶା ରାଜ୍ୟ ପାଇଁ ଆସୁଛି ଆଉ ଏକ ବାତ୍ୟା। ଯାହାର ନାମ ରହିଛି ଫୋନି। ପୂର୍ବରୁ ଏହା ଦକ୍ଷିଣଭାରତର ତାମିଲନାଡୁ ଏବଂ ଆନ୍ଧ୍ରପ୍ରଦେଶ ସ୍ଥଳଭାଗ ସ୍ପର୍ଶ କରିବାରଥିଲା, କିନ୍ତୁ ତାହାର ଗତିପଥର ପରିବର୍ତ୍ତନ ହେବାର ସମ୍ଭାବନା ଅଛି ବୋଲି ଭାରତୀୟ ପାଣିପାଗ ବିଜ୍ଞାନ ବିଭାଗ ପକ୍ଷରୁ ସୂଚନା ମିଳିଛି। ଆସନ୍ତା ୩୦ତାରିଖରେ ଫୋନି ପ୍ରବଳ ବାତ୍ୟାର ରୂପନେବ ବୋଲି ଆଶଙ୍କା କରାଯାଉଛି। ମେ୧ ତାରିଖରେ ଏହା ଉତ୍ତର-ପଶ୍ଚିମ ଦିଗ ପରିବର୍ତ୍ତେ ଉତ୍ତର-ପୂର୍ବ ଦିଗ ଆଡକୁ ଗତିକରିବାର ସୂଚନା ରହିଛି। ଏହାର ପ୍ରଭାବରେ ଓଡିଶାର ଉପକୂଳବର୍ତ୍ତୀ ଅଞ୍ଚଳରେ ଆସନ୍ତା ୨ତାରିଖ ସୁଦ୍ଧା ପ୍ରବଳ ବର୍ଷ ସହ ୪୦ରୁ୫୦ କି.ମି ବେଗରେ ପବନ ବହିବାର ସମ୍ଭାବନା ରହିଛି। କିନ୍ତୁ ଆସନ୍ତା ୪ତାରିଖ ସୁଦ୍ଧା ଓଡିଶା ଭୂଭାଗ ସ୍ପର୍ଶ କରିବାର ସମ୍ଭାବନା ନହିଁ ବୋଲି ପାଣିପାଗ ବିଭାଗ ପକ୍ଷରୁ ଘୋଷଣା କରାଯାଇଛି। ଫୋନିକୁ ନେଇ ଓଡିଶା ରାଜ୍ୟ ପାଇଁ ପାଣିପାଗ ବିଭାଗ ସତର୍କତା ଅବଲମ୍ବନ ପାଇଁ ପ୍ରଶାସନକୁ ନିର୍ଦ୍ଦେଶ ଦେଇଥିବାବେଳେ, ଏନେଇ ମୁଖ୍ୟସଚିବ ଏକ ଜରୁରୀକାଳୀନ ବୈଠକ ଡକାଇ ସମ୍ପୂର୍ଣ ଭାବରେ ସଜାଗ ରହିବା ପାଇଁ ଜିଲ୍ଲାପାଳମାନଙ୍କୁ ମଧ୍ୟ ନିର୍ଦ୍ଦେଶ ଦେଇଛନ୍ତି। ମତ୍ସ୍ୟଜିବୀମାନଙ୍କୁ ସମୁଦ୍ର ମଧ୍ୟକୁ ନଯିବା ପାଇଁ ପରାମର୍ଶ ଦିଆଯାଇଛି। ଏଥିପାଇଁ ୧୨ ଏନଡିଆରଏଫ, ୨୦ ଓଡ୍ରାଫ, ୨୩୦ ଅଗ୍ନିଶମ ବିଭାଗ ଦଳ ସତର୍କ ରହିଛନ୍ତି ବୋଲି ସୂଚନା ରହିଛି। ସମସ୍ତ ବାତ୍ୟା ଆଶ୍ରୟସ୍ଥଳୀକୁ ବାତ୍ୟା ମୁକାବିଲା ପାଇଁ ପ୍ରସ୍ତୁତ ରଖାଯାଇଛି।
