ନୂଆଦିଲ୍ଲୀ: ଗୁପ୍ତଚର ମାମଲାରେ ଗତ ମାସରେ ଦଣ୍ଡିତ ହୋଇଥିବା ପୂର୍ବତନ ଭାରତୀୟ ନୌସେନା କର୍ମଚାରୀଙ୍କୁ ଦିଆଯାଇଥିବା ମୃତ୍ୟୁଦଣ୍ଡ ବିରୋଧରେ କତରର ଏକ କୋର୍ଟ ଭାରତର ଆବେଦନକୁ ଗ୍ରହଣ କରିଛନ୍ତି। ସୂତ୍ରରୁ ପ୍ରକାଶ ଯେ, ଆବେଦନକୁ ଯାଞ୍ଚ କରିବା ପରେ କତର କୋର୍ଟ ଏକ ଶୁଣାଣି ତାରିଖ ସ୍ଥିର କରିବେ। ଅଗଷ୍ଟ ୨୦୨୨ରେ ଗିରଫ ହୋଇଥିବା ପୂର୍ବତନ ଭାରତୀୟ ନୌସେନା ଅଧିକାରୀମାନେ ହେଉଛନ୍ତି ପୂର୍ଣ୍ଣନ୍ଦୁ ତିୱାରୀ, ସୁଗୁନାକର ପକାଲା, ଅମିତ ନାଗପାଲ, ସଞ୍ଜୀବ ଗୁପ୍ତା, ନବତେଜ ସିଂ ଗିଲ, ବିରେନ୍ଦ୍ର କୁମାର ବର୍ମା, ସୌରଭ ବଶିଷ୍ଠ ଏବଂ ରାଗେଶ ଗୋପକୁମାର।
ଖବର ଅନୁଯାୟୀ, ଗୁପ୍ତଚର ଅଭିଯୋଗରେ କତରର ଗୁପ୍ତଚର ସଂସ୍ଥା ଦ୍ୱାରା ଆଠ ଜଣ ଭାରତୀୟଙ୍କୁ ଗିରଫ କରାଯାଇଥିଲା। କିନ୍ତୁ କତର ଏପର୍ଯ୍ୟନ୍ତ ସେମାନଙ୍କ ବିରୋଧରେ ଆସିଥିବା ଅଭିଯୋଗକୁ ସାର୍ବଜନୀନ କରିନାହାଁନ୍ତି। ତାଙ୍କ ଜାମିନ ଆବେଦନକୁ ଅନେକ ଥର ଖାରଜ କରାଯାଇଥିଲା ଏବଂ ଗତ ମାସରେ କତର କୋର୍ଟ ତାଙ୍କ ବିରୋଧରେ ରାୟ ଶୁଣାଇଥିଲେ।
ଏହାପୂର୍ବରୁ ଗୁରୁବାର ଦିନ ଭାରତର ବୈଦେଶିକ ବ୍ୟାପାର ମନ୍ତ୍ରଣାଳୟ କହିଛି ଯେ, କତର କୋର୍ଟ ଦ୍ଵାରା ଆଠ ଜଣ ଭାରତୀୟ ନୌସେନା କର୍ମଚାରୀଙ୍କୁ ଦିଆଯାଇଥିବା ମୃତ୍ୟୁଦଣ୍ଡ ବିରୋଧରେ ଆବେଦନ ପ୍ରକ୍ରିୟା ଚାଲିଛି। ବୈଦେଶିକ ବ୍ୟାପାର ମନ୍ତ୍ରଣାଳୟର ମୁଖପାତ୍ର ଅରିନ୍ଦମ ବାଗଚି କହିଛନ୍ତି ଯେ, କତର କର୍ତ୍ତୃପକ୍ଷଙ୍କ ସହ ଭାରତ ଆଲୋଚନା କରୁଛି ଏବଂ ସରକାର ଭାରତୀୟ ନାଗରିକଙ୍କୁ ସମସ୍ତ ଆଇନଗତ ଏବଂ ଦୂତାବାସ ସମ୍ବନ୍ଧୀୟ ସହାୟତା ଜାରି ରଖିବେ।
ଅକ୍ଟୋବର ୨୬ ତାରିଖରେ କତରର ‘କୋର୍ଟ ଅଫ୍ ଫାଷ୍ଟ ଇନଷ୍ଟାନ୍ସ’ ଆଠ ଜଣ ଭାରତୀୟଙ୍କୁ ମୃତ୍ୟୁଦଣ୍ଡ ଦେଇଥିଲା। ଭାରତ ଏହି ନିଷ୍ପତ୍ତିକୁ ଆଶ୍ଚର୍ଯ୍ୟଜନକ ବୋଲି ବର୍ଣ୍ଣନା କରିଥିଲା ଏବଂ ଏହି ପ୍ରସଙ୍ଗରେ ସମସ୍ତ ଆଇନଗତ ବିକଳ୍ପ ଅନୁସନ୍ଧାନ କରିବା ବିଷୟରେ କହିଥିଲା। କିଛି ଦିନ ପରେ ମୃତ୍ୟୁଦଣ୍ଡ ବିରୋଧରେ ଏକ ଆବେଦନ କରାଯାଇଥିଲା।