କଂଗ୍ରେସ ସଭାପତି ରାହୁଲ ଗାନ୍ଧୀଙ୍କୁ ତୋପ ଏବଂ ନିଜକୁ ଏକେ ୪୭ ସହିତ ତୁଳନା କରିଛନ୍ତି କଂଗ୍ରେସ ନେତା ନଭଜୋତ ସିଂ ସିଦ୍ଧୁ । ଏହା ସହିତ ସିଦ୍ଧୁ କହିଛନ୍ତି, ରାଫାଲେ ମାମଲାରେ ମୋଦି ଉତ୍କୋଚ ନେଇଛନ୍ତି କି ନା ମୁଁ ତାଙ୍କୁ ପ୍ରଶ୍ନ କରିବାକୁ ଚାହୁଁଛି । ରାହୁଲ ହେଉଛନ୍ତି ତୋପ ଏବଂ ମୁଁ ଏକେ ୪୭, ଯେ କୌଣସି ସ୍ଥାନରେ ମୋଦିଙ୍କ ସହିତ ବିତର୍କ ପାଇଁ ଆମେ ପ୍ରସ୍ତୁତ ବୋଲି କହିଛନ୍ତି ସିଦ୍ଧୁ । ରାଫାଲେ ମାମଲାରେ ପ୍ରଧାନମନ୍ତ୍ରୀଙ୍କୁ ଆକ୍ରମଣ କରିବାକୁ ଯାଇ ହିମାଚଳ ପ୍ରଦେଶର ବିଳାସପୁରରେ ଏକ ନିର୍ବାଚନୀ ସଭାରେ ଏହି ମନ୍ତବ୍ୟ ଦେଇଛନ୍ତି ସିଦ୍ଧୁ । ୨୦୧୪ ନିର୍ବାଚନରେ ନିଜକୁ ଗଙ୍ଗାପୁତ୍ର କହି କ୍ଷମତାକୁ ଆସିଥିବା ମୋଦି ରାଫାଲେ ଚୁକ୍ତିର ଏଜେଣ୍ଟ ହୋଇ କ୍ଷମତାରୁ ବିଦାୟ ନେବେ ବୋଲି ସିଦ୍ଧୁ କହିଛନ୍ତି । ମୋଦିଙ୍କ ମନ୍ତବ୍ୟ ‘ନା ଖାଇବି, ନା ଖାଇବାକୁ ଦେବି’ ଉପରେ କହିଥିଲେ ଏହା ଉପରେ ମୋ ସହିତ ଖୋଲା ବିତର୍କ ପାଇଁ ମୁଁ ମୋଦିଙ୍କୁ ଆହ୍ବାନ କରୁଛି । ଯଦି ମୁଁ ପରାଜିତ ହେବି ତେବେ ରାଜନୀତି ଛାଡିଦେବି ବୋଲି କହିଛନ୍ତି ସିଦ୍ଧୁ ।
