ନୂଆଦିଲ୍ଲୀ: ମାତ୍ର ଦୁଇ ମାସ ମଧ୍ୟରେ ବିକଶିତ ଭାରତ ସଂକଳ୍ପ ଯାତ୍ରାକୁ ଦେଶବ୍ୟାପୀ ବିପୁଳ ଜନ ସମର୍ଥନ ମିଳିଛି । ଏଥିରେ ୧୫ କୋଟିରୁ ଅଧିକ ଉତ୍ସାହୀ ବ୍ୟକ୍ତି ଅଂଶଗ୍ରହଣ କରିଛନ୍ତି । ଏହି ବିଶାଳ ଜନଭାଗିଦାରୀ ଏକ ସମୃଦ୍ଧ ଏବଂ ସମାବେଶୀ ଭାରତ ଗଠନ ଦିଗରେ ସମନ୍ୱିତ ମାର୍ଗ ପ୍ରସ୍ତୁତି ପାଇଁ ଯାତ୍ରାର ପ୍ରଭାବ ବିଷୟରେ ବର୍ଣ୍ଣନା କରେ । ଦେଶବ୍ୟାପୀ ସରକାରୀ ଯୋଜନା ଗୁଡ଼ିକର ଶତ ପ୍ରତିଶତ ଲାଭ ପହଞ୍ଚାଇବା ଉଦ୍ଦେଶ୍ୟରେ ବିକଶିତ ଭାରତ ସଂକଳ୍ପ ଯାତ୍ରା ଏକ ଐତିହାସିକ ପଦକ୍ଷେପ ।
ରାଜସ୍ଥାନ, ମଧ୍ୟପ୍ରଦେଶ, ଛତିଶଗଡ଼ ଓ ତେଲେଙ୍ଗାନା ରାଜ୍ୟରେ ଏହି ଅଭିଯାନ ଆରମ୍ଭ ହେବା ପରେ ଲୋକ ମାନଙ୍କର ଅଂଶଗ୍ରହଣ ସଂଖ୍ୟା ନାଟକୀୟ ଭାବେ ବୃଦ୍ଧି ପାଇଛି । ୨୦୨୩ ଡିସେମ୍ବର ୧୩ ତାରିଖରେ ଚତୁର୍ଥ ସପ୍ତାହ ଶେଷ ସୁଦ୍ଧା ଭିବିଏସ୍ୱାଇ ଯାତ୍ରା ୨.୦୬ କୋଟି ଲୋକଙ୍କ ପାଖରେ ପହଞ୍ଚିଥିବା ବେଳେ ୨୦୨୩ ଡିସେମ୍ବର ୨୨ ସୁଦ୍ଧା ୫ ସପ୍ତାହ ଶେଷରେ ଏହି ସଂଖ୍ୟା ୫ କୋଟିକୁ ବୃଦ୍ଧି ପାଇଛି । ପରବର୍ତ୍ତୀ ୪ ସପ୍ତାହ ମଧ୍ୟରେ ଭିବିଏସ୍ୱାଇ ଯାତ୍ରାରେ ୧୦ କୋଟି ବ୍ୟକ୍ତି ଅଂଶଗ୍ରହଣ କରି ୧୫ କୋଟି ମାଇଲଖୁଣ୍ଟ ଅତିକ୍ରମ କରିଥିଲେ । ଜାନୁଆରୀ ୧୭ ତାରିଖ ସୁଦ୍ଧା ବିକଶିତ ଭାରତ ସଂକଳ୍ପ ଯାତ୍ରା ଡ୍ୟାସବୋର୍ଡ ଅନୁଯାୟୀ ୨.୨୧ ଲକ୍ଷ ଗ୍ରାମ ପଞ୍ଚାୟତ ଏବଂ ୯,୫୪୧ ସହରାଞ୍ଚଳରେ ୧୫.୩୪ କୋଟି ଅଂଶଗ୍ରହଣକାରୀ ଅଂଶଗ୍ରହଣ କରିଥିଲେ ।
ଜନ ଭାଗିଦାରୀ : ପ୍ରତ୍ୟେକ ପଦକ୍ଷେପ ଏକାଠି :
ଏହି ଯାତ୍ରା ‘ଜନ ଭାଗିଦାରୀ’ ର ଭାବନାକୁ ପ୍ରତିଫଳିତ କରିଥାଏ । ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀଙ୍କ ଦ୍ୱାରା ଶୁଭାରମ୍ଭ କରାଯାଇଥିବା ଏହି କାର୍ଯ୍ୟକ୍ରମର ଲକ୍ଷ୍ୟ ହେଉଛି ସହର ଓ ଗ୍ରାମକୁ ଗ୍ରାମ ବୁଲି ଆଇଇସି ଭ୍ୟାନ୍ ମାଧ୍ୟମରେ ପ୍ରତ୍ୟେକ ଯୋଗ୍ୟ ବ୍ୟକ୍ତିଙ୍କ ପାଖରେ କଲ୍ୟାଣକାରୀ ଯୋଜନା ପହଞ୍ଚାଇବା । ଏହି ଭ୍ୟାନ୍ ମାଧ୍ୟମରେ, ଏହା ସମୁଦାୟକୁ ସରକାରୀ ଯୋଜନା, ସ୍ଥାୟୀ ଚାଷ ଏବଂ ସୁଲଭ ସ୍ୱାସ୍ଥ୍ୟ ସେବା, ପରିମଳ ଏବଂ ଆର୍ଥିକ ସ୍ୱାଧୀନତା ବିଷୟରେ ଜ୍ଞାନ ପ୍ରଦାନ କରେ ।
ସ୍ୱାସ୍ଥ୍ୟ ଶିବିରରେ ୪ କୋଟିରୁ ଅଧିକ ଲୋକଙ୍କ ଯାଂଚ କରାଯାଇଛି :
ଜାନୁଆରୀ ୧୭, ୨୦୨୪ ସୁଦ୍ଧା ୪ କୋଟିରୁ ଅଧିକ ଲୋକଙ୍କର ସ୍ୱାସ୍ଥ୍ୟ ଶିବିରରେ ଯାଂଚ କରାଯାଇଛି । ମାଇଁ ଭାରତରେ ୩୮ ଲକ୍ଷରୁ ଅଧିକ ପଞ୍ଜୀକରଣ ହୋଇଛି । ସମସ୍ତଙ୍କ ପାଇଁ ସୁଲଭ ସ୍ୱାସ୍ଥ୍ୟ ସେବା ସୁନିଶ୍ଚିତ କରିବା ନିମନ୍ତେ ୨ କୋଟିରୁ ଅଧିକ ଆୟୁଷ୍ମାନ ଭାରତ ସ୍ୱାସ୍ଥ୍ୟ କାର୍ଡ ଜାରି କରାଯାଇଛି । ଏହି ଯାତ୍ରା ୨ ଲକ୍ଷରୁ ଅଧିକ ଗ୍ରାମ ପଞ୍ଚାୟତକୁ ଅନ୍ତର୍ଭୁକ୍ତ କରିଛି । ୨୦୪୭ ସୁଦ୍ଧା ବିକଶିତ ଭାରତ ଗଠନ କାର୍ଯ୍ୟକୁ ଆଗେଇ ନେବାକୁ ୧୧ କୋଟିରୁ ଅଧିକ ଲୋକ ସଂକଳ୍ପ ନେଇଥିଲେ ।
ଗ୍ରାମ ଅନୁଯାୟୀ ପ୍ରକୃତ ପ୍ରଭାବ :
ଭିବିଏସ୍ୱାଇ ଯାତ୍ରାର ପ୍ରଭାବକୁ ଅଣଦେଖା କରାଯାଇପାରିବ ନାହିଁ । ୧ ଲକ୍ଷରୁ ଅଧିକ ଗ୍ରାମ ପଞ୍ଚାୟତ ଆୟୁଷ୍ମାନ କାର୍ଡ ପାଇଁ ଶତ ପ୍ରତିଶତ ସଫଳତା ହାସଲ କରିଛନ୍ତି, ଯାହା ଲକ୍ଷ ଲକ୍ଷ ଲୋକଙ୍କୁ ସ୍ୱାସ୍ଥ୍ୟ ସେବାରେ ସଶକ୍ତ କରିଛି । ‘ହର ଘର ଜଳ’ ଯୋଜନା ମାଧ୍ୟମରେ ସ୍ୱଚ୍ଛ ଜଳ ବର୍ତ୍ତମାନ ୭୯,୦୦୦ରୁ ଅଧିକ ଗ୍ରାମ ପଞ୍ଚାୟତରେ ପହଞ୍ଚୁଥିବା ବେଳେ ୧.୩୮ ଲକ୍ଷରୁ ଅଧିକ ଗ୍ରାମ ପଞ୍ଚାୟତରେ ଶତପ୍ରତିଶତ ଜମି ରେକର୍ଡ ଡିଜିଟାଲୀକରଣ ସ୍ୱଚ୍ଛତା ଏବଂ ନିରାପତ୍ତାକୁ ସୁଗମ କରୁଛି । ଏହା ବ୍ୟତୀତ ୧୭,୦୦୦ ରୁ ଅଧିକ ଗ୍ରାମ ପଞ୍ଚାୟତ ଓଡିଏଫ୍ ପ୍ଲସ୍ ଅନୁପାଳନ ହାସଲ କରିଛନ୍ତି, ଯାହା ସ୍ୱଚ୍ଛ ଜୀବନଯାପନର ପ୍ରମାଣ ହେଇଥାଏ ।
ପରିସଂଖ୍ୟାନ ବ୍ୟତୀତ, ଏକ ଅଂଶୀଦାର ସ୍ୱପ୍ନ :
ଯାତ୍ରାର ପ୍ରକୃତ ସଫଳତା ଏକ ସାମୂହିକ ସ୍ୱପ୍ନ – ଏକ ଭାରତର ସ୍ୱପ୍ନ ଯେଉଁଠାରେ ପ୍ରଗତି ପ୍ରତ୍ୟେକ ଦ୍ୱାରରେ ପହଞ୍ଚିଥାଏ, ଯେଉଁଠାରେ ସମସ୍ତଙ୍କ ଭିତରେ ସମୃଦ୍ଧି ବଂଟନ ହୋଇଥାଏ ଏବଂ ଯେଉଁଠାରେ ବିକାଶ ସଶକ୍ତ ଜୀବନରେ ପରିଣତ ହୁଏ , ସେସବୁକୁ ଜାଗ୍ରତ କରିବାରେ ହିଁ ରହିଛି । ପ୍ରତ୍ୟେକ ଗ୍ରାମ ପଞ୍ଚାୟତ, ପ୍ରତ୍ୟେକ ପଞ୍ଜୀକୃତ ହିତାଧିକାରୀ ଏବଂ ପ୍ରତ୍ୟେକ ପ୍ରତିଶ୍ରୁତି ସହିତ ଏହି ଯାତ୍ରା ଭାରତକୁ ଏହି ସ୍ୱପ୍ନକୁ ବାସ୍ତବ ରୂପ ଦେବା ଦିଗରେ ଏକ ପାଦ ଆଗକୁ ନେଇ ଯାଇଛି ।
