ନୂଆଦିଲ୍ଲୀ: ଘରୋଇ ସଂସ୍ଥା ଜରିଆରେ ଏଫଏମ ରେଡିଓ ପ୍ରସାରଣ ସେବାର ସମ୍ପ୍ରସାରଣ (ତୃତୀୟ ପର୍ଯ୍ୟାୟ) ଉପରେ ଆଧାରିତ ନୀତିଗତ ମାର୍ଗଦର୍ଶିକାରେ ଥିବା କେତେକ ବ୍ୟବସ୍ଥାରେ ସଂଶୋଧନ ପ୍ରସ୍ତାବକୁ ସରକାର ମଞ୍ଜୁର କରିଛନ୍ତି। ଏହାକୁ ଘରୋଇ ଏଫଏମ ପର୍ଯ୍ୟାୟ- III ନୀତିଗତ ମାର୍ଗଦର୍ଶିକା ଭାବେ ମାନ୍ୟତା ଦିଆଯାଇଛି। ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀଙ୍କ ଅଧ୍ୟକ୍ଷତାରେ ଅନୁଷ୍ଠିତ ଶେଷ କ୍ୟାବିନେଟ ବୈଠକରେ ଏହି ନିଷ୍ପତ୍ତି ନିଆଯାଇଛି।
ଏ ଦିଗରେ, ୧୫ ବର୍ଷର ଅବଧି ପାଇଁ ଲାଇସେନ୍ସ ପାଇଥିବା ଗୋଟିଏ ପରିଚାଳନା ସଂସ୍ଥା ମଧ୍ୟରେ ଏଫଏମ ରେଡିଓ ଷ୍ଟେସନ ପୁନଃନିର୍ମାଣ ଅନୁମତି ପାଇବା ଲାଗି ୩ ବର୍ଷର ୱିଣ୍ଡୋ ଅବଧିକୁ ଉଚ୍ଛେଦ କରିବା ଲାଗି ସରକାର ନିଷ୍ପତ୍ତି ନେଇଛନ୍ତି । ଚାନେଲ ହୋଲ୍ଡିଂ ଉପରେ ୧୫% ନେସନାଲ କ୍ୟାପ୍ ଉଚ୍ଛେଦ ପାଇଁ ରେଡିଓ ଉଦ୍ୟୋଗ ପକ୍ଷରୁ କରାଯାଇ ଆସୁଥିବା ଦୀର୍ଘ ଦିନର ଦାବିକୁ ମଧ୍ୟ ସରକାର ଗ୍ରହଣ କରି ନେଇଛନ୍ତି । ଆହୁରି ଏଫଏମ ରେଡିଓ ନୀତିରେ ଆର୍ଥିକ ଯୋଗ୍ୟତା ସର୍ତ୍ତାବଳୀକୁ ସରଳ କରାଯାଇଛି । ଫଳରେ ଏଣିକି ମାତ୍ର ୧ କୋଟି ଟଙ୍କାର ମୋଟ୍ କାରବାର କ୍ଷମତା ଥିବା କମ୍ପାନୀ ‘ସି’ ଏବଂ ‘ଡି’ ବର୍ଗର ସହର ପାଇଁ ନିଲାମୀ ବା ବିଡିଂରେ ଅଂଶଗ୍ରହଣ କରିପାରିବେ । ପୂର୍ବରୁ ଏହି ଆର୍ଥିକ କ୍ଷମତା ଦେଢ଼ କୋଟି ଟଙ୍କା ଥିଲା।
ଏହି ତିନୋଟି ସଂଶୋଧନ ଘରୋଇ ଏଫଏମ ରେଡିଓ ଉଦ୍ୟୋଗକୁ ସମ୍ପୂର୍ଣ୍ଣ ଆର୍ଥିକ ବିକାଶର ଲାଭ ପ୍ରଦାନ କରିବା ସହିତ ଦେଶର ଟିୟର- III ସହରରେ ଏଫଏମ ରେଡିଓ ଏବଂ ମନୋରଞ୍ଜନ ଷ୍ଟେସନର ଅଧିକ ସମ୍ପ୍ରସାରଣ ପାଇଁ ମାର୍ଗ ପ୍ରଶସ୍ତ କରିବ । ସରକାରଙ୍କ ଏହି ନିଷ୍ପତ୍ତି ନୂଆ ନିଯୁକ୍ତି ସୁଯୋଗ ସୃଷ୍ଟି କରିବା ସହିତ ଫ୍ରି ଟୁ ଏୟାର (ଏଫଟିଏ) ରେଡିଓ ମିଡିଆ ସ୍ଥାନରେ ସଙ୍ଗୀତ ଓ ମନୋରଞ୍ଜନ ସେବାକୁ ଦେଶର ଉପାନ୍ତ ଅଞ୍ଚଳରେ ଥିବା ସାଧାରଣ ଲୋକଙ୍କ ପହଞ୍ଚାଇବାରେ ସହାୟକ ହେବ।
ଦେଶରେ ବ୍ୟବସାୟିକ ସୁଗମତାରେ ସୁଧାର ଆଣିବା ଲାଗି ସରକାର ବର୍ତ୍ତମାନର ନିୟମକୁ ଅଧିକ ସରଳ ଏବଂ ଯୁକ୍ତିସଙ୍ଗତ କରୁଛନ୍ତି। ଏହାଦ୍ବାରା ପ୍ରଶାସନ ଅଧିକ ଦକ୍ଷ ଓ ପ୍ରଭାବୀ ହେବା ସହ ସାଧାରଣ ଲୋକଙ୍କୁ ଲାଭ ମିଳିପାରୁଛି।
