ନୂଆଦିଲ୍ଲୀ: ବାବା ରାମଦେବଙ୍କ ନେତୃତ୍ୱାଧୀନ କମ୍ପାନୀ ପତଞ୍ଜଳି ଆୟୁର୍ବେଦ ବୁଧବାର ଦିନ କହିଛି ଯେ, ଏହାର ଉତ୍ପାଦ ସମ୍ବନ୍ଧରେ କୌଣସି ‘ମିଥ୍ୟା ବିଜ୍ଞାପନ କିମ୍ବା ପ୍ରଚାର’ କରୁନାହିଁ। ଯଦି ତାଙ୍କର ଦାବି ବିଭ୍ରାନ୍ତିକର ବୋଲି ଜଣାପଡେ ତେବେ ସୁପ୍ରିମକୋର୍ଟ ଜୋରିମାନା କିମ୍ବା ମୃତ୍ୟୁଦଣ୍ଡ ପ୍ରଦାନ କଲେ ତାଙ୍କର କୌଣସି ଆପତ୍ତି ନାହିଁ।
ଏହାର ଗୋଟିଏ ଦିନ ପୂର୍ବରୁ ସର୍ବୋଚ୍ଚ ଅଦାଲତ ପତଞ୍ଜଳି ଆୟୁର୍ବେଦକୁ ଅନେକ ରୋଗର ଚିକିତ୍ସାରେ ଏହାର ଔଷଧ ସମ୍ବନ୍ଧରେ ମିଥ୍ୟା ତଥା ବିଭ୍ରାନ୍ତିକର ବିଜ୍ଞାପନ ପ୍ରଦର୍ଶନ ନକରିବାକୁ ଚେତାବନୀ ଦେଇଥିଲେ। ଗୋଟିଏ ଦିନ ପରେ ପତଞ୍ଜଳି ଆୟୁର୍ବେଦ କହିଛି ଯେ, ଏଥିରେ ‘ଏକ କୋଟିରୁ ଅଧିକ ଲୋକଙ୍କ ରେକର୍ଡ ରହିଛି’। ଯେଉଁଥିରେ ସମଗ୍ର ବିଶ୍ୱରୁ ‘ପ୍ରକୃତ ପ୍ରମାଣ’ ରହିଛି।
କମ୍ପାନୀ କହିଛି ଯେ ,ଏହା କୋର୍ଟକୁ ସମ୍ମାନ କରେ ଏବଂ ଯଦି ଆମର ବିଜ୍ଞାପନ ମିଥ୍ୟା ବୋଲି ଜଣାପଡେ ତେବେ ମାନ୍ୟବର କୋର୍ଟ ଆମ ଉପରେ କୋଟି କୋଟି ଟଙ୍କା ଜୋରିମାନା ଲଗାଇଲେ କିମ୍ବା ଆମକୁ ମୃତ୍ୟୁଦଣ୍ଡ ମଧ୍ୟ ଦେଇପାରିବେ, ଏଥିରେ କୌଣସି ଆପତ୍ତି ନାହିଁ।
ହରିଦ୍ୱାରରେ ସାମ୍ବାଦିକମାନଙ୍କୁ ସମ୍ବୋଧିତ କରି ରାମଦେବ କହିଛନ୍ତି ଯେ, ସର୍ବୋଚ୍ଚ ନ୍ୟାୟାଳୟ ମଧ୍ୟ ତାଙ୍କ ପକ୍ଷ ଶୁଣିବା ଉଚିତ୍।
ରାମଦେବ କହିଛନ୍ତି ଯେ, ଯଦି ସୁପ୍ରିମକୋର୍ଟ ତାଙ୍କୁ ତାଙ୍କ ମାମଲା ଉପସ୍ଥାପନ କରିବାର ସୁଯୋଗ ଦିଅନ୍ତି, ତେବେ ସେ ନିଜେ ତାଙ୍କ ଦାବିକୁ ସମର୍ଥନ କରି ସମ୍ପୂର୍ଣ୍ଣ ତଥ୍ୟ, କ୍ଲିନିକାଲ୍ ପ୍ରମାଣ ଏବଂ ବୈଜ୍ଞାନିକ ଅନୁସନ୍ଧାନ କାଗଜପତ୍ର ସହିତ କୋର୍ଟରେ ହାଜର ହେବାକୁ ପ୍ରସ୍ତୁତ ଅଛନ୍ତି।
ସେ କହିଛନ୍ତି ଯେ, ଆୟୁର୍ବେଦ ଏବଂ ଯୋଗ ମାଧ୍ୟମରେ ଗୁରୁତର ରୋଗକୁ ସମ୍ପୂର୍ଣ୍ଣ ଆରୋଗ୍ୟ କରିବା ଦାବିରେ ସେ ନିଶ୍ଚିତ ଅଟନ୍ତି।
ଜଷ୍ଟିସ ଅହସାନୁଦ୍ଦିନ ଅମାନୁଲ୍ଲା ଏବଂ ଜଷ୍ଟିସ ପ୍ରଶାନ୍ତ କୁମାର ମିଶ୍ରଙ୍କ ଏକ ବେଞ୍ଚ ମଙ୍ଗଳବାର ଦିନ ଇଣ୍ଡିଆନ ମେଡିକାଲ ଆସୋସିଏସନ (ଆଇଏମଏ) ର ଆବେଦନ ଶୁଣାଣି କରି ମୌଖିକ ମନ୍ତବ୍ୟ ଦେଇ କହିଛନ୍ତି ଯେ, ପତଞ୍ଜଳି ଆୟୁର୍ବେଦକୁ ଏହିପରି ସମସ୍ତ ମିଥ୍ୟା ତଥା ବିଭ୍ରାନ୍ତିକର ବିଜ୍ଞାପନ ତୁରନ୍ତ ବନ୍ଦ କରିବାକୁ ପଡିବ।