ଅନ୍ତର୍ଜାତୀୟ କ୍ରିକେଟ୍‌ରେ ଆଉ ଚାଲିବନି ଯୁବିଙ୍କ ବ୍ୟାଟ୍‌

ଭାରତୀୟ ଭେଟେରାନ କ୍ରିକେଟର ତଥା ଭାରତର ବିଶ୍ବକପ୍‌ ହିରୋ ଯୁବରାଜ ସିଂ ଅନ୍ତର୍ଜାତୀୟ କ୍ରିକେଟକୁ ଅଲବିଦା ଜଣାଇଛନ୍ତି । ଦକ୍ଷିଣ ମୁମ୍ବାଇର ଏକ ହୋଟେଲରେ ପ୍ରେସ୍‌ମିଟ୍‌ ଜରିଆରେ ନିଜର ଅବସର ଘୋଷଣା କରିଛନ୍ତି ଯୁବରାଜ ସିଂ । ଭାରତ ପକ୍ଷରୁ 304ଟି ଦିନିକିଆ, 58 ଟି20 ଏବଂ 40ଟି ଟେଷ୍ଟ ଖେଳିଥିବା ଯୁବରାଜ ଭାରତକୁ ଦୁଇଟି ବିଶ୍ବକପ୍‌ ବିଜୟୀ କରାଇବାରେ ପ୍ରମୁଖ ଭୂମିକା ଗ୍ରହଣ କରିଛନ୍ତି । ଅବସର ଗ୍ରହଣ ଘୋଷଣା ପୂର୍ବରୁ ଯୁବରାଜ ନିଜ ପିତା ଯୋଗରାଜଙ୍କ ସହିତ ଏକ ସର୍ଟ ଫିଲ୍ମ ଦେଖାଇଥିଲେ । ମୋର କ୍ରିକେଟ କ୍ୟାରିୟର ଏକ ସୁନ୍ଦର କାହାଣୀ ରହିଥିଲା ମାତ୍ର ବର୍ତ୍ତମାନ ଏହାକୁ ବିଦାୟ ଜଣାଇ ଆଗକୁ ବଢିବାକୁ ପଡିବ ବୋଲି ଭାବବିହ୍ବଳ ଯୁବରାଜ କହିଥିଲେ । ଏହି ଅବସରରେ ଯୁବରାଜ ବିସିସିଆଇ, ଆଇସିସି, ପଞ୍ଜାବ କ୍ରିକେଟ ଆସୋସିଏସନ୍‌, ସାଥୀ ଖେଳାଳି ଏବଂ ପରିବାରକୁ ଧନ୍ୟବାଦ ଜଣାଇଥିଲେ । ଭାରତର ପ୍ରଥମ ଟି 20 ବିଶ୍ବକପ୍‌ରେ ଇଂଲଣ୍ଡ ବିପକ୍ଷରେ 6ଟି ବଲ୍‌ରୁ 6ଟି ଛକ୍କା ମାରିବା ସହିତ ଅଷ୍ଟ୍ରେଲିଆ ବିପକ୍ଷରେ 36 ବଲ୍‌ରୁ 70 ରନ୍‌ ସଂଗ୍ରହ କରି ଭାରତକୁ ବିଜୟୀ କରାଇଥିଲେ । ସେହିପରି 2011 ଦିନିକିଆ ବିଶ୍ବକପ୍‌ରେ କ୍ୟାନ୍‌ସରରେ ପୀଡିତ ହୋଇଥିବା ସତ୍ତ୍ବେ ଲଢୁଆ ପ୍ରଦର୍ଶନ କରି 341 ରନ୍‌ ଏବଂ 15ଟି ଓ୍ବିକେଟ୍‌ ଅକ୍ତିଆର କରିଥିଲେ । ନିଜ ଆନ୍ତର୍ଜାତୀୟ କ୍ୟାରିୟରରେ 304 ଦିନିକିଆରୁ 14 ଶତକ ଏବଂ 52 ଅର୍ଦ୍ଧଶତକ ସହିତ 8701 ରନ୍‌ ସଂଗ୍ରହ କରିଥିବା ବେଳେ 111ଟି ଓ୍ବିକେଟ୍‌ ଅକ୍ତିଆର କରିଛନ୍ତି । ସେହିପରି 40ଟି ଟେଷ୍ଟରୁ 1900 ରନ୍‌ ସଂଗ୍ରହ କରିବା ସହିତ 9ଟି ଓ୍ବିକେଟ୍‌ ଅକ୍ତିଆର କରିଛନ୍ତି । ସେହିପରି ଭାବରେ ଟି 20ରେ 58ଟି ମ୍ୟାଚ୍‌ ଖେଳି ଯୁବି 1177 ରନ୍‌ ସଂଗ୍ରହ କରିବା ସହିତ 28ଟି ଓ୍ବିକେଟ୍‌ ଅକ୍ତିଆର କରିଛନ୍ତି । ନିଜ ଆନ୍ତର୍ଜାତୀୟ କ୍ୟାରିୟରରେ ସମୁଦାୟ 137ଟି କ୍ୟାଚ୍‌ ନେଇଛନ୍ତି ଯୁବରାଜ । 2000 ମସିହା ଚାମ୍ପିୟନ୍ସ ଟ୍ରଫିରୁ କ୍ୟାରିୟର ଆରମ୍ଭ କରିଥିବା ଯୁବରାଜ ଶେଷ ଥର ପାଇଁ ଜୁନ୍‌ 30, 2017ରେ ଭାରତୀୟ ଜର୍ସିରେ ନଜର ଆସିଥିଲେ ।