ଭୁବନେଶ୍ୱର: କୋଭିଡ ମହାମାରୀ ପରବର୍ତ୍ତୀ ସମୟରେ ବିଭିନ୍ନ ଫୁସ୍ଫୁସ୍ ଜନିତ ସମସ୍ୟା ବୃଦ୍ଧି ପାଉଥିବା ବେଳେ ଯକ୍ଷ୍ମା (ଟିବି) ଭଳି ମାରାତ୍ମକ ବ୍ୟାଧିକୁ ଏତେଟା ଗୁରୁତ୍ୱ ମିଳିପାରୁ ନାହିଁ ବୋଲି ଶନିବାର ମନ୍ତବ୍ୟ ଦେଇଛନ୍ତି ବିଶିଷ୍ଟ ଫୁସ୍ଫୁସ୍ ରୋଗ ବିଶେଷଜ୍ଞ ପ୍ରଫେସର (ଡାକ୍ତର) ଦିଗମ୍ବର ବେହେରା।
ବିଭିନ୍ନ ପ୍ରକାର ଫୁସ୍ଫୁସ୍ ଜନିତ ସମସ୍ୟା ବୃଦ୍ଧି ପାଉଥିବାରୁ ସାରା ଦେଶରେ ଫୁସ୍ଫୁସ୍ ରୋଗ ବିଶେଷଜ୍ଞମାନେ ଏହି ରୋଗର ଚିକିତ୍ସାରେ ବ୍ୟସ୍ତ ରହୁଛନ୍ତି। ତେବେ ଚିରାଚରିତ ଶ୍ୱାସଜନିତ ସମସ୍ୟାକୁ ମଧ୍ୟ ଅଧିକ ଧ୍ୟାନ ଦେବା ଉଚିତ୍ ବୋଲି ଇନ୍ଷ୍ଟିଚ୍ୟୁଟ୍ ଅଫ୍ ମେଡିକାଲ୍ ସାଇନ୍ସେସ୍ ଆଣ୍ଡ ସମ୍ ହସ୍ପିଟାଲ୍ରେ ଆୟୋଜିତ ଓଡ଼ିଶା ଚେଷ୍ଟ ସୋସାଇଟିର ୧୯ତମ ବାର୍ଷିକ ସମ୍ମିଳନୀ “ଚେଷ୍ଟକନ୍ ଓଡ଼ିଶା-୨୦୨୩” ର ଉଦ୍ଘାଟନୀ କାର୍ଯ୍ୟକ୍ରମରେ ମୁଖ୍ୟ ଅତିଥି ଭାବେ ଯୋଗ ଦେଇ ପ୍ରଫେସର ବେହେରା ମତ ରଖିଛନ୍ତି।
ଏହି ପ୍ରକ୍ରିୟାରେ ଆମେ ଯକ୍ଷ୍ମାକୁ ଭୁଲିଯାଉଛୁ ଏବଂ ଆମର ଧ୍ୟାନ ଅନ୍ୟ ଆଡ଼କୁ ଯାଉଛି ବୋଲି କହିବା ସହ ସେ କେନ୍ଦ୍ର ସରକାର ଦେଶରେ ୨୦୨୫ ସୁଦ୍ଧା ଯକ୍ଷ୍ମାକୁ ଦୂର କରିବା ନେଇ ରଖିଥିବା ଲକ୍ଷ୍ୟ ସାଧିତ ହେବା କଷ୍ଟକର ହେବ ବୋଲି କହିଥିଲେ।
ବିଶ୍ୱର ୨୭ ପ୍ରତିଶତ ଯକ୍ଷ୍ମା ରୋଗୀ ଭାରତରେ ଥିବା ବେଳେ ଏଭଳି ପରିସ୍ଥିତିରେ କେନ୍ଦ୍ର ସରକାର ନ୍ୟାସ୍ନାଲ୍ ଟ୍ୟୁବରକ୍ୟୁଲୋସିସ୍ ଏଲିମିନେସନ୍ ପ୍ରୋଗ୍ରାମ୍ (ଏନ୍ଟିଇପି)କୁ ଅଣଦେଖା କରିବା ଆଦୌ ଉଚିତ ନୁହେଁ ବୋଲି ବିଶେଷଜ୍ଞ ପ୍ରଫେସର ବେହେରା କହିଥିଲେ।
ପ୍ରଫେସର ବେହେରା କହିଥିଲେ ଯେ ଯକ୍ଷ୍ମା ଫୁସ୍ଫୁସ୍ ଛଡ଼ା ଶରୀରର ଅନ୍ୟାନ୍ୟ ଅଙ୍ଗକୁ ଆକ୍ରାନ୍ତ କରିଥାଏ ଓ ଅନ୍ୟ ଡାକ୍ତରମାନେ ଏହି ସମସ୍ୟାର ଚିକିତ୍ସା କରିଥାନ୍ତି।
କୋଭିଡ ପରବର୍ତ୍ତୀ ସମୟର ଚିକିତ୍ସା ଉପରେ ଗୁରୁତ୍ୱ ଦେଇ ପ୍ରଫେସର ବେହେରା କହିଥିଲେ ଯେ ଡାକ୍ତରମାନଙ୍କୁ ଏହି ପରିସ୍ଥିତିର ସାମ୍ନା କରିବାକୁ ପଡ଼ିବ। ସେହିପରି ଫୁସ୍ଫୁସ୍ ପ୍ରତ୍ୟାରୋପଣ ବର୍ତମାନ ଅଧିକ ମାତ୍ରାରେ କରାଯାଉଥିବା ସେ କହିଛନ୍ତି। ତେବେ ଖୁବ୍ କମ୍ ସମୟ ମଧ୍ୟରେ ଅନେକ କାର୍ଯ୍ୟକୁ ସଠିକ୍ ଭାବେ କିଭଳି କରାଯାଏ ତାହା ଆମକୁ କୋଭିଡ ଶିଖାଇଛି ବୋଲି ସେ ମତ ରଖିଥିଲେ।
ଯକ୍ଷ୍ମା ଭଳି ଫୁସ୍ଫୁସ୍ କର୍କଟ ମଧ୍ୟ ଆମ ଦେଶରେ ଅଧ୍ଚଳ ମାତ୍ରାରେ ଦେଖାଯାଉଛି। ମୁଖ ଗହ୍ୱର କ୍ୟାନ୍ସର ପରେ ଫୁସ୍ଫୁସ୍ ଜନିତ କ୍ୟାନ୍ସର ଦ୍ୱିତୀୟ ସ୍ଥାନରେ ରହିଛି ବୋଲି ସେ ପ୍ରକାଶ କରିଥିଲେ।
ସେହିପରି ଫୁସ୍ଫୁସ୍ ଜନିତ ସମସ୍ୟା (ସିଓପିଡି)କୁ ନେଇ ପ୍ରଫେସର ବେହେରା କହିଥିଲେ ଯେ ଯଦିଓ ଏହି ରୋଗକୁ ସମ୍ପୂର୍ଣ୍ଣ ଭାବେ ମୁଳୋତ୍ପାଟନ କରାଯାଇପାରିବ ନାହିଁ ତେବେ ଡାକ୍ତରମାନେ ନିଜ ଚିକିତ୍ସା ପଦ୍ଧତି ବଳରେ ରୋଗୀମାନଙ୍କୁ ଆରାମ ପ୍ରଦାନ କରିପାରିବେ।
କୋଭିଡ ପରବର୍ତୀ ପରିସ୍ଥିତିରେ କ୍ରିଟିକାଲ୍ କେୟାର ବିଭାଗର ଡାକ୍ତର ଏବଂ ପଲ୍ମୁନାରୀ ମେଡିସିନ୍ ବିଭାଗର ଡାକ୍ତରମାନେ ଏକାଠି ଚିକିତ୍ସା କରିବା ଆବଶ୍ୟକ ବୋଲି ସେ କହିଥିଲେ।
କରୋନା ମହାମାରୀ ସମୟରେ କୋଭିଡ ଆକ୍ରାନ୍ତମାନଙ୍କ ଚିକିତ୍ସା ସେବାକୁ ନେଇ ଆଇଏମ୍ଏସ୍ ଆଣ୍ଡ ସମ୍ ହସ୍ପିଟାଲ୍କୁ ପ୍ରଫେସର ବେହେରା ପ୍ରଶଂସା କରିବା ସହ ଯେଉଁଭଳି ଭାବରେ ଏହି ଡାକ୍ତରଖାନା ରୋଗୀମାନଙ୍କର ଚିକିତ୍ସା କରିଛି ତାହା ଖୁବ୍ ଉଚ୍ଚକୋଟୀର ଏବଂ ଏହା ଫଳରେ ଏହି ହସ୍ପିଟାଲ୍ଟି ଏକ ଶ୍ରେଷ୍ଠ ସ୍ୱାସ୍ଥ୍ୟ ସେବା ଅନୁଷ୍ଠାନ ଭାବେ ଉଭା ହୋଇଥିବା ସେ କହିଛନ୍ତି।
ଦକ୍ଷ ଫୁସଫୁସ ରୋଗ ବିଶେଷଜ୍ଞମାନଙ୍କ ଆବଶ୍ୟକତା ଉପରେ ଗୁରୁତ୍ୱ ଦେଇ ପ୍ରଫେସର ବେହେରା କହିଥିଲେ ଯେ ଡାକ୍ତରମାନେ ଏମ୍ଡି କିମ୍ବା ଡିଏମ୍ ଡିଗ୍ରୀ ହାସଲ କରିଛନ୍ତି କି ନାହିଁ ତାହା ଯେତିକି ଗୁରୁତ୍ୱପୂର୍ଣ୍ଣ ନୁହେଁ ଦେଶରେ ଉତମ ପ୍ରଶିକ୍ଷଣ ଲାଭ କରିଥିବା ଡାକ୍ତରଙ୍କ ଆବଶ୍ୟକତା ଅଧିକ ରହିଛି।
ଓଡ଼ିଶା ଚେଷ୍ଟ ସୋସାଇଟିର ସଭାପତି ପ୍ରଫେସର (ଡାକ୍ତର) ସମୀର ସାହୁ କାର୍ଯ୍ୟକ୍ରମ ପରିଚାଳନା କରିଥିବା ବେଳେ କାର୍ଯ୍ୟକ୍ରମରେ ସୋଆର କୁଳପତି ପ୍ରଫେସର ବିଜୟ କୁମାର ସାହୁ, ଆଇଏମ୍ଏସ୍ ଆଣ୍ଡ ସମ୍ ହସ୍ପିଟାଲ୍ର ଡିନ୍ ପ୍ରଫେସର ସଂଘମିତ୍ରା ମିଶ୍ର, ମେଡିକାଲ୍ ସୁପରିଟେଣ୍ଡେଂଟ ପ୍ରଫେସର ପୁଷ୍ପରାଜ ସାମନ୍ତସିଂହାର ଏବଂ ଓଡ଼ିଶା ଚେଷ୍ଟ ସୋସାଇଟିର ସଂପାଦକ ଡାକ୍ତର ମନୋଜ କୁମାର ପାଣିଗ୍ରାହୀ ବକ୍ତବ୍ୟ ରଖିଥିଲେ।
ଆଇଏମଏସ୍ ଆଣ୍ଡ ସମ୍ ହସ୍ପିଟାଲ୍ର ପଲ୍ମୋନାରୀ ମେଡିସିନ୍ ବିଭାଗର ମୁଖ୍ୟ ତଥା କାର୍ଯ୍ୟକ୍ରମର ଅର୍ଗାନାଇଜିଂ ଚେୟାରମ୍ୟାନ ପ୍ରଫେସର (ଡାକ୍ତର) ବନାନୀ ଜେନା ଏହି ଅବସରରେ କହିଥିଲେ ଯେ ସମ୍ ହସ୍ପିଟାଲ୍ରେ ଏକ ଇଂଟରଭେନ୍ସନାଲ ପଲମୁନୋଲଜି ସେଂଟର ସହିତ ନିଦ୍ରାଜନିତ ସମସ୍ୟାକୁ ନେଇ ଗବେଷଣା ଏବଂ ଚିକିତ୍ସା ନିମନ୍ତେ ଏକ ଉଚ୍ଚକୋଟୀର ସ୍ଲିପ୍ ଲ୍ୟାବ୍ ଆରମ୍ଭ କରାଯିବାର ଯୋଜନା ରହିଛି। ସେହିପରି ଏକ ରେସ୍ପିରେଟୋରୀ ଆଇସିୟୁ ଏବଂ ଆଲର୍ଜି ଆଣ୍ଡ ଇମ୍ୟୁନୋଲୋଜି କ୍ଲିନିକ୍ ମଧ୍ୟ ଖୁବ୍ ଶୀଘ୍ର ପତିଷ୍ଠା କରାଯିବ ବୋଲି ସେ କହିଥିଲେ।