ନୂଆଦିଲ୍ଲୀ: ଇରାନ ଏବଂ ଇସ୍ରାଏଲ ମଧ୍ୟରେ ସମ୍ଭାବ୍ୟ ଯୁଦ୍ଧର ଧମକକୁ ଦୃଷ୍ଟିରେ ରଖି ୟୁରୋପକୁ ଯାଉଥିବା ଏୟାର ଇଣ୍ଡିଆ ବିମାନ ଇରାନର ଆକାଶ ମାର୍ଗ ଦେଇ ଯିବ ନାହିଁ। ଏଥିପାଇଁ ପଶ୍ଚିମ ୟୁରୋପକୁ ଯାଉଥିବା ଏୟାର ଇଣ୍ଡିଆର ବିମାନଗୁଡିକ ୨ ଘଣ୍ଟା ଅଧିକ ସମୟ ନେଇପାରେ। ଆହୁରି ମଧ୍ୟ ଖବର ଅଛି ଯେ, ଏୟାର ଇଣ୍ଡିଆ ବିମାନରେ ଅଧିକ ଇନ୍ଧନ ଲୋଡ୍ କରିବାକୁ ପଡିବ। ତେବେ ବର୍ତ୍ତମାନ ପର୍ଯ୍ୟନ୍ତ ବିମାନ ଭଡା ବୃଦ୍ଧି କରାଯାଇ ନାହିଁ।
ଇରାନ-ଇସ୍ରାଏଲ୍ ଅଞ୍ଚଳକୁ ନ ଯିବା ଲାଗି ନାଗରିକମାନଙ୍କୁ ପରାମର୍ଶ:
ସିରିଆର ରାଜଧାନୀ ଦସ୍ମିକରେ ଥିବା ଇରାନର ଦୂତାବାସ ବିଲ୍ଡିଂ ଉପରେ ଇସ୍ରାଏଲର ଆକ୍ରମଣଜନିତ ମୃତ୍ୟୁ ପରେ ଇରାନ ପ୍ରତିଶୋଧ ନିଆଁରେ ଜଳୁଛି। ଇରାନ ଇସ୍ରାଏଲ ଉପରେ ଆକ୍ରମଣ କରିବାକୁ ସମ୍ପୂର୍ଣ୍ଣ ପ୍ରସ୍ତୁତ ହେଉଛି। ଇରାନ ପ୍ରତିଶୋଧ ନେବା ପାଇଁ ଘୋଷଣା କରିସାରିଛି। ଏହାକୁ ଦୃଷ୍ଟିରେ ରଖି ଇସ୍ରାଏଲ ଏବଂ ଆମେରିକା ମଧ୍ୟ ସତର୍କ ଅଛନ୍ତି। ଆମେରିକା ମଧ୍ୟ ବିଶ୍ୱାସ କରେ ଯେ, ଇରାନ ଯେକୌଣସି ସମୟରେ ଇସ୍ରାଏଲ ଉପରେ ଆକ୍ରମଣ କରିପାରେ। ଏହି ସମୟରେ ଭାରତ, ଫ୍ରାନ୍ସ ଏବଂ ରୁଷ ଭଳି ଦେଶ ନିଜ ନାଗରିକମାନଙ୍କୁ ଏହି ଅଞ୍ଚଳକୁ ନ ଯିବାକୁ ଚେତାବନୀ ଦେଇଛନ୍ତି। ବର୍ତ୍ତମାନ ଏୟାର ଇଣ୍ଡିଆର ବିମାନ ମଧ୍ୟ ଇରାନର ଆକାଶ ମାର୍ଗ ଦେଇ ଯିବ ନାହିଁ।
