ଭୁବନେଶ୍ୱର : ମହିଳା ଓ ଶିଶୁ ବିକାଶ ବିଭାଗ ପକ୍ଷରୁ ପ୍ରଥମ କରି ଏକ ସଂପୂର୍ଣ୍ଣ ଆପ୍ ମାଧ୍ୟମରେ ତାଲିମ ବ୍ୟବସ୍ଥାକୁ ଆଜି ମହିଳା ଓ ଶିଶୁ ବିକାଶ ମନ୍ତ୍ରୀ ଶ୍ରୀମତୀ ବାସନ୍ତୀ ହେମ୍ବ୍ରମ୍ ଲୋକାର୍ପଣ କରିଛନ୍ତିି ।
ଏହି ଅବସରରେ ସମସ୍ତ ଆଇସିଡିଏସ୍ କର୍ମକର୍ତ୍ତା ଏବଂ ଅଙ୍ଗନବାଡ଼ି କର୍ମୀ, କାର୍ଯ୍ୟରତ ସୁପରଭାଇଜର ଓ ଶିଶୁ ବିକାଶ ଅଧିକାରୀମାମାନଙ୍କୁ ହାର୍ଦ୍ଦିକ ଶୁଭେଚ୍ଛା ଓ ଅଭିନନ୍ଦନ ଜଣାଇ ମନ୍ତ୍ରୀ ଶ୍ରୀମତୀ ବାସନ୍ତୀ ହେମ୍ବ୍ରମ୍ କହିଲେ ଯେ, ମୋ ବିଭାଗର ନୂତନ କାର୍ଯ୍ୟକ୍ରମ କ୍ଷେତ୍ରରେ ଏହା ଏକ ମାଇଲଖୁଣ୍ଟ ସାବ୍ୟସ୍ତ ହେବ । କୋଭିଡ୍-୧୯ ସମୟରେ ବିଭିନ୍ନ ଦକ୍ଷତା ବିକାଶ ଶୈଳୀ ମଧ୍ୟରୁ ଡିଜିଟାଲ୍ ସାକ୍ଷରତାକୁ ପ୍ରାଧାନ୍ୟ ଦେଇଆସିଛୁ । ଏହି ଆପ୍ ମାଧ୍ୟମରେ ସମସ୍ତ ଅଙ୍ଗନବାଡ଼ି କର୍ମୀ, କାର୍ଯ୍ୟରତ ସୁପରଭାଇଜର ଓ ଶିଶୁ ବିକାଶ ଅଧିକାରୀମାନେ ଆଦ୍ୟଶୈଶବ ଯନି ଓ ଅନନ୍ୟ ଶିକ୍ଷା କାର୍ଯ୍ୟକ୍ରମ ‘ଇ-ଅରୁଣିମା’ ସମ୍ବନ୍ଧରେ ଉପାଦେୟ ଶିକ୍ଷା ଓ ତାଲିମ ପାଇପାରିବେ ।
ମନ୍ତ୍ରୀ ଶ୍ରୀମତୀ ହେମ୍ବ୍ରମ୍ କହିଲେ ଯେ ଶୈଶବ ଜୀବନର ଅତ୍ୟନ୍ତ ଗୁରୁତ୍ୱପୂର୍ଣ୍ଣ ସମୟ । ଏହି ଆଦ୍ୟବର୍ଷଗୁଡ଼ିକରେ ଶିଶୁମାନଙ୍କ ଦ୍ରୁତ ବିକାଶ ଓ ବୃଦ୍ଧି ଘଟୁଥିବାରୁ ଏହି ବର୍ଷଗୁଡ଼ିକ ଅତ୍ୟନ୍ତ ମହତ୍ତ୍ୱପୂର୍ଣ୍ଣ । ଏହି ସମୟରେ ସେମାନଙ୍କ ଜୀବନର ମୂଳଦୁଆ ପଡ଼ିଥାଏ । ଯଦି ସେମାନଙ୍କ ପ୍ରାରମ୍ଭିକ ସୋପାନ ଦୃଢ଼ ହୋଇଥାଏ, ତେବେ ବିକାଶର ପରବର୍ତ୍ତୀ ସୋପାନରେ ଉନ୍ନତି ଘଟିଥାଏ । ପ୍ରାରମ୍ଭିକ ବର୍ଷଗୁଡ଼ିକରେ ଶିଶୁମାନଙ୍କୁ ଗୁଣାତ୍ମକ ମୂଳଦୁଆ ପ୍ରଦାନ କରାଗଲେ ତାହା ପରବର୍ତ୍ତୀ ସମୟରେ ସର୍ବାଧିକ ସୁଫଳ ଦେଇଥାଏ ।
ଶିଶୁମାନଙ୍କ ପାଇଁ ଏହି ଉତ୍ତମ ମୂଳଦୁଆ ପକାଇବାର ଗୁରୁଦାୟିତ୍ୱ ପିତାମାତା, ପରିବାରବର୍ଗ ଓ ମୋ ବିଭାଗର ସମସ୍ତ କର୍ମକର୍ତ୍ତା ଓ ପଦାଧିକାରୀଙ୍କ ଉପରେ ନ୍ୟସ୍ତ । ଏହି ଲକ୍ଷ୍ୟ ଓ ଆଭିମୁଖ୍ୟକୁ ନିଷ୍ଠାର ଓ ଦାୟିତ୍ୱର ସହ ସଂପାଦନ କରିବା ନିମନ୍ତେ ଗୁଣାତ୍ମକ ତାଲିମର ବ୍ୟବସ୍ଥା ନିହାତି ଆବଶ୍ୟକ । ସମସ୍ତ ଆଇସିଡିଏସ୍ କର୍ମକର୍ତ୍ତା ସେଥିପାଇଁ ନିଯୁକ୍ତି ସମୟରୁ ହିଁ ବିଭିନ୍ନ ତାଲିମ ଯଥା: Job Course, Refresher Course H Theme Based Training ନେଇଥାନ୍ତି । ଏହି ତାଲିମଗୁଡ଼ିକ ଯୋଗୁଁ ସେମାନଙ୍କ ଦ୍ୱାରା ସମାହିତ ବିଭିନ୍ନ କାର୍ଯ୍ୟକ୍ରମ ସଂପନ୍ନ କରିବାର ଜ୍ଞାନକୌଶଳ ସୁଦୃଢ଼ ହୋଇଥାଏ ଓ ଉନ୍ନତ ମାର୍ଗଦର୍ଶନ ମଧ୍ୟ ମିଳିଥାଏ ।
ଶିଶୁର ବିକାଶ ଓ ପ୍ରାକ୍ ବିଦ୍ୟାଳୟ ଶିକ୍ଷା ପ୍ରଶିକ୍ଷଣକୁ ଗୁରୁତ୍ୱ ଦେଇ ରାଜ୍ୟ ସରକାର ‘ଇ-ଅରୁଣିମା’ ଆରମ୍ଭ କରିଛନ୍ତି । ପ୍ରତ୍ୟେକ ଶିଶୁ ଅନନ୍ୟ ଓ ସ୍ୱତନ୍ତ୍ର ଏବଂ ତାଙ୍କର ଶିକ୍ଷା ଗ୍ରହଣ କରିବାର ଶକ୍ତି ଓ ଶୈଳୀ ଭିନ୍ନ । ତେଣୁ ଶିଶୁର ମନସ୍ତତ୍ତ୍ୱର ନମନୀୟତାକୁ ବୁଝି ସହଜ, ସରଳ ଓ ଆନନ୍ଦଦାୟକ ଶିକ୍ଷା ମାତୃଭାଷାରେ ପ୍ରଦାନ କଲେ ଏହା ପ୍ରତ୍ୟେକ ଶିଶୁଙ୍କ ଶିକ୍ଷାଦାନ କ୍ଷେତ୍ରରେ ଅନୁକୂଳ ପରିବେଶ ସୃଷ୍ଟି କରିବ ।
ଡିଜିଟାଲ ଶିକ୍ଷଣ ସମ୍ବନ୍ଧୀୟ ତାଲିମକୁ ଆଗ୍ରହ ଓ ସଫଳତାର ସହ ସଂପନ୍ନ କରିଥିବାରୁ ସମସ୍ତ ଆଇସିଡିଏସ୍ କର୍ମକର୍ତ୍ତା ଏବଂ ଅଙ୍ଗନବାଡ଼ି କର୍ମୀମାନଙ୍କୁ ମନ୍ତ୍ରୀ ଧନ୍ୟବାଦ ଜଣାଇଥିଲେ ।
‘ଇ-ଅରୁଣିମା’ ମାଧ୍ୟମରେ ପ୍ରଶିକ୍ଷଣକୁ ସଫଳତାର ସହିତ ଶେଷ କରି ଶିଶୁମାନଙ୍କ ପାଇଁ ନିଆଯାଉଥିବା କାର୍ଯ୍ୟକ୍ରମକୁ ସମସ୍ତ ଅଙ୍ଗନବାଡ଼ି କର୍ମୀ, କାର୍ଯ୍ୟରତ ସୁପରଭାଇଜର ଓ ଶିଶୁ ବିକାଶ ଅଧିକାରୀମାନେ ରାଜ୍ୟରେ ଆହୁରି ସୁଦୃଢ଼ ଓ ବଳିଷ୍ଠ କରିବେ ବୋଲି ମନ୍ତ୍ରୀ ଶ୍ରୀମତୀ ହେମ୍ବ୍ରମ୍ କାମନା କରିଥିଲେ ।
ମହିଳା ଓ ଶିଶୁ ବିକାଶ ବିଭାଗ ସମ୍ମିଳନୀ କକ୍ଷରେ ଆୟୋଜିତ ଏହି କାର୍ଯ୍ୟକ୍ରମରେ ବିଭାଗୀୟ କମିଶନର-ତଥା-ଶାସନ ସଚିବ ଶ୍ରୀମତୀ ଶୁଭା ଶର୍ମା, ୟୁନିସେଫ, ଦିଲ୍ଲୀର ପ୍ରତିନିଧି ସୁନିଶା ଆହୁଜା, ୟୁନିସେଫ୍ ରାଜ୍ୟ କାର୍ଯ୍ୟାଳୟର ଅଧିକାରୀ ସୁଗତ ରାୟ, ଶିକ୍ଷା ବିଶେଷଜ୍ଞ ଲଳିତା ପଟ୍ଟନାୟକ, ଇସିସିଇର ପରାମର୍ଶଦାତା ଓ ବିଭାଗୀୟ ଉଚ୍ଚ ଅଧିକାରୀମାନେ ଉପସ୍ଥିତ ଥିଲେ ।
