ନୂଆଦିଲ୍ଲୀ: ନଭେମ୍ବର ୧୧ ତାରିଖ ବାଙ୍ଗାଲୋର ପାଇଁ ଏକ ବିଶେଷ ଦିନ ହେବାକୁ ଯାଉଛି। ଆସନ୍ତାକାଲି ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ ବେଙ୍ଗାଲୁରୁର ପ୍ରତିଷ୍ଠାତା ନାଦପ୍ରଭୂ କେମ୍ପେଗୋଡାଙ୍କ ୧୦୮ ଫୁଟ ଉଚ୍ଚତା ବିଶିଷ୍ଟ ପ୍ରତିମୂର୍ତ୍ତିକୁ ଉନ୍ମୋଚନ କରିବେ। ଏହା ସହରର ପ୍ରତିଷ୍ଠାତାଙ୍କର ପ୍ରଥମ ଏବଂ ଉଚ୍ଚତମ ପିତ୍ତଳ ପ୍ରତିମୂର୍ତ୍ତି। ବେଙ୍ଗାଲୁରୁର ବିକାଶରେ କେମ୍ପେଗୋଡାଙ୍କ ଅବଦାନକୁ ସ୍ମରଣ କରି ‘ଷ୍ଟାଚ୍ୟୁ ଅଫ୍ ପ୍ରସ୍ପରିଟି’ ନାମକ ଏହି ପ୍ରତିମୂର୍ତ୍ତି ନିର୍ମାଣ କରାଯାଇଛି।
କର୍ଣ୍ଣାଟକ ମୁଖ୍ୟମନ୍ତ୍ରୀ ବସଭରାଜ ବମ୍ମାଇ ବୁଧବାର ଦିନ ‘ୱାର୍ଲ୍ଡ ବୁକ୍ ଅଫ୍ ରେକର୍ଡସ’ର ଏକ ସାର୍ଟିଫିକେଟ୍ ସହ ଟ୍ୱିଟ୍ କରି କହିଛନ୍ତି ଯେ, ୱାର୍ଲ୍ଡ ବୁକ୍ ଅଫ୍ ରେକର୍ଡ ଅନୁଯାୟୀ’ ଷ୍ଟାଚ୍ୟୁ ଅଫ୍ ପ୍ରସ୍ପରିଟି କୌଣସି ଏକ ସହରର ସଂସ୍ଥାପକଙ୍କ ପ୍ରଥମ ଓ ସବୁଠୁ ଉଚ୍ଚତା ବିଶିଷ୍ଟ ପିତ୍ତଳ ପ୍ରତିମୂର୍ତ୍ତି। ବେଙ୍ଗାଲୁରୁର ପ୍ରତିଷ୍ଠାତା କେମ୍ପେଗୋଡାଙ୍କୁ ଏହା ଉପଯୁକ୍ତ ଶ୍ରଦ୍ଧାଞ୍ଜଳି। ୧୦୮ ଫୁଟ ଉଚ୍ଚତା ବିଶିଷ୍ଟ ଏହି ପ୍ରତିମୂର୍ତ୍ତି ବିଶ୍ୱସ୍ତରୀୟ ସହର ତିଆରି କରିବାର ଚିନ୍ତାଧାରାର ପ୍ରତୀକ ଅଟେ। ”
ଉଲ୍ଲେଖ ଯୋଗ୍ୟ ଯେ, ପ୍ରାୟ ୨୨୦ ଟନ୍ ଓଜନ ବିଶିଷ୍ଟ ଏହି ପ୍ରତିମୂର୍ତ୍ତି ଏଠାରେ କେମ୍ପେଗୋଡା ଅନ୍ତର୍ଜାତୀୟ ବିମାନବନ୍ଦରରେ ସ୍ଥାପିତ ହୋଇଛି। ଏଥିରେ ଖଣ୍ଡାର ଓଜନ ଚାରି ଟନ୍। ଏହି ପ୍ରକଳ୍ପରେ ୧୬ ଶତାବ୍ଦୀର ଶାସକ କେମ୍ପେଗୋଡାଙ୍କୁ ଉତ୍ସର୍ଗୀକୃତ ୨୩ ଏକର ପରିମିତ ଏକ ଐତିହ୍ୟ ଥିମ୍ ପାର୍କ ମଧ୍ୟ ଅନ୍ତର୍ଭୁକ୍ତ। ଉଭୟ ନିର୍ମାଣ ପାଇଁ ପ୍ରାୟ ୮୪ କୋଟି ଟଙ୍କା ଖର୍ଚ୍ଚ ହୋଇଛି। ପ୍ରଖ୍ୟାତ ଶିଳ୍ପୀ ତଥା ପଦ୍ମ ଭୂଷଣ ପୁରସ୍କାର ପ୍ରାପ୍ତ ରାମ ବନଜୀ ସୂତାର ଏହି ପ୍ରତିମୂର୍ତ୍ତିକୁ ଡିଜାଇନ୍ କରିଛନ୍ତି। ଗୁଜୁରାଟର ସର୍ଦ୍ଦାର ବଲ୍ଲଭଭାଇ ପଟେଲଙ୍କ ‘ଷ୍ଟାଚ୍ୟୁ ଅଫ୍ ୟୁନିଟି’ ଏବଂ ବେଙ୍ଗାଲୁରୁର ବିଧାନ ସୌଧ ଠାରେ ମହାତ୍ମା ଗାନ୍ଧୀଙ୍କ ପ୍ରତିମୂର୍ତ୍ତିକୁ ମଧ୍ୟ ସେ ଡିଜାଇନ୍ କରିଥିଲେ।