ଶ୍ରୀରାମଲଲାଙ୍କ ପ୍ରାଣ ପ୍ରତିଷ୍ଠା ପାଇଁ ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀଙ୍କ ୧୧ ଦିନିଆ ସ୍ୱତନ୍ତ୍ର ରୀତିନୀତି

ନୂଆଦିଲ୍ଲୀ: ଜାନୁଆରୀ ୧୨, ୨୦୨୪ ରୁ ନାସିକର କଳା ରାମ ମନ୍ଦିରରେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ ୧୧ ଦିନିଆ ପବିତ୍ର ସମାରୋହ ଆରମ୍ଭ କରିଥିଲେ, ଯାହା ଜାନୁଆରି ୨୨ ରେ ଅଯୋଧ୍ୟା ଧାମ ମନ୍ଦିରରେ ଶ୍ରୀରାମଲାଲାଙ୍କ ପୂଜାର୍ଚ୍ଚନା ପର୍ଯ୍ୟନ୍ତ ଅନୁଷ୍ଠିତ ହେବ। ସେ ନାସିକ ଧାମ – ପଞ୍ଚବଟିରୁ ଏହି ରୀତିନୀତି ଆରମ୍ଭ କରିଥିଲେ ଯେଉଁଠାରେ ଭଗବାନ ରାମ ଗୁରୁତ୍ୱପୂର୍ଣ୍ଣ ସମୟ ବିତାଇଥିଲେ ।

ଶ୍ରୀକଳାରାମ ମନ୍ଦିର, ନାସିକ

ଜାନୁଆରୀ ୧୨, ୨୦୨୪ରେ ପ୍ରଧାନମନ୍ତ୍ରୀ ମହାରାଷ୍ଟ୍ରର ନାସିକରେ ଅବସ୍ଥିତ କଳାରାମ ମନ୍ଦିରରେ ପୂଜାର୍ଚ୍ଚନା କରିଥିଲେ । ଶ୍ରୀରାମ କୁଣ୍ଡରେ ମଧ୍ୟ ସେ ଦର୍ଶନ ଓ ପୂଜାର୍ଚ୍ଚନା କରିଥିଲେ । ଅଯୋଧ୍ୟାକୁ ଭଗବାନ ରାମଙ୍କ ବିଜୟୀ ସ୍ୱଦେଶ ପ୍ରତ୍ୟାବର୍ତ୍ତନ କୁ ଦର୍ଶାଉଥିବା ରାମାୟଣର ‘ଯୁଦ୍ଧ କାଣ୍ଡ’ ବିଭାଗ ମରାଠୀ ଭାଷାରେ ପ୍ରଧାନମନ୍ତ୍ରୀଙ୍କୁ ପାଠ କରାଯାଇଥିଲା। ପ୍ରଧାନମନ୍ତ୍ରୀ ସନ୍ଥ ଏକନାଥଜୀଙ୍କ ଦ୍ୱାରା ମରାଠୀରେ ଲିଖିତ  ରାମାୟଣର ଭାବାର୍ଥ ଶବ୍ଦ ମଧ୍ୟ ଶୁଣିଥିଲେ ।

ବୀରଭଦ୍ର ମନ୍ଦିର, ଲେପାକ୍ଷୀ, ଆନ୍ଧ୍ର ପ୍ରଦେଶ

ମଙ୍ଗଳବାର, ୧୬ ଜାନୁଆରୀ ୨୦୨୪ରେ ପ୍ରଧାନମନ୍ତ୍ରୀ ଆନ୍ଧ୍ରପ୍ରଦେଶରେ ଅବସ୍ଥିତ ପୁଟ୍ଟପର୍ଥିର ଲେପାକ୍ଷୀରେ ଥିବା ବୀରଭଦ୍ର ମନ୍ଦିର ପରିଦର୍ଶନ କରି ପୂଜାର୍ଚ୍ଚନା କରିଥିଲେ । ପ୍ରଧାନମନ୍ତ୍ରୀ ତେଲୁଗୁ ଭାଷାରେ ରଙ୍ଗନାଥ ରାମାୟଣ ଶୁଣିଥିଲେ ଏବଂ ଆନ୍ଧ୍ରପ୍ରଦେଶର ଥୋଲୁ ବୋମାଲତା ନାମକ ପ୍ରାଚୀନ ଛାୟା କଣ୍ଢେଇ କଳା ଦ୍ୱାରା ଚିତ୍ରିତ ଜଟାୟୁଙ୍କ କାହାଣୀ ଦେଖିଥିଲେ ।

ଗୁରୁବାୟୁର ମନ୍ଦିର, ଥ୍ରିଶୂର, କେରଳ

ପ୍ରଧାନମନ୍ତ୍ରୀ କେରଳର ଗୁରୁବାୟୁରସ୍ଥିତ ଗୁରୁବାୟୁର ମନ୍ଦିରକୁ ଯାଇ ପୂଜାର୍ଚ୍ଚନା କରିଥିଲେ ।

ଥ୍ରିପ୍ରୟାର ଶ୍ରୀରାମସ୍ୱାମୀ ମନ୍ଦିର, ତ୍ରିଶୂର, କେରଳ

ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ ୨୦୨୪ ଜାନୁଆରୀ ୧୭ ତାରିଖରେ କେରଳର ଥ୍ରିପ୍ରୟାରଠାରେ ଥିବା ଶ୍ରୀରାମସ୍ୱାମୀଙ୍କ ଦିବ୍ୟ ବାସଭବନ ପରିଦର୍ଶନ କରିଥିଲେ । ଶ୍ରୀରାମସ୍ୱାମୀ ମନ୍ଦିରରେ ସେ ଦର୍ଶନ ଓ ପୂଜାର୍ଚ୍ଚନା କରିଥିଲେ । ପ୍ରଧାନମନ୍ତ୍ରୀ ସାଂସ୍କୃତିକ କାର୍ଯ୍ୟକ୍ରମ ଦେଖିବା ସହ କଳାକାର ଓ ବଟୁକମାନଙ୍କୁ ସମ୍ବର୍ଦ୍ଧିତ କରିଥିଲେ ।

ଶ୍ରୀ ରଙ୍ଗନାଥସ୍ୱାମୀ ମନ୍ଦିର, ତିରୁଚିରାପଲ୍ଲୀ, ତାମିଲନାଡୁ

୨୦ ଜାନୁଆରୀ ୨୦୨୪ ପବିତ୍ର ଦିନରେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ ତାମିଲନାଡୁର ଶ୍ରୀ ରଙ୍ଗନାଥସ୍ୱାମୀଙ୍କ ପବିତ୍ର ପୀଠ ପରିଦର୍ଶନ କରିଥିଲେ । ସେ ସେହି ପବିତ୍ର ସ୍ଥାନରେ କାମ୍ବା ରାମାୟଣର  କାବ୍ୟ ପରିବେଷଣ ମଧ୍ୟ ଶୁଣିଥିଲେ ଯେଉଁଠାରେ ପ୍ରସିଦ୍ଧ କାମ୍ବନ ପ୍ରଥମେ ତାଙ୍କର କଳାକୃତିକୁ ବିଶ୍ୱ ସମ୍ମୁଖରେ ଉନ୍ମୋଚନ କରିଥିଲେ ।

ଶ୍ରୀ ଅରୁଲମିଗୁ ରାମନାଥସ୍ୱାମୀ ମନ୍ଦିର, ରାମେଶ୍ୱରମ୍

ଶ୍ରୀ ରଙ୍ଗନାଥସ୍ୱାମୀ ମନ୍ଦିରରେ ପୂଜାର୍ଚ୍ଚନା କରିବା ପରେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ ତାମିଲନାଡୁର ରାମେଶ୍ୱରମ୍ ସ୍ଥିତ ଅରୁଲମିଗୁ ରାମନାଥସ୍ୱାମୀଙ୍କ ପବିତ୍ର ବାସଭବନ ପରିଦର୍ଶନ କରିଥିଲେ। ସେ ସେଠାରେ ଶ୍ରଦ୍ଧାଞ୍ଜଳି ଅର୍ପଣ କରିଥିଲେ ଏବଂ ମହାପ୍ରଭୁଙ୍କ ପ୍ରତି ଭକ୍ତି ଅର୍ପଣ କରିଥିଲେ, ଯିଏ କି ବାରଟି ଜ୍ୟୋତିର୍ଲିଙ୍ଗମାନଙ୍କ ମଧ୍ୟରୁ ଅନ୍ୟତମ ଭାବରେ ସମ୍ମାନିତ ଅଟନ୍ତି । ଭଜନ ସନ୍ଧ୍ୟା ଭଳି ବିଭିନ୍ନ କାର୍ଯ୍ୟକ୍ରମରେ ଯୋଗ ଦେଇ ସନ୍ଧ୍ୟାରେ ମନ୍ଦିର ପରିସରରେ ଅନେକ ଆଧ୍ୟାତ୍ମିକ ଗୀତ ପରିବେଷଣ କରାଯାଇଥିଲା।

କୋଥଣ୍ଡରାମାସ୍ୱାମୀ ମନ୍ଦିର, ଧନୁଷକୋଡ଼ି

ଆଜି ପ୍ରଧାନମନ୍ତ୍ରୀ ଧନୁଷକୋଡ଼ିସ୍ଥିତ କୋଥଣ୍ଡାରାମା ସ୍ୱାମୀ ମନ୍ଦିରରେ ଦର୍ଶନ ଓ ପୂଜାର୍ଚ୍ଚନା  କରିଛନ୍ତି । ଧନୁଷକୋଡ଼ି ନିକଟରେ ପ୍ରଧାନମନ୍ତ୍ରୀ ଆରିଚାଲ ମୁନାଇ ଗସ୍ତ କରିଥିଲେ, ଯେଉଁଠାରୁ ରାମ ସେତୁ  ନିର୍ମାଣ ହୋଇଥିଲା ବୋଲି କୁହାଯାଏ ।

BS