ଖୋର୍ଦ୍ଧା: ଜିଲ୍ଲାସ୍ତରୀୟ ବିଶ୍ବ ଏଡସ ଦିବସ ପାଳିତ ହୋଇଛି। ଜିଲ୍ଲା ସ୍ବାସ୍ଥ୍ୟ ସମିତି ଏବଂ ଜିଲ୍ଲା ଏଡସ୍ ପ୍ରତିରୋଧ ଏବଂ ନିୟନ୍ତ୍ରଣ ୟୁନିଟି ମିଳିତ ଆନୁକୂଲ୍ୟ ଏବଂ ତାଲୁକ ଆଇନ ସେବା ସମିତି ସୌଜନ୍ୟରେ ସ୍ଥାନୀୟ ଜିଲ୍ଲା ଶିକ୍ଷା ତାଲିମ କେନ୍ଦ୍ର ସମ୍ମିଳନୀ କକ୍ଷରେ ଉକ୍ତ ଦିବସ ପାଳିତ ହୋଇଛି।
ଜିଲ୍ଲା ସ୍ବତନ୍ତ୍ର ବିଚାରପତି ସୁରେନ୍ଦ୍ର ପାଢୀ ମୁଖ୍ୟଅତିଥି ଭାବେ ଯୋଗ ଦେଇଥିବା ବେଳେ ଜିଲ୍ଲା ମୁଖ୍ୟ ଚିକିତ୍ସାଧାରୀ ଡଃ ଆର୍ତ୍ତବନ୍ଧୁ ନାୟକ ସଭାପତିତ୍ବ କରିଥିଲେ। ଚଳିତବର୍ଷର ବିଷୟବସ୍ତୁ “ସମାନତା” ଉପରେ ଆଲୋଚନା କରାଯାଇଥିଲା। ଏଡସ ନିରାକରଣ ଏବଂ ସଚେତନତା ସୃଷ୍ଟିରେ ମହିଳା ମାନଙ୍କ ବଳିଷ୍ଠ ଭୂମିକା ରହିଛି। ଅଜ୍ଞାନତା ଜୀବନକୁ ବେଳେ ବେଳେ ଅନ୍ଧକାର ମଧ୍ୟକୁ ଠେଲି ଦେଇଥାଏ। ମାତ୍ର ସଚେତନତା ଓ ସଂଯମତା ମଣିଷକୁ ଅନେକ ବିପତ୍ତିରୁ ରକ୍ଷା କରିଥାଏ। ଏଚଆଇଭି ଆକ୍ରାନ୍ତ ବ୍ୟକ୍ତିଙ୍କୁ ସମାଜର ମୁଖ୍ୟସ୍ରୋତକୁ ଫେରାଇ ଆଣିବାକୁ ସମସ୍ତ ସ୍ତରରେ ଉଦ୍ୟମର ଆବଶ୍ୟକତା ରହିଥିବା ମୁଖ୍ୟଅତିଥି କହିଛନ୍ତି। ସେହିଭଳି ଜିଲ୍ଲା ମୁଖ୍ୟ ଚିକିତ୍ସାଧିକାରୀ ଉପସ୍ଥିତ ସମସ୍ତଙ୍କୁ ନୈତିକତାର ଶପଥ ପାଠ କରାଇଛନ୍ତି। ଜୀବନକୁ ଗଢି ତୋଳିବାରେ ଅଭିଭାବକ ମାନଙ୍କ ପ୍ରମୁଖ ଭୂମିକା ରହିଥିବା ସେ କହିଥିଲେ।
ସେହିଭଳି ଅନ୍ୟତମ ସମ୍ମାନିତ ଅତିଥି ଭାବେ ଯୋଗଦେଇ ଜିଲ୍ଲା ଶିକ୍ଷା ତଲିମ କେନ୍ଦ୍ରର ଅଧ୍ୟକ୍ଷ ଶ୍ରୀ ତାପସ କୁମାର ନାୟକ, ଖୋରଧା ବାର ଆସୋସିଏସନ୍ ସଭାପତି ଶ୍ରୀ ବିଜୟ କୁମାର ସାମନ୍ତସିଂହାର, ବରିଷ୍ଠ ଶିଶୁ ରୋଗ ବିଶେଷଜ୍ଞ ଡଃ ସୁବ୍ରତ କୁମାର ତ୍ରିପାଠୀ, ପ୍ରାଣନାଥ ସ୍ବୟଂଶାସିତ ମହାବିଦ୍ୟାଳୟ ଅଧ୍ୟାପକ ଶ୍ରୀ ସୁବ୍ରତ କୁମାର ଜଗଦ୍ଦେବ ପ୍ରମୁଖ ଏଡସ୍ ନିରାକରଣ ଓ ସଚେତନତା ଉପରେ ମତବ୍ୟକ୍ତ କରିଥିଲେ।
ଜିଲ୍ଲାରେ ୨୦୦୨ ମସିହା ଠାରୁ ଅକ୍ଟୋବର ୨୦୨୨ ମସିହା ପର୍ଯ୍ୟନ୍ତ ୧୨ ଲକ୍ଷ ୭୪ ହଜାର ୫୫୦ ଜଣଙ୍କ ରକ୍ତ ପରୀକ୍ଷା କରାଯାଇଥିବା ବେଳେ ସେମାନଙ୍କ ମଧ୍ୟରୁ ୩୬୯୫ ଜଣଙ୍କୁ ଏଚଆଇଭି ପଜିଟିଭ୍ ଥିବା ଚିହ୍ନଟ କରାଯାଇଛି। ସେମାନଙ୍କ ମଧ୍ୟରୁ ଜିଲ୍ଲାର ୨୧୩୧ ଜଣ ଥିବା ବେଳେ ଜିଲ୍ଲା ବାହାରର ୧୫୬୪ ଜଣ ରହିଥିବା ଜଣାପଡିଛି। ଏଥିମଧ୍ୟରୁ ଜିଲ୍ଲାର ୧୭୮୭ ଜଣଙ୍କୁ ମଧୁବାବୁ ପେନସନ ଯୋଜନାରେ ସାମିଲ କରାଯାଇଛି।
ଉକ୍ତ ସମୟ ସୀମା ମଧ୍ୟରେ ୨୪୨ ଜଣଙ୍କ ମୃତ୍ୟୁ ହୋଇଥିବା ବେଳେ ସେମାନଙ୍କ ମଧ୍ୟରୁ ୧୪୧ ଜଣ ଖୋରଧାର ହୋଇଥିବା ବେଳେ ୧୦୧ ଜଣ ଜିଲ୍ଲା ବାହାର ବାସିନ୍ଦା ଥିବା ତଥ୍ୟ ରହିଛି।
ଏହି ଉପଲକ୍ଷେ ପିଲା ମାନଙ୍କ ମଧ୍ୟରେ ଏଡସ୍ ସଂକ୍ରାନ୍ତୀୟ କୁଇଜ ପ୍ରତିଯୋଗିତା କରାଯାଇ ସେମାନଙ୍କୁ ପୁରସ୍କୃତ କରାଯିବା ସହ ଦସ୍ତଖତ ଅଭିଯାନ ଅନୁଷ୍ଠିତ ହୋଇଥିଲା। ଏଡସ୍ ସଚେତନତା ଓ ନିରାକରଣ ଉପରେ ଉଲ୍ଲେଖନୀୟ ଅବଦାନ ନିମନ୍ତେ ବିଭିନ୍ନ ଅନୁଷ୍ଠାନ ଗୁଡିକୁ ମଧ୍ୟ ସମ୍ବର୍ଦ୍ଧନା କରାଯାଇଥିଲା।
ଏହି ଅବସରରେ ଅନ୍ୟମାନଙ୍କ ମଧ୍ୟରେ ଡିପିଏମ ବିଧାନ ନାୟକ, ଡିଆଇଏସ କିଶୋର କୁମାର କାନୁନଗୋ, ସଂଯୋଜକ ଉମାକାନ୍ତ ପଣ୍ତା, ଜୟନ୍ତୀବାଳା ସାମନ୍ତରାୟ, ଅଶୋକ କୁମାର ଦାଶ, ବିମଳଚନ୍ଦ୍ର ମାନସିଂ, ବିଭିନ୍ନ ମହାବିଦ୍ୟାଳୟର ଛାତ୍ରଛାତ୍ରୀ, ଶିକ୍ଷକ ଶିକ୍ଷୟିତ୍ରୀ, ବୁଦ୍ଧିଜିବୀ ପ୍ରମୁଖ ଉପସ୍ଥିତ ଥିଲେ।
