ନୂଆଦିଲ୍ଲୀ: ରାମ ମନ୍ଦିର ପ୍ରତିଷ୍ଠା ସମାରୋହ ପୂର୍ବରୁ ଅଯୋଧ୍ୟାକୁ ମିଳିଥିବା ପୁନଃନିର୍ମାଣ କାରଣରୁ ଆଗାମୀ ମାସରେ ଉତ୍ତରପ୍ରଦେଶ ୨୦ ନିୟୁତରୁ ଅଧିକ ପର୍ଯ୍ୟଟକଙ୍କୁ ସ୍ୱାଗତ କରିବାକୁ ପ୍ରସ୍ତୁତ ଅଛି। ପ୍ରଧାନମନ୍ତ୍ରୀ ନରେନ୍ଦ୍ର ମୋଦିଙ୍କ ଅଧ୍ୟକ୍ଷତାରେ ଉତ୍ତରପ୍ରଦେଶର ଅଯୋଧ୍ୟାରେ ରାମ ମନ୍ଦିରରେ ରାମଲାଲାଙ୍କ ପ୍ରାଣପ୍ରତିଷ୍ଠା ସମାରୋହ ଅନୁଷ୍ଠିତ ହୋଇଯାଇଛି।
ରାମ ମନ୍ଦିର ଉଦ୍ଘାଟନ ସମାରୋହ ପୂର୍ବରୁ ଅଯୋଧ୍ୟା ସହରର ପୁନରୁଦ୍ଧାର ଓ ପୁନଃବିକାଶ ପାଇଁ ୧୦ ବିଲିୟନ ଡଲାର (ପ୍ରାୟ ୮୫,୦ କୋଟି ଟଙ୍କା) ଖର୍ଚ୍ଚ ହୋଇଥିବା ଆକଳନ କରାଯାଇଛି। ପାଖାପାଖି ୨୦୦ ବିଲିୟନ ଡଲାର ରାଜସ୍ୱ ସହିତ ପର୍ଯ୍ୟଟନ ଭାରତର ଅର୍ଥନୀତିରେ ପ୍ରାୟ ୭% ଯୋଗଦାନ ଦେଇଥାଏ, ଯାହାକି ଅଧିକାଂଶ ବୃହତ ଉଦୀୟମାନ ଏବଂ ବିକଶିତ ଅର୍ଥନୀତିଠାରୁ ୫ ପ୍ରତିଶତ ପଏଣ୍ଟ ପର୍ଯ୍ୟନ୍ତ କମ୍ ଅଟେ। ଏକ ନୂତନ ରିପୋର୍ଟରୁ ଜଣାପଡ଼ିଛି ଯେ ଅଯୋଧ୍ୟାର ଏହି ବ୍ୟାପକ ପୁନଃନିର୍ମାଣଦ୍ୱାରା ଉତ୍ତରପ୍ରଦେଶ ସରକାର ୨୫,୦୦୦ କୋଟି ଟଙ୍କାରୁ ଅଧିକ ଟିକସ ରାଜସ୍ୱ ଆଦାୟ କରିପାରିବେ। ବ୍ରୋକରେଜ୍ ଫାର୍ମ ଜେଫେରିଜ୍ ଅନୁଯାୟୀ, ନୂଆ ବିମାନବନ୍ଦର, ରେଳ ଷ୍ଟେସନ, ଟାଉନସିପ୍, ଉନ୍ନତ ସଡ଼କ ଯୋଗାଯୋଗ ଇତ୍ୟାଦି ସମେତ ଅଯୋଧ୍ୟାର ମୋଟ ପୁନଃନିର୍ମାଣ ପାଇଁ ପ୍ରାୟ ୮୫,୦୦୦ କୋଟି ଟଙ୍କା ଖର୍ଚ୍ଚ ହୋଇଛି।
ଏହି ବିଶାଳ ଅଯୋଧ୍ୟା ପୁନଃନିର୍ମାଣ ବର୍ଷକୁ ୫୦ ନିୟୁତରୁ ଅଧିକ ପର୍ଯ୍ୟଟକଙ୍କୁ ସହରକୁ ଆକର୍ଷିତ କରିପାରିବ ବୋଲି ଜେଫେରିଜ୍ର ରିପୋର୍ଟରେ ଦର୍ଶାଯାଇଛି। ଅମୃତସରର ସୁବର୍ଣ୍ଣ ମନ୍ଦିରକୁ ବର୍ଷକୁ ୩୦-୩୫ ନିୟୁତ ଦର୍ଶକ ଆସୁଥିବାବେଳେ ତିରୁପତି ମନ୍ଦିରରେ ୨୫-୩୦ ନିୟୁତ ଲୋକ ଦର୍ଶନ କରିଥାନ୍ତି। ସମଗ୍ର ବିଶ୍ୱରେ ଭାଟିକାନ ସହରକୁ ପ୍ରତିବର୍ଷ ପ୍ରାୟ ୯ ନିୟୁତ ଏବଂ ସାଉଦି ଆରବର ମକ୍କାକୁ ପ୍ରାୟ ୨୦ ନିୟୁତ ପର୍ଯ୍ୟଟକ ଆସନ୍ତି ବୋଲି ରିପୋର୍ଟରେ କୁହାଯାଇଛି।
ରାମ ମନ୍ଦିର ଜରିଆରେ ଉତ୍ତରପ୍ରଦେଶକୁ ମିଳିପାରେ ୪ ଲକ୍ଷ କୋଟି ଟଙ୍କା
ଅଯୋଧ୍ୟାରେ ପର୍ଯ୍ୟଟନକୁ ସହାୟତା କରିବା ଉଦ୍ଦେଶ୍ୟରେ ସହରର ପ୍ରଥମ ପର୍ଯ୍ୟାୟ ବିମାନବନ୍ଦର ଏବେ କାର୍ଯ୍ୟକ୍ଷମ ହୋଇଛି, ଯେଉଁଥିରେ ୧ ନିୟୁତ ଯାତ୍ରୀ ଅଛନ୍ତି। ଖୁବଶୀଘ୍ର ଏହାକୁ ୨୦୨୫ ସୁଦ୍ଧା ୬ ନିୟୁତକୁ ବୃଦ୍ଧି କରାଯିବ। ଏହାବ୍ୟତୀତ ରେଳବାଇ ଏହାର କ୍ଷମତାକୁ ଦ୍ୱିଗୁଣିତ କରି ଦୈନିକ ୬୦,୦୦୦ ଯାତ୍ରୀଙ୍କୁ ପହଞ୍ଚାଇଛି।
ବର୍ତ୍ତମାନ ଅଯୋଧ୍ୟାରେ ୫୯୦ ରୁମ୍ ବିଶିଷ୍ଟ ପ୍ରାୟ ୧୭ଟି ହୋଟେଲ ରହିଛି। ୭୩ଟି ନୂଆ ହୋଟେଲ ପାଇପଲାଇନରେ ଥିବାବେଳେ ସେଥିମଧ୍ୟରୁ ୪୦ଟି ନିର୍ମାଣାଧୀନ ରହିଛି । ଇଣ୍ଡିଆନ ହୋଟେଲ, ମେରିଓଟ ଓ ୱିଣ୍ଡହାମ ହୋଟେଲ ପାଇଁ ଚୁକ୍ତି ସ୍ୱାକ୍ଷର କରିସାରିଥିବାବେଳେ ଆଇଟିସି ଅଯୋଧ୍ୟାରେ ସୁଯୋଗ ଖୋଜୁଛି। ଅଯୋଧ୍ୟାରେ ୧୦ ହୋଟେଲ ରୁମ୍ ଯୋଡ଼ିବାକୁ ଓୟୋ ଯୋଜନା କରିଛି।
ଆଗାମୀ ବର୍ଷଗୁଡ଼ିକରେ ଅଯୋଧ୍ୟା ଏବଂ ଉତ୍ତରପ୍ରଦେଶ ପାଇଁ ଏକାଧିକ ଏଜେନ୍ସିଦ୍ୱାରା କରାଯାଇଥିବା ପର୍ଯ୍ୟଟନ ଆକଳନକୁ ଦୃଷ୍ଟିରେ ରଖି ବର୍ଷ ଶେଷ ସୁଦ୍ଧା ଉତ୍ତରପ୍ରଦେଶରେ ପର୍ଯ୍ୟଟକଙ୍କ ମୋଟ ଖର୍ଚ୍ଚ ୪ ଲକ୍ଷ କୋଟି ଟଙ୍କା ଅତିକ୍ରମ କରିପାରେ ବୋଲି ଏସ୍ ବିଆଇ ର ଏକ ରିପୋର୍ଟ ପ୍ରକାଶ ପାଇଛି।
ଆଶା କରାଯାଉଛି ଯେ ଅଯୋଧ୍ୟାର ରାମ ମନ୍ଦିର ଖୁବ୍ ଶୀଘ୍ର ମକ୍କା ଏବଂ ଭାଟିକାନ୍ ପରି ଏକ ବିଶ୍ୱ ପର୍ଯ୍ୟଟନ ସ୍ଥଳୀରେ ପରିଣତ ହୋଇପାରେ, ଯାହା ଉତ୍ତରପ୍ରଦେଶଦ୍ୱାରା ଉତ୍ପାଦିତ ଟିକସ ରାଜସ୍ୱରେ ବ୍ୟାପକ ଯୋଗଦାନ ଦେବ।
