ଭୁବନେଶ୍ଵର: ବାହାନଗା ଟ୍ରେନ୍ ଦୁର୍ଘଟଣାର ତଦନ୍ତ ସିବିଆଇ ଆରମ୍ଭ କରିଛି। ଆଜି ସିବିଆଇ ଏହି ମାମଲାରେ ଏକ ମାମଲା ରୁଜୁ କରିଛି। ସିବିଆଇ ଅଧିକାରୀ କହିଛନ୍ତି ଯେ, ବାଲେଶ୍ଵରରେ ଏକ ଦଳ ପହଞ୍ଚି ଘଟଣାସ୍ଥଳ ପରିଦର୍ଶନ କରିଛନ୍ତି। ଏହି ଟ୍ରେନ୍ ଦୁର୍ଘଟଣାରେ ଏପର୍ଯ୍ୟନ୍ତ ୨୭୮ ଜଣଙ୍କର ମୃତ୍ୟୁ ଘଟିଛି ଏବଂ ୧୦୦୦ ରୁ ଅଧିକ ଲୋକ ଆହତ ହୋଇଛନ୍ତି।
ଅଧିକାରୀ କହିଛନ୍ତି ଯେ, ରେଳ ମନ୍ତ୍ରଣାଳୟର ଅନୁରୋଧ କ୍ରମେ ଓଡ଼ିଶା ସରକାରଙ୍କ ସହମତି ଏବଂ କେନ୍ଦ୍ର ସରକାରଙ୍କ ନିର୍ଦ୍ଦେଶରେ କରମଣ୍ଡଳ ଏକ୍ସପ୍ରେସ, ଯସୱନ୍ତପୁର-ହାୱାଡା ଏକ୍ସପ୍ରେସ ଏବଂ ଏକ ମାଲବାହୀ ଟ୍ରେନ ଦୁର୍ଘଟଣା ସମ୍ପର୍କରେ ସିବିଆଇ ଏକ ମାମଲା ରୁଜୁ କରିଛି। ଏହି ଘଟଣା ଜୁନ୍ ୨ ତାରିଖରେ ଓଡିଶାର ବାହାନଗା ବଜାର ଷ୍ଟେସନ ନିକଟରେ ଘଟିଥିଲା।
ସିବିଆଇ ଟିମ୍ ଆଜି ସିଗନାଲ୍ ରୁମ୍ ଏବଂ ରେଳ ଟ୍ରାକ୍ ଯାଞ୍ଚ କରିଛି। ବାହାନାଗା ବଜାର ରେଳ ଷ୍ଟେସନରେ ନିୟୋଜିତ ରେଳ ଅଧିକାରୀଙ୍କୁ ମଧ୍ୟ ପ୍ରଶ୍ନ କରାଯାଇଛି। ସିବିଆଇ ଅଧିକାରୀଙ୍କ ସହ ଫୋରେନସିକ୍ ଟିମ୍ ମଧ୍ୟ ଘଟଣାସ୍ଥଳରେ ପହଞ୍ଚିଛନ୍ତି। ଫୋରେନସିକ୍ ଟିମ୍ ମଧ୍ୟ ସିଗନାଲ୍ ରୁପ୍ ର କର୍ମଚାରୀଙ୍କ ସହ କଥା ହୋଇ ଉପକରଣର ବ୍ୟବହାର ଏବଂ ସେମାନଙ୍କର କାର୍ଯ୍ୟ ପ୍ରଣାଳୀ ବିଷୟରେ ପଚାରି ବୁଝିଛନ୍ତି।
ସିବିଆଇ ଏହି ଦୁର୍ଘଟଣାର ଅପରାଧିକ ଦୃଷ୍ଟିକୋଣରୁ ଅନୁସନ୍ଧାନ କରିବ। କାରଣ ରେଳବାଇ ଏହି ଦୁର୍ଘଟଣା ପଛରେ ଭଙ୍ଗାରୁଜା କିମ୍ବା ବାହ୍ୟ ହସ୍ତକ୍ଷେପ ହେବାର ସମ୍ଭାବନା ପ୍ରକାଶ କରିଛି। ଏହି ଦୁର୍ଘଟଣା ପରେ ଜୁନ୍ ୩ ତାରିଖରେ ଓଡିଶା ପୋଲିସ ବାଲେଶ୍ଵର ସରକାରୀ ରେଳ ପୋଲିସ ଷ୍ଟେସନରେ ଏକ ମାମଲା ରୁଜୁ କରିଥିଲା। ରେଳ ମନ୍ତ୍ରୀ ଅଶ୍ୱିନୀ ବୈଷ୍ଣବ କହିଛନ୍ତି ଯେ, ଇଲେକ୍ଟ୍ରୋନିକ୍ ଇଣ୍ଟରଲକିଂରେ ପରିବର୍ତ୍ତନ ହେତୁ ଏହି ଦୁର୍ଘଟଣା ଘଟିଛି।
