ଭୁବନେଶ୍ୱର: ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ ପାଞ୍ଚ ମାସ ପୂର୍ବରୁ ତାଙ୍କର ଜନ୍ମ ଦିବସରେ ଓଡିଶା ମାଟିରୁ ଚୁକ୍ତିଭିତ୍ତିକ ପ୍ରଥାର ଉଚ୍ଛେଦ କରିଥିଲେ। ଘୋଷଣା ପରେ ସମସ୍ତ ବିଭାଗରେ ସରକାରୀ ଚୁକ୍ତିଭିତ୍ତିକ କର୍ମଚାରୀମାନେ ନିୟମିତ ହୋଇଥିଲେ। କିନ୍ତୁ ବିଦ୍ୟାଳୟ ଓ ଗଣଶିକ୍ଷା ବିଭାଗ ଅଧୀନରେ କାର୍ଯ୍ୟ କରୁଥିବା ପ୍ରାୟ ଅଠର ହଜାରରୁ ଅଧିକ ଚୁକ୍ତିଭିତ୍ତିକ ଶିକ୍ଷକ ଶିକ୍ଷୟିତ୍ରୀଙ୍କୁ ନିୟମିତ କରାଯାଇନଥିଲା।
ଘୋଷଣା ପରେ ବି ବିଭାଗ ନିୟମିତ ନକରିବାରୁ ଓଡିଶା ସରକାରୀ ହାଇସ୍କୁଲ ଚୁକ୍ତିଭିତ୍ତିକ ଶିକ୍ଷକ ସଂଘ ପ୍ରଥମେ ଡିସେମ୍ବର ସାତ ତାରିଖରେ ଆନ୍ଦୋଳନକୁ ଓହ୍ଲାଇଥିଲା। ଏହି ଆନ୍ଦୋଳନ ପରେ ମଧ୍ୟ ନିୟମିତ ନିର୍ଦ୍ଧେଶନାମାଟି ସରକାର ପ୍ରକାଶ କରିନଥିଲେ। ପାଞ୍ଚ ମାସ ସମୟ ବିତିଯିବା ପରେ ସଂଘ ପୁନଶ୍ଚ ଏପ୍ରିଲ ଏକ ତାରିଖ ଦିନ ବିଧାନସଭା ଆଗରେ ଧାରଣା ଦେଇଥିଲା।
ସରକାର ଆଲୋଚନାକୁ ଡାକି ତିନି ଦିନ ମଧ୍ୟରେ ନିୟମିତ ନିର୍ଦ୍ଦେଶାନାମାଟି ପ୍ରକାଶ କରିବେ ବୋଲି ପ୍ରତିଶୃତି ଦେଇଥିଲେ। କିନ୍ତୁ ରାଜ୍ୟ ସଂଘ ନିୟମିତ ନିର୍ଦେଶାନାମାଟି ପ୍ରକାଶ ପାଇବା ଯାଏଁ ଧାରଣରେ ବସିବ ବୋଲି ସଫା ସଫା କହିଥିଲା। ତେଣୁ ଏପ୍ରିଲ ୧ ତାରିଖରୁ ସଂଘ ଧାରଣାରେ ବସିଥିଲା ଏବଂ ଆଜି ଧାରଣାର ୧୩ ଦିନ ହୋଇଥିବା ବେଳେ ସରକାର ଦାବି ପୂରଣ କରିଛନ୍ତି।
ସରକାର ପ୍ରତିଶୃତି ରକ୍ଷା କରି ଆଜି ନିୟମିତ ନିର୍ଦ୍ଦେଶାନାମାଟି ପ୍ରକାଶ କରିଥିବାରୁ ମୁଖ୍ୟମନ୍ତ୍ରୀ, ଗଣଶିକ୍ଷା ମନ୍ତ୍ରୀ ଏବଂ ବିଦ୍ୟାଳୟ ଓ ଗଣଶିକ୍ଷା ବିଭାଗର ସଚିବଙ୍କୁ ରାଜ୍ୟ ସଂଘ ସଭାପତି ପାଞ୍ଚନନ ଜେନା, ସମ୍ପାଦକ ସତ୍ୟଭୂଷଣ ତରାଇ, ଉପଦେଷ୍ଟା ବିଶ୍ୱଜିତ ବିଶ୍ୱାଳ, ଦାମୋଦର ମହାନନ୍ଦ, ବିନୋଦ ମିଶ୍ର, ବସନ୍ତ କୌଶଲ୍ୟ, ମାନସ ପୁହାଣ, ଟିକିନା ସାହୁ, ମୌଡି ଇନ୍ଦ୍ରସେନ, ଜିକରିଆ ସବର, ପ୍ରତାପ ସାମଲ, ଶାନ୍ତୁନୁ ଦାସ, ପ୍ରିୟବ୍ରତ ବେହେରା, ମନୋହର ଦାସ, ଦିଲୁ ସାହୁ, ମାନସ ସାହୁ, ରଶ୍ମି ସାହୁ ଆଦି ଧନ୍ୟବାଦ ଜଣାଇଛନ୍ତି।
