ରାୟପୁର: ଆସନ୍ତାକାଲି ଛତିଶଗଡର ରାଜ୍ୟପାଳ ଭାବେ ଶପଥ ନେବେ ବିଶ୍ବଭୂଷଣ ହରିଚନ୍ଦନ। ଆଜି ସକାଳେ ଉଭୟ ବିଶ୍ବଭୂଷଣ, ତାଙ୍କର ଧର୍ମପତ୍ନୀ ଏବଂ ପୁତ୍ର ପୃଥୀରାଜ ହରିଚନ୍ଦନ ରାୟପୁରରେ ପହଁଚିଛନ୍ତି। ମଙ୍ଗଳବାର ଦିନ ବିଶ୍ବଭୂଷଣ ଆନ୍ଧ୍ର ପ୍ରଦେଶରୁ ବିଦାୟ ନେଇଥିଲେ।
ଆଜି ସକାଳେ ବିଶ୍ବଭୂଷଣ ସପରିବାରେ ରାୟପୁରର ସ୍ବାମୀ ବିବେକାନନ୍ଦ ବିମାନ ବନ୍ଦରରେ ଅବତରଣ କରିଥିଲେ। ବିମାନ ବନ୍ଦରରେ ତାଙ୍କୁ ଛତିଶଗଡ ମୁଖ୍ୟମନ୍ତ୍ରୀ ଭୂପେଶ ବାଘେଲା ପୁଷ୍ପଗୁଚ୍ଛ ଦେଇ ସ୍ବାଗତ କରିଥିଲେ। ସେଠାରେ ନୂଆ ରାଜ୍ୟପାଳଙ୍କୁ ଗାର୍ଡ ଅଫ ଅନର ପ୍ରଦାନ କରାଯାଇଥିଲା।
ବିଶ୍ୱ ଭୂଷଣ ହରିଚନ୍ଦନ ଆସନ୍ତାକାଲି ସକାଳ ୧୧.୩୦ ରେ ରାଜଭବନର ଦରବାର ହଲରେ ଆୟୋଜିତ ଏକ ସମାରୋହରେ ଶପଥ ଗ୍ରହଣ କରିବେ। ଛତିଶଗଡ ହାଇକୋର୍ଟର ପ୍ରଧାନ ବିଚାରପତି ଅରୁପ କୁମାର ଗୋସ୍ୱାମୀ ତାଙ୍କୁ ରାଜ୍ୟପାଳ ଭାବେ ଶପଥ ଗ୍ରହଣ କରାଇବେ।
ଏହି ଅବସରରେ ମୁଖ୍ୟମନ୍ତ୍ରୀ ଭୁପେଶ ବାଗେଲ, ବିଧାନସଭା ବାଚସ୍ପତି, କ୍ୟାବିନେଟ ସଦସ୍ୟ, ଜନ ପ୍ରତିନିଧୀ, ନିମନ୍ତ୍ରିତ ମାନ୍ୟଗଣ୍ୟ ବ୍ୟକ୍ତି ତଥା ବରିଷ୍ଠ ପ୍ରଶାସନିକ ଅଧିକାରୀ ଯୋଗଦେବେ।