ନୂଆଦିଲ୍ଲୀ: ପାକିସ୍ତାନ ଏୟାରଲାଇନ୍ସର ଏକ ବିମାନ ହଠାତ୍ ଭାରତୀୟ ବାୟୁସୀମାରେ ପ୍ରବେଶ କରିଥିଲା। ଯାହାକୁ ନେଇ ଭାରତରେ ଉତ୍ତେଜନା ଦେଖାଦେଇଥିଲା। ଏହି ପାକିସ୍ତାନୀ ବିମାନ ପ୍ରାୟ ଦଶ ମିନିଟ୍ ପର୍ଯ୍ୟନ୍ତ ଭାରତୀୟ ବାୟୁସୀମାରେ ରହିଥିଲା। ବିମାନଟି ଭାରତରେ ପ୍ରବେଶ କରିବା ମାତ୍ରେ ସେନାକୁ ସତର୍କ କରାଯାଇଥିଲା। ଯଦିଓ କୌଣସି ପ୍ରକାରର ଘଟଣା ନଥିଲା ଏବଂ ଏହି ବିମାନ ଭାରତର ପଞ୍ଜାବରେ ୧୨୦ କିଲୋମିଟର ଉଡ଼ିବା ପରେ ନିଜ ଦେଶରେ ପ୍ରବେଶ କରିଥିଲା।
ଗଣମାଧ୍ୟମ ରିପୋର୍ଟ ଅନୁଯାୟୀ, ପାକିସ୍ତାନର ଲାହୋର ବିମାନବନ୍ଦରରେ ପ୍ରବଳ ବର୍ଷା ହେତୁ ବିମାନ ଅବତରଣ କରିପାରିନଥିଲା। ପରେ ପାକିସ୍ତାନୀ ବିମାନ ହଠାତ୍ ଭାରତୀୟ ଅଞ୍ଚଳରେ ପ୍ରବେଶ କରିଥିଲା। ଏହି ଘଟଣା ସମ୍ପର୍କରେ ସ୍ଥାନୀୟ ଗଣମାଧ୍ୟମ ନିଜ ରିପୋର୍ଟରେ କହିଛି ଯେ, ଯେତେବେଳେ ପାକିସ୍ତାନର ରାଷ୍ଟ୍ରାୟତ୍ତ ବିମାନର ପିକେ-୨୪୮ ବିମାନ ମେ ୪ ତାରିଖ ରାତି୮ ଟାରେ ଅବତରଣ କରିବା ପାଇଁ ଲାହୋର ବିମାନବନ୍ଦରରେ ପହଞ୍ଚିଥିଲା ସେତେବେଳେ ସେଠାରେ ପ୍ରବଳ ବର୍ଷା ହୋଇଥିଲା। ଏହା ପରେ ପାଇଲଟ୍ ଏହାକୁ ଅନ୍ୟତ୍ର ଅବତରଣ କରିବାକୁ ନିଷ୍ପତ୍ତି ନେଇଥିଲେ।
ବିମାନଟିକୁ ଅଲାମା ଇକବାଲ ଅନ୍ତର୍ଜାତୀୟ ବିମାନବନ୍ଦରରେ ଅବତରଣ କରିବାକୁ ପାଇଲଟ ଚେଷ୍ଟା କରିଥିଲେ। କିନ୍ତୁ ଏଠାରେ ସଫଳ ହୋଇନଥିଲେ। ଏହା ପରେ ପାଇଲଟଙ୍କୁ ଭାରତୀୟ ସୀମା ଅଞ୍ଚଳରେ ପ୍ରବେଶ କରିବାକୁ ବାଧ୍ୟ କରାଯାଇଥିଲା। ଅସୂଚନା ଅନୁଯାୟୀ, ଏଟିସିର ନିର୍ଦ୍ଦେଶ ଅନୁଯାୟୀ ପାଇଲଟ୍ ବୁଲିବା ଆରମ୍ଭ କରିଥିଲେ କିନ୍ତୁ ପ୍ରବଳ ବର୍ଷା ଏବଂ କମ୍ ଉଚ୍ଚତା ମଧ୍ୟରେ ବିମାନଟି ରାସ୍ତା ହରାଇଥିଲା। ଫଳସ୍ୱରୂପ, ବିମାନଟି ପଞ୍ଜାବର ବଧାନା ପୋଲିସ ଷ୍ଟେସନ ନିକଟରେ ରାତି ୮.୧୧ ରେ ଭାରତୀୟ ସୀମାରେ ପ୍ରବେଶ କରିଥିଲା। ବଧାନା ଅମୃତସର ଠାରୁ ୩୭ କିଲୋମିଟର ଦୂରରେ ଅବସ୍ଥିତ। ରିପୋର୍ଟ ଅନୁଯାୟୀ, ପାଇଲଟମାନେ ବିମାନକୁ ଭାରତୀୟ ବାୟୁସୀମାର ୨୦ ହଜାର ଫୁଟ ଉଚ୍ଚକୁ ନେଇଥିଲେ।
ଭାରତୀୟ ସୀମା ଅଞ୍ଚଳରେ ପ୍ରାୟ ଦଶ ମିନିଟ୍ ଉଡ଼ିବା ପରେ ପାକିସ୍ତାନୀ ବିମାନ ୮.୨୨ ମିନିଟରେ ନିଜ ସୀମା ଅଞ୍ଚଳକୁ ଫେରିଗଲା। ସେହି ସମୟରେ ବିମାନଟି ୨୩ ହଜାର ଫୁଟ ଉଚ୍ଚରେ ଥିଲା ଏବଂ ଘଣ୍ଟା ପ୍ରତି ୩୨୦ କିଲୋମିଟର ବେଗରେ ଉଡୁଥିଲା।