ଦିଲ୍ଲୀ/ଭୁବନେଶ୍ଵର: ବାଲେଶ୍ୱର ଠାରେ ଇଏସ୍ଆଇସି ପକ୍ଷରୁ ଏକ ୧୦୦ ଶଯ୍ୟା ବିଶିଷ୍ଟ ଡାକ୍ତରଖାନା ଖୋଲା ଯିବ ବୋଲି ଆଜି କେନ୍ଦ୍ର ଶ୍ରମ ଏବଂ ରୋଜଗାର ମନ୍ତ୍ରୀ ଭୂପେନ୍ଦର ଯାଦବ ଘୋଷଣା କରିଛନ୍ତି। ସେ ଏ ସମ୍ପର୍କରେ କର୍ମଚାରୀ ରାଜ୍ୟ ବୀମା ନିଗମ (ଇଏସ୍ଆଇସି) ର ଚଣ୍ଡିଗଡ ଠାରେ ଅନୁଷ୍ଠିତ ୧୯୦ ତମ ବୈଠକରେ ଯୋଗ ଦେଇ ସୂଚନା ଦେଇଛନ୍ତି। ଶ୍ରମଜୀବୀ ମାନଙ୍କ ସାମାଜିକ ନିରାପତ୍ତାକୁ ସୁନିଶ୍ଚିତ କରିବା ନିମନ୍ତେ ଏହା ଏକ ଦୃଢ଼ ପଦକ୍ଷେପ ବୋଲି ଶ୍ରୀ ଯାଦବ କହିଛନ୍ତି। ଏହା ଫଳରେ ବାଲେଶ୍ୱର ନିକଟସ୍ଥ ବହୁ ଶ୍ରମଜୀବୀ ସୁବିଧାରେ ସ୍ୱାସ୍ଥ୍ୟସେବା ପାଇ ପାରିବେ ।
କେନ୍ଦ୍ର ଶ୍ରମ ଓ ରୋଜଗାର ଏବଂ ପରିବେଶ, ଜଙ୍ଗଲ ଓ ଜଳବାୟୁ ପରିବର୍ତ୍ତନ ମନ୍ତ୍ରୀ ଭୂପେନ୍ଦର ଯାଦବ ଆଜି ଚଣ୍ଡିଗଡ ଠାରେ ଇଏସ୍ଆଇସିର ୧୯୦ ତମ ବୈଠକରେ ଅଧ୍ୟକ୍ଷତା କରିଥିଲେ। ବୈଠକରେ ଶ୍ରମ ଓ ରୋଜଗାର, ପେଟ୍ରୋଲିୟମ ଏବଂ ପ୍ରାକୃତିକ ବାଷ୍ପ ରାଷ୍ଟ୍ରମନ୍ତ୍ରୀ ଶ୍ରୀ ରାମେଶ୍ୱର ତେଲି ମଧ୍ୟ ଯୋଗ ଦେଇଥିଲେ। ଇଏସ୍ଆଇ ନିଗମର ୧୯୦ ତମ ବୈଠକରେ ଶ୍ରୀ ଯାଦବ ଶ୍ରମଜୀବୀ ମାନଙ୍କ ପାଇଁ ସାମାଜିକ ନିରାପତ୍ତାକୁ ସୁନିଶ୍ଚିତ କରିବା ସହ ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀଙ୍କ ଦୃଷ୍ଟିକୋଣକୁ ଆଗକୁ ଆଗେଇ ନେବା ପାଇଁ ଅନେକ ଗୁଡିଏ ନିଷ୍ପତ୍ତି ସମ୍ପର୍କରେ ଘୋଷଣା କରିଥିଲେ।
ବୃଦ୍ଧି ପାଉଥିବା ଶ୍ରମଜୀବୀ ମାନଙ୍କର ସଂଖ୍ୟାକୁ ଦୃଷ୍ଟିରେ ରଖି ବେଲଗାଭୀ (କର୍ଣ୍ଣାଟକ), ଶମଶାବାଦ (ତେଲେଙ୍ଗାନା), ବାରାମତୀ (ମହାରାଷ୍ଟ୍ର), କିଶନଗଡ, ଅଜମେର (ରାଜସ୍ଥାନ) ଏବଂ ବାଲେଶ୍ୱର (ଓଡିଶା) ଠାରେ ୧୦୦ ଶଯ୍ୟା ବିଶିଷ୍ଟ ଡାକ୍ତରଖାନା ଏବଂ କୁର୍ନୁଲ (ଆନ୍ଧ୍ରପ୍ରଦେଶ) ରେ ୩୦ ଶଯ୍ୟା ବିଶିଷ୍ଟ ଇଏସ୍ଆଇ ଡାକ୍ତରଖାନା ଏବଂ ଗ୍ରେଟର ନୋଏଡା (ଉତ୍ତରପ୍ରଦେଶ) ଠାରେ ୩୫୦ ଶଯ୍ୟା ବିଶିଷ୍ଟ ଇଏସ୍ଆଇ ଡାକ୍ତରଖାନା ପ୍ରତିଷ୍ଠା ପାଇଁ ପ୍ରସ୍ତାବକୁ ଇଏସ୍ଆଇ ନିଗମ ଏହି ବୈଠକ ସମୟରେ ଅନୁମୋଦନ କରିଛି।
ଏଥି ସହ ସିକ୍କିମର ରାଙ୍ଗପୋ ଠାରେ ନୂତନ ଅନୁମୋଦିତ ୩୦ ଶଯ୍ୟା ବିଶିଷ୍ଟ ଇଏସ୍ଆଇସି ଡାକ୍ତରଖାନାକୁ ୧୦୦ ଶଯ୍ୟା ବିଶିଷ୍ଟ କରିବା ଏବଂ ରାଜ୍ୟ ସରକାରଙ୍କ ଠାରୁ ଇଏସ୍ଆଇଏସ୍ ହସ୍ପିଟାଲ, ଗୁନାଡାଲା, ବିଜୟୱାଡା (ଆନ୍ଧ୍ରପ୍ରଦେଶ) ଏବଂ ମାଇଥନ, ରାଂଚି (ଝାଡଖଣ୍ଡ) କୁ ନିଜ ହାତକୁ ନେବା ପାଇଁ ନିଷ୍ପତ୍ତି ଗ୍ରହଣ କରା ଯାଇଛି। ଯେଉଁ ଡାକ୍ତରଖାନା ଗୁଡ଼ିକୁ ନୂଆ କରି ହାତକୁ ନିଆଯିବ ଶ୍ରମଜୀବୀ ଏବଂ ସେମାନଙ୍କ ପରିବାରର ସଦସ୍ୟ ମାନଙ୍କୁ ସେଠାରେ ଉନ୍ନତ ଚିକିତ୍ସା ସେବା ତଥା ସୁବିଧା ଯୋଗାଇବା ପାଇଁ ସେଗୁଡିକ ପ୍ରତ୍ୟକ୍ଷ ଭାବରେ ଇଏସ୍ଆଇସି ଦ୍ୱାରା ପରିଚାଳିତ ହେବ।
ବିସ୍ତୃତ ଜନବହୁଳ ଉତ୍ତର – ପୂର୍ବ ଅଂଚଳ, ଘରୋଇ ଡାକ୍ତରଖାନା / ଡିସପେନସାରୀ / ନର୍ସିଂହୋମ ଇତ୍ୟାଦିର ତୀବ୍ର ଅଭାବ ଏବଂ ଉତ୍ତର ପୂର୍ବ – ଅଂଚଳର ଇଏସ୍ଆଇ ଯୋଜନାର ଆର୍ଥିକ ସ୍ଥିତିକୁ ଦୃଷ୍ଟିରେ ରଖି ଇଏସ୍ଆଇସି ଉତ୍ତର ପୂର୍ବ ରାଜ୍ୟ ଗୁଡିକୁ ଏବଂ ସିକ୍କିମକୁ ଇଏସ୍ଆଇ ଯୋଜନାକୁ ଚାଲୁ ରଖିବା ନିମନ୍ତେ ଆର୍ଥିକ ସହାୟତା ଜାରି ରଖିବାକୁ ନିଷ୍ପତ୍ତି ନେଇଛି। ଧାର୍ଯ୍ୟ ସୀମା (ସିଲିଂ) ପର୍ଯ୍ୟନ୍ତ ସମ୍ପୂର୍ଣ୍ଣ ଖର୍ଚ୍ଚ ଉତ୍ତର ପୂର୍ବାଂଚଳ ରାଜ୍ୟ (ଆସାମ ବ୍ୟତୀତ) ୨୦୨୩ – ୨୪ ଆର୍ଥିକ ବର୍ଷରୁ ଇଏସ୍ଆଇ କର୍ପୋରେସନ୍ ବହନ କରିବ।
ପୁନଶ୍ଚ, ଅତିରିକ୍ତ ଆର୍ଥିକ ସହାୟତା ଯାହା ଅଧୀନରେ ପ୍ରତି ଡିସପେନସାରୀ ପାଇଁ ୪୦ ଲକ୍ଷ ଟଙ୍କା (ତ୍ରୈମାସିକ ୧୦ ଲକ୍ଷ ଟଙ୍କା ଲେଖାଏଁ) ରାଜ୍ୟ ସରକାରଙ୍କୁ ପ୍ରଦାନ କରାଯାଉଛି, ତାହା ମଧ୍ୟ ଆରମ୍ଭ କରାଯିବ । ଷ୍ଟାଣ୍ଡାର୍ଡ ମେଡିକାଲ୍ କେୟାର ଅଧୀନରେ ନିୟମିତ ପାଣ୍ଠି ଆବଂଟନ ବ୍ୟତୀତ ଏହା ଏକ ଅତିରିକ୍ତ ଲାଭ ହେବ। ନୂତନ ଡିସପେନସାରୀ ଗୁଡିକ ପାଇଁ ଏହା ମଧ୍ୟ ଉପଲବ୍ଧ ରହିବ, ଯଦି ସେଗୁଡିକ ବର୍ତ୍ତମାନର ନିର୍ଦ୍ଦେଶ ଅନୁଯାୟୀ ଖୋଲାଯାଏ।
କୋଭିଡ -୧୯ ମହାମାରୀ ସମୟରେ ବେରୋଜଗାର ହୋଇଥିବା ବୀମାଭୁକ୍ତ ଶ୍ରମିକ ମାନଙ୍କୁ ରିଲିଫ ଯୋଗାଇବା ପାଇଁ, ଇଏସ୍ଆଇ ନିଗମ ବୈଠକରେ ଅଟଳ ବିମିତ ବ୍ୟକ୍ତିକଲ୍ୟାଣ ଯୋଜନା ଅଧୀନରେ ଉପଲବ୍ଧ ସୁବିଧା ଗୁଡିକୁ ଦୁଇ ବର୍ଷ ପର୍ଯ୍ୟନ୍ତ ବୃଦ୍ଧି କରିବାକୁ ପ୍ରସ୍ତାବରେ ସହମତ ହୋଇଥିଲା। ଅଟଳ ବିମିତ ବ୍ୟକ୍ତିକଲ୍ୟାଣ ଯୋଜନା (ଏବିଭିକେୱାଇ) ହେଉଛି ବେରୋଜଗାର ଥିବା ଶ୍ରମିକ ମାନଙ୍କ ଜୀବନରେ ଥରକ ପାଇଁ ୯୦ ଦିନ ପର୍ଯ୍ୟନ୍ତ ନଗଦ କ୍ଷତିପୂରଣ ଆକାରରେ ପ୍ରଦାନ କରାଯାଉଥିବା ଏକ କଲ୍ୟାଣକାରୀ ପଦକ୍ଷେପ।
ସୋସିଆଲ୍ ସିକ୍ୟୁରିଟି କୋଡ (ସାମାଜିକ ସୁରକ୍ଷା ନିୟମ) – ୨୦୨୦ ଲାଗୁ ହେବା ପରେ ବୀମାଭୁକ୍ତ ଶ୍ରମିକ ଏବଂ ସେମାନଙ୍କ ଉପରେ ନିର୍ଭରଶୀଳଙ୍କ ସଂଖ୍ୟାରେ ଯଥେଷ୍ଟ ବୃଦ୍ଧି ହେବାର ପୂର୍ବାନୁମାନ କରି ଭୂପେନ୍ଦର ଯାଦବ ଆଇପି ଏବଂ ସେମାନଙ୍କର ହିତାଧିକାରୀ ମାନଙ୍କୁ ପ୍ରାଥମିକ ଚିକିତ୍ସା ସେବା ଯୋଗାଇବା ପାଇଁ ଇଏସ୍ଆଇସିକୁ ବହୁମୁଖୀ କୌଶଳ ଅବଲମ୍ବନ କରି ଡାକ୍ତରୀ ସେବା ଭିତ୍ତିଭୂମିକୁ ମଜଭୁତ ତଥା ବ୍ୟାପକ କରିବା ଉପରେ ଗୁରୁତ୍ୱ ଦେବାକୁ ନିର୍ଦ୍ଦେଶ ଦେଇଛନ୍ତି।
ଇଏସ୍ଆଇସି ହସପିଟାଲ ଏବଂ ମେଡିକାଲ କଲେଜ, ଅଲୱାର (ରାଜସ୍ଥାନ) ଏବଂ ବିହ୍ତା (ବିହାର) ଠାରେ ତା ୩୧.୦୩.୨୦୨୪ ରିଖ ପର୍ଯ୍ୟନ୍ତ ମାଗଣାରେ ଚିକିତ୍ସା ସେବା ସୁବିଧା ସମ୍ପ୍ରସାରଣ ପାଇଁ ପ୍ରସ୍ତାବକୁ ମଧ୍ୟ ଇଏସ୍ଆଇସି ଅନୁମୋଦନ କରିଛି। ଇଏସ୍ଆଇସି ଅଧୀନରେ ଔଷଧ / ଡ୍ରେସିଂ ଏବଂ ଉପଯୋଗୀ ସାମଗ୍ରୀ ଗୁଡିକର ସୁବିଧା ମଧ୍ୟ ସେମାନଙ୍କୁ ମାଗଣାରେ ଉପଲବ୍ଧ କରାଯିବ। ବିନା ମୂଲ୍ୟରେ ଅସୁବିଧା – ମୁକ୍ତ ଗୁଣାତ୍ମକ ଚିକିତ୍ସା ସେବା ପାଇବା ନିମନ୍ତେ ଏହା ନିକଟସ୍ଥ ଅଂଚଳର ଲକ୍ଷ ଲକ୍ଷ ସାଧାରଣ ଲୋକ ମାନଙ୍କୁ ଉପକୃତ କରିବ।
ଏସବୁ ବ୍ୟତୀତ, ୨୦୨୨- ୨୩ ବର୍ଷ ପାଇଁ ସଂଶୋଧିତ ଆକଳନ, ୨୦୨୩ – ୨୪ ବର୍ଷ ପାଇଁ ବଜେଟ୍ ଆକଳନ ଏବଂ ଇଏସ୍ଆଇ ନିଗମର ୨୦୨୩ – ୨୪ ବର୍ଷ ପାଇଁ ପ୍ରଦର୍ଶନ ବଜେଟ୍ ଉପରେ ବିଚାର ବିମର୍ଶ କରା ଯାଇଥିଲା ଏବଂ ଅନ୍ୟ କାର୍ଯ୍ୟସୂଚୀ ସାମଗ୍ରୀ ସହିତ ଏହାକୁ ଅନୁମୋଦିତ କରା ଯାଇଥିଲା।
କେନ୍ଦ୍ର ଶ୍ରମ ମନ୍ତ୍ରୀଙ୍କ ଅଧ୍ୟକ୍ଷତାରେ ଜୋନାଲ ମେଡିକାଲ କମିଶନରମାନେ, ମେଡିକାଲ କମିଶନରମାନେ, ବୀମା କମିଶନରମାନେ ଏବଂ ଇଏସ୍ଆଇସିର ଆଂଚଳିକ ନିର୍ଦ୍ଦେଶକଙ୍କ ସହ ପୃଥକ ବୈଠକରେ ରେଫରାଲ ବ୍ୟବସ୍ଥାରେ ସଂସ୍କାର, ସ୍ୱାସ୍ଥ୍ୟ ସେବା କ୍ଷେତ୍ରର ଉତ୍ସ ଗୁଡିକର ସର୍ବୋତ୍ତମ ଉପଯୋଗ, ଅପହଂଚ କ୍ଷେତ୍ରରେ ପହଞ୍ଚିବା (ଅସଂଗଠିତ କ୍ଷେତ୍ର କର୍ମଚାରୀ) ଏବଂ ବୃତ୍ତିଗତ ରୋଗଗୁଡିକ ଭଳି ପ୍ରସଙ୍ଗ ଉପରେ ବିଚାର ବିମର୍ଶ କରାଯାଇଥିଲା ଏବଂ କାର୍ଯ୍ୟ କରାଯିବାକୁ ଥିବା ପଏଣ୍ଟ ଗୁଡିକୁ ଚିହ୍ନଟ କରାଯାଇଥିଲା।
ଏହି ବୈଠକରେ ଡୋଲା ସେନ୍, ସାଂସଦ, ଖଗେନ ମୁର୍ମୁ, ସାଂସଦ, ସଚିବ, ଶ୍ରମ ଓ ରୋଜଗାର ମନ୍ତ୍ରଣାଳୟ ଆରତୀ ଆହୁଜା ଏବଂ ମହାନିର୍ଦ୍ଦେଶକ, ଇଏସଆଇସି ଡଃ. ରାଜେନ୍ଦ୍ର କୁମାର ଯୋଗ ଦେଇଥିଲେ। ଏହି ବୈଠକରେ ରାଜ୍ୟ ସରକାର ମାନଙ୍କର ମୁଖ୍ୟ ସଚିବ/ସଚିବ, ନିଯୁକ୍ତିଦାତା ମାନଙ୍କ ପ୍ରତିନିଧି ବୃନ୍ଦ, କର୍ମଚାରୀ ଏବଂ ଡାକ୍ତରୀ କ୍ଷେତ୍ରର ବିଶେଷଜ୍ଞମାନେ ମଧ୍ୟ ଉପସ୍ଥିତ ଥିଲେ।