ସୀତାରାମ ଅଗ୍ରୱାଲ
ଟାଙ୍ଗୀ: ଆଜି ଖୋର୍ଦ୍ଧା ଜିଲ୍ଲା ଟାଙ୍ଗୀ ପୋଲିସ୍ ର ଏକ ପ୍ରଶଂସନୀୟ କାର୍ଯ୍ୟ ଦେଖିବାକୁ ମିଳିଛି। ତ୍ଵରିତ ପଦକ୍ଷେପ ଯୋଗୁଁ ଜାତୀୟ ରାଜପଥରେ ଟ୍ରକ୍ ରୁ ପଡି ଯାଇଥିବା ୩ ଲକ୍ଷରୁ ଅଧିକ ଟଙ୍କାର ଲୁଗା ସାମଗ୍ରୀକୁ ସୁରକ୍ଷିତ ଭାବେ ଉଦ୍ଧାର କରିପାରିଛି। ପରେ ଉକ୍ତ ଲୁଗା ସାମଗ୍ରୀକୁ ଉଦ୍ଧାର କରି ଟ୍ରକ୍ ଚାଳକଙ୍କୁ ପୋଲିସ ହସ୍ତାନ୍ତର କରିଛି। ଏ ନେଇ ଟାଙ୍ଗୀ ପୋଲିସ୍ କୁ ଟ୍ରକ୍ ଚାଳକ ଧନ୍ୟବାଦ ଜଣାଇଛି।
ସୂଚନା ଅନୁଯାୟୀ, ରଣପୁର ଅଂଚଳର ଜଣେ ଡ୍ରାଇଭର ଆଇଚର ଟ୍ରକ୍ ରେ ସାମଗ୍ରୀ ଭର୍ତ୍ତି କରି ଇଛାପୁରରୁ ଭୁବନେଶ୍ୱର ବାହାରିଥିଲା। ୧୬ ନଂ ଜାତୀୟ ରାଜପଥ ରେ ଆଇଚର ଟ୍ରକ୍ ଆସିବା ବେଳେ ଖୋର୍ଦ୍ଧା ଜିଲା ଟାଙ୍ଗୀ ଥାନା କୋଚିଲା ଛକ ନିକଟରେ ଟ୍ରକ୍ ରୁ ୩ ଟି ଲୁଗା ପେଟି ଖସି ପଡିଥିଲା। ଟ୍ରକ୍ ରୁ ଲୁଗା ସାମଗ୍ରୀ ଖସିବା ପରେ ପଛରେ ଆସୁଥିବା ଅନ୍ୟ ଗାଡି ଚାଳକମାନେ ସମ୍ପୃକ୍ତ ଗାଡି ଡ୍ରାଇଭରକୁ ସୂଚନା ଦେଇଥିଲେ। ଏହାପରେ ଆଇଚର ଟ୍ରକ୍ ଡ୍ରାଇଭର ଚିଲିକା ଡ୍ରାଇଭର ମହାସଂଘକୁ ଯୋଗାଯୋଗ କରିଥିଲେ।
ଚିଲିକା ଡ୍ରାଇଭର ମହାସଂଘ ଟାଙ୍ଗି ପୋଲିସର ହୋଇଥିଲା ଦ୍ୱାରସ୍ଥ। ତୁରନ୍ତ ଟାଙ୍ଗୀ ଥାନା ଆଇଆଇସି ବିଜୟ କୁମାର ମଲିକ ୨ ଟି ସହାୟତରେ ସମ୍ପୃକ୍ତ ଅଂଚଳକୁ କରିଥିଲେ ନାକା ବନ୍ଦି। ପରେ ଲୁଗା ଗାଣ୍ଠିକୁ ପୋଲିସ୍ ଉଦ୍ଧାର କରିଥିଲା।
ଉଦ୍ଧାର ହୋଇଥିବା ଲୁଗା ପଟାର ମୁଲ୍ୟ ୩ ଲକ୍ଷ ଟଙ୍କାରୁ ଅଧିକ ହେବ ବୋଲି ଜଣା ପଡିଛି। ସମ୍ପୃକ୍ତ ଗାଡି ଚାଳକଙ୍କୁ ଟାଙ୍ଗୀ ଥାନାରେ ସମସ୍ତ ଲୁଗା ପଟା ହସ୍ତାନ୍ତର କରାଯାଇଛି। ଏନେଇ ଓଡ଼ିଶା ଡ୍ରାଇଭର ମହାସଙ୍ଘ ଟାଙ୍ଗୀ ପୋଲିସକୁ ଧନ୍ୟବାଦ ଜଣାଇଛି।
