ନୂଆଦିଲ୍ଲୀ: ସ୍ନାତକୋତ୍ତର ପ୍ରାର୍ଥୀମାନଙ୍କ ପାଇଁ ନ୍ୟାସନାଲ ଏଲିଜିବିଲିଟି କମ ପ୍ରବେଶିକା ପରୀକ୍ଷା ସ୍ଥଗିତ ରଖିବାକୁ ଅଲ ଇଣ୍ଡିଆ ମେଡିକାଲ ଷ୍ଟୁଡେଣ୍ଟସ ଆସୋସିଏସନ ଦ୍ୱାରା ସୁପ୍ରିମକୋର୍ଟରେ ଏକ ଆବେଦନ କରାଯାଇଛି। ମେ ୪ ତାରିଖ ବୁଧବାର ଦିନ ସୁପ୍ରିମକୋର୍ଟର ଓକିଲ ସନ୍ଦୀପ ଏସ ତିୱାରୀ ଏହି ଆବେଦନ କରିଛନ୍ତି। ଏହି ପ୍ରସଙ୍ଗରେ ଆଡଭୋକେଟ୍ ସନ୍ଦୀପ ଏସ ତିୱାରୀ ଟ୍ୱିଟ୍ କରି କହିଛନ୍ତି ଯେ, “ଅଲ ଇଣ୍ଡିଆ ମେଡିକାଲ ଷ୍ଟୁଡେଣ୍ଟସ୍ ଆସୋସିଏସନ୍ (AIMSA) ତରଫରୁ ଆମେ ମଇ ୨୧ ତାରିଖ ୨୦୨୨ରେ ଧାର୍ଯ୍ୟ ହୋଇଥିବା ନିଟ୍ ପିଜି ୨୦୨୨ ପରୀକ୍ଷା ବିରୋଧରେ ସୁପ୍ରିମକୋର୍ଟଙ୍କ ନିକଟରେ ଆବେଦନ କରିଛୁ। ପ୍ରାର୍ଥୀମାନେ ସେମାନଙ୍କର ପ୍ରସଙ୍ଗ ଉଠାଇଛନ୍ତି। ନିଟ୍ ପିଜି ୨୦୨୧ ପାଇଁ ଚାଲିଥିବା କାଉନସେଲିଂ ତାରିଖର ଅସଙ୍ଗତି / ବିବାଦ ହେତୁ ଅଭିଯୋଗ କରାଯାଇଛି।
ଯେହେତୁ ନିଟ୍ ପିଜି କାଉନସେଲିଂ ବିଳମ୍ବ ହେଉଛି, ନିଟ୍ ପିଜି ପରୀକ୍ଷା ଦିନ ଏବଂ କାଉନସେଲିଂ ମଧ୍ୟରେ କମ୍ ବ୍ୟବଧାନ ହେତୁ ଛାତ୍ରଛାତ୍ରୀମାନେ ପରୀକ୍ଷା ତାରିଖ ସ୍ଥଗିତ ରଖିବାକୁ ଅନୁରୋଧ କରୁଛନ୍ତି। ସମ୍ପ୍ରତି ସ୍ୱାସ୍ଥ୍ୟ ଏବଂ ପରିବାର କଲ୍ୟାଣ ମନ୍ତ୍ରଣାଳୟର ସୂତ୍ରରୁ ପ୍ରକାଶ ଯେ, ନିଟ୍ ପିଜିର ସ୍ଥଗିତାଦେଶ ସମ୍ଭବ ନୁହେଁ ଏବଂ କାର୍ଯ୍ୟସୂଚୀ ଅନୁଯାୟୀ ମେ ୨୧ ତାରିଖରେ ପରୀକ୍ଷା ଅନୁଷ୍ଠିତ ହେବ। କେନ୍ଦ୍ର ସ୍ୱାସ୍ଥ୍ୟମନ୍ତ୍ରୀ ମାନସୁଖ ମାଣ୍ଡଭିଆଙ୍କ ଉପସ୍ଥିତିରେ ଏପ୍ରିଲ ୩୦ ତାରିଖ ଶନିବାର ଦିନ ଏକ ବୈଠକରେ ଏହି ନିଷ୍ପତ୍ତି ନିଆଯାଇଛି।
ଏହି ସମୟରେ, ନିଟ୍ ପିଜିର ଆଶାୟୀ ଏବଂ ଅନେକ ଡାକ୍ତର ସଙ୍ଗଠନ ରାଷ୍ଟ୍ରପତି ରାମ ନାଥ କୋବିନ୍ଦ, ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ ଏବଂ ସ୍ୱାସ୍ଥ୍ୟମନ୍ତ୍ରୀଙ୍କୁ ପରୀକ୍ଷା ସ୍ଥଗିତ ରଖିବା ଲାଗି ଚିଠି ଲେଖିଛନ୍ତି।