ସୀତାରାମ ଅଗ୍ରୱାଲ
ବାଣପୁର: ଖୋର୍ଦ୍ଧା ଜିଲ୍ଲା ବାଣପୁର ଥାନା ଅଞ୍ଚଳରେ ଏକ ଦୁଃଖଦ ଘଟଣା ଘଟିଯାଇଛି। ନଦୀରେ ବୁଡ଼ି ଜଣେ ବ୍ୟକ୍ତି ପ୍ରାଣ ହରାଇଥିବାର ଖବର ହସ୍ତଗତ ହୋଇଛି।
ସୂଚନା ମୁତାବକ ବାଣପୁର ଏନଏସି ଶ୍ରୀନିବାସପୁର ଗ୍ରାମର ଚକ୍ରପାଣି ନାୟକ (୫୫) ଆଜି ଅପରାହ୍ନରେ ଶାଳିଆ ନଦୀ ମଧ୍ୟକୁ ସ୍ନାନ ପାଇଁ ଯାଇଥିଲେ। ତେବେ ଦୀର୍ଘସମୟ ଧରି ଚକ୍ରପାଣି ଘରକୁ ନଫେରିବାରୁ ତାଙ୍କ ପତ୍ନୀ ଛବି ନଦୀକୁ ଯାଇ ଦେଖିଲା ବେଳେକୁ ଚକ୍ରପାଣିଙ୍କ ମୃତ ଦେହ ନଦୀରେ ଭାସୁଥିଲା। ସଙ୍ଗେସଙ୍ଗେ ଖବର ପାଇ ଗ୍ରାମବାସୀ ଚକ୍ରପାଣିଙ୍କୁ ନଦୀରୁ ଉଦ୍ଧାର କରି ବାଣପୁର ମେଡିକାଲ ନେଇଥିଲେ ସୁଦ୍ଧା ଡକ୍ଟର ସେଠାରେ ତାଙ୍କୁ ମୃତ ଘୋଷଣା କରିଥିଲେ।
ତେବେ ନଦୀରେ ଅସାବଧାନତା ବଶତଃ ଗୋଡ଼ ଖସି ଚକ୍ରପାଣି ବୁଡ଼ିଯାଇଥିବେ ବୋଲି ପରିବାରବର୍ଗ ସନ୍ଦେହ କରୁଛନ୍ତି। ଏ ନେଇ ବାଣପୁର ପୋଲିସ କେସ ନମ୍ବର ୭/୨୩ ରେ ଏକ ଅପମୃତ୍ୟ ମାମଲା ରୁଜୁ କରି ଶବ ଜବତ କରି ତଦନ୍ତ ଜାରି ରଖିଛି।
ସୂଚନା ଥାଉକି ଚକ୍ରପାଣି ଜଣେ ଗରିବ ଶ୍ରେଣୀର ବ୍ୟକ୍ତି ହୋଇଥିବା ବେଳେ ସ୍ଥାନୀୟ କୁମାରାଙ୍ଗ ଛକରେ ସେ ଏକ ଛୋଟ ପାନ ଦୋକାନ କରି ନିଜର ପରିବାର ପ୍ରତିପୋଷଣ କରିଆସୁଥିଲେ। ତାଙ୍କର ଦୁଇ ଗୋଟି ପୁତ୍ର ଥିବା ଜଣାପଡିଛି।