ବେଙ୍ଗାଲୁରୁ: ବୌଦ୍ଧ ପୂର୍ଣ୍ଣିମା ଅବସରରେ ବେଙ୍ଗାଲୁରୁରେ ପଶୁ ବଳି ଏବଂ ମାଂସ ବିକ୍ରି ଉପରେ ବାରଣ କରାଯାଇଛି। ଧାର୍ମିକ ଉତ୍ସବକୁ ଦୃଷ୍ଟିରେ ରଖି ଗ୍ରେଟର ବାଙ୍ଗାଲୋର ମ୍ୟୁନିସିପାଲିଟି କର୍ପୋରେସନ୍ ଉକ୍ତ ନିଷେଧାଦେଶକୁ କାର୍ଯ୍ୟକାରୀ କରିଛି। ଏହାପୂର୍ବରୁ ରାମ ନବମୀ ଅବସରରେ ପଶୁ ବଳି ଏବଂ ମାଂସ ବିକ୍ରି ଉପରେ ପ୍ରତିବନ୍ଧକ ଲଗାଇଥିଲା।
ବିବିଏମପି ମୁଖ୍ୟଙ୍କ ଦ୍ଵାରା ଜାରି କରାଯାଇଥିବା ଆଦେଶରେ କୁହାଯାଇଛି ଯେ, ରାମ ନବମୀ, ଗାନ୍ଧୀ ଜୟନ୍ତୀ, ସର୍ବୋଦୟ ଦିବସ ସମେତ ଅନ୍ୟ ଧାର୍ମିକ ଉତ୍ସବରେ ପ୍ରତିବର୍ଷ ମାଂସ ବିକ୍ରୟ ନିଷେଧ ହେବ। ମ୍ୟୁନିସିପାଲିଟିର ଏହି ନିଷ୍ପତ୍ତି ଏପରି ସମୟରେ ଆସିଛି, ଯେତେବେଳେ ଦେଶର ରାଜଧାନୀ ଦିଲ୍ଲୀର ଦକ୍ଷିଣ ଏବଂ ପୂର୍ବ ଭାଗରେ ଥିବା ମେୟରମାନେ ଚୈତ ନବରାତ୍ରୀ ସମୟରେ ନିଜ ନିଜ ଅଧୀନରେ ଥିବା ମାଂସ ଦୋକାନଗୁଡ଼ିକୁ ବନ୍ଦ କରିବାକୁ ନିର୍ଦ୍ଦେଶ ଦେଇଥିଲେ। ତେବେ ସଂପୃକ୍ତ କର୍ତ୍ତୃପକ୍ଷ ଏ ବାବଦରେ କୌଣସି ଲିଖିତ ନିର୍ଦ୍ଦେଶ ଦେଇନାହାଁନ୍ତି।
ସୂଚନାଯୋଗ୍ୟ ଯେ ଏହି ସମଗ୍ର ପ୍ରସଙ୍ଗରେ ବହୁତ ହଙ୍ଗାମା ହୋଇଥିଲା। ଏହି ମାମଲା ସଂସଦରେ ପହଞ୍ଚିଥିଲା। ସଂସଦରେ ଏହି ପ୍ରସଙ୍ଗ ଉଠାଇ ଟିଏମସି ସାଂସଦ ମହୁଆ ମିତ୍ର କହିଥିଲେ ଯେ, ଯେତେବେଳେ ସମ୍ବିଧାନ ଆମକୁ ମାଂସାହାରୀ ଖାଦ୍ୟ ଖାଇବାକୁ ଅଧିକାର ଦେଇଥାଏ, ତେବେ ଏହାକୁ ରୋକିବା ପାଇଁ ପ୍ରଶାସନ କିଏ? ବୌଦ୍ଧ ଧର୍ମର ପ୍ରତିଷ୍ଠାତାଗୌତମ ବୁଦ୍ଧଙ୍କ ଜନ୍ମକୁ ସ୍ମରଣ କରିବା ପାଇଁ ବୁଦ୍ଧ ପୂର୍ଣ୍ଣିମା ପାଳନ କରାଯାଏ। ଏହି ବର୍ଷ ଏହାକୁ ମଇ ୧୬ ତାରିଖରେ ପାଳନ କରାଯିବ।
