ଭୁବନେଶ୍ଵର: ଛତିଶଗଡ଼ ରାଜ୍ୟପାଳ ବିଶ୍ୱଭୂଷଣ ହରିଚନ୍ଦନ ୫ ଦିନିଆ ଓଡ଼ିଶା ଗସ୍ତରେ ଆସିଛନ୍ତି। ଏହି ପରିପ୍ରେକ୍ଷୀରେ ସେ ଆଜି ଖୋର୍ଦ୍ଧା ଜିଲ୍ଲାର ବାଣପୁର ମା’ ଭଗବତୀଙ୍କ ଦର୍ଶନରେ ଆସିଥିଲେ। ଏହି ଅବସରରେ ରାଜ୍ୟପାଳ ତାଙ୍କର ନିଜସ୍ୱ ଗ୍ରାମ ଗୋଡ଼ିଝରକୁ ଯାଇଥିଲେ। ସେଠାରେ ତାଙ୍କ ସ୍ୱର୍ଗତ ପିତାଙ୍କର ଆରାଧ୍ୟ ବାଲୁଙ୍କେଶ୍ୱରଦେବଙ୍କୁ ପୂଜାର୍ଚ୍ଚନା କରିଥିଲେ ଓ ମାତାପିତାଙ୍କ ସମାଧି ସ୍ଥଳରେ ତାଙ୍କୁ ଶ୍ରଦ୍ଧାଞ୍ଜଳୀ ଅର୍ପଣ କରିଥିଲେ।
ରାଜ୍ୟପାଳ ଶ୍ରୀହରିଚନ୍ଦନଙ୍କୁ ନାଚୁଣି, ବାଣପୁର, ଗମ୍ଭାରିମୁଣ୍ଡା ଆଦି କେତେକ ସ୍ଥାନରେ ସମ୍ବର୍ଦ୍ଧନା ଦିଆଯାଇଥିଲା।
ଏହି ପରୀପ୍ରେକ୍ଷିରେ ରାଜ୍ୟପାଳ ବାଣପୁର ଓ ଚିଲିକାବାସୀଙ୍କୁ ତାଙ୍କର ପୂର୍ବକୀର୍ତ୍ତି, ଗୌରବକୁ ମନେପକାଇ କହିଥିଲେ, ତୁମର ପୂର୍ବପୁରୁଷମାନେ ଲଢ଼ୁଆ ବୀର ଯୋଦ୍ଧା ଥିଲେ। ଯାହାଙ୍କ ପରାକ୍ରମ ଓ ସାହାସିକତା ଫିରିଙ୍ଗିମାନଙ୍କୁ ଭୟଭୀତ କରି ରଖିଥିଲା। ତୁମର ରକ୍ତରେ ସେଇ ବୀର ଦାୟଦଙ୍କର ପରାକର୍ମର ରକ୍ତ ବହୁଛି।
ବାଣପୁର, ଚିଲିକାର ମାଟି ହେଉଛି ଏକ ବୀରଜାତୀର ମାଟି। ଏ ମାଟିକୁ ଚୁପୁଡ଼ି ଦେଲେ ଝରି ପଡ଼ିବ ବୀରତ୍ୱର ରକ୍ତ। ଏଇ ମାଟି ଫିରିଙ୍ଗିମାନଙ୍କୁ ବାଣପୁର ପଲଟଣ ପଡ଼ିଆଠାରେ ଯୁଦ୍ଧରେ ପରାସ୍ତ କରି ବିଜୟର ଧ୍ୱଜା ଉଡାଇ ଓଡ଼ିଶାର ମାନ ବୃଦ୍ଧି କରିଛି।
ଏଇମାଟିରୁ ଆରମ୍ଭ ହୋଇଥିଲା ସମଗ୍ର ରାଜ୍ୟ ଓ ଦେଶକୁ ସ୍ୱାଧୀନ କରିବାର ମାନସିକତା। ଫିରିଙ୍ଗିମାନଙ୍କୁ ଦେଶରୁ ବିତାଡ଼ିତ କରିଦେବାର ଅଦମ୍ୟ ସାହାସ।ପାଇକ ବିଦ୍ରୋହ ଦେଶର ଅନ୍ୟତମ ସ୍ୱାଧୀନତା ସଂଗ୍ରାମ ଯାହାକି ବାଣପୁର ଓ ଚିଲିକା ମାଟିରୁ ଆରମ୍ଭ ହୋଇ ଏହାକ୍ରମେ ଦାବାନଳ ପରି ସମଗ୍ର ଓଡ଼ିଶାକୁ ବ୍ୟାପିଯାଇଥିଲା।
ବକ୍ସିଙ୍କ ନେତୃତ୍ୱରେ ଇଂରେଜମାନଙ୍କୁ ପରାଜିତ, ପରାଭୂତ କରି ବାଣପୁର ମାଟିକୁ ରକ୍ତାକ୍ତ କରିଥିଲେ ଆମରବୀର ପାଇକମାନେ। ତୁମ ପରାମ୍ପରାରେ ରହିଛି ଲଢ଼େଇ କରି ବଞ୍ଚିବାର ଅଦମ୍ୟ ପରାକ୍ରମ। କାହାର ଅନୁକମ୍ପା ଓ ଦୟାର ପାତ୍ର ନହୋଇ ନିଜ ଅଧିକାର ପାଇଁ ଲଢ଼େଇ କରିବାକୁ ରାଜ୍ୟପାଳ କହିଥିଲେ।
ମୋ ପରିବାରର ପୂର୍ବପୁରୁଷମାନେ ବାଣପୁର ଓ ଚିଲିକାର ମାଟି, ମା’ର ସମ୍ମାନ, ମର୍ଯ୍ୟାଦା ଓ ବିକାଶ ପାଇଁ ଲଢ଼େଇ କରିବାର ନେତୃତ୍ୱ ନେଇଥିଲେ ଓ ଆପଣମାନଙ୍କର ସେବା କରିଥିଲେ। ଆପଣମାନଙ୍କ ପାଇଁ ଏ ଲଢ଼େଇ ଜାରି ରହିଛି ଓ ଆଗକୁ ସେହିଭଳି ଜାରି ରହିବ ବୋଲି ମୋର ଗଭୀର ବିଶ୍ୱାସ ଅଛି ବୋଲି ରାଜ୍ୟପାଳ ଶ୍ରୀହରିଚନ୍ଦନ ଉପସ୍ଥିତ ଜନତାଙ୍କୁ ସମ୍ବୋଧନ କରିଥିଲେ।
ଏହିସବୁ ସମ୍ବର୍ଦ୍ଧନାକାର୍ଯ୍ୟକ୍ରମ ପରେ ରାଜ୍ୟପାଳ ଶ୍ରୀହରିଚନ୍ଦନ ବାଣପୁରର ଆରାଧ୍ୟ ଦେବୀମା’ ଭଗବତୀଙ୍କମନ୍ଦିରକୁ ଯାଇଥିଲେ ଓ ମା’ଙ୍କ ଦର୍ଶନ ସାରି ଭୂବନେଶ୍ୱର ଅଭିମୁଖେ ପ୍ରତ୍ୟାବର୍ତ୍ତନ କରିଥିଲେ।
